Templu punkucho Jeremías willakunqan
7
Jeremíastami Tayta Dios nirqan: 2 “Templu punkuman aywaykur willakur niy: ‘Tayta Diosta adoraq kay punkupa yaykuq Judá runakuna, Tayta Dios ninqanta wiyayay. 3 Israel runakunata kuyaq y llapanta mandaq Tayta Diosmi nin: Shumaq tantiyakur yätsinqänö kawayay. Cäsukayämaptikiqa kay nacionnikikunacho imaypis añaw kawayänaykipämi yanapayäshayki. 4 Ama criyiyaytsu kutin kutin niyäshuptiki: “¡Tayta Diospa templun kaycho kaykaptinqa imaypis tsapämäshunmi!”5 “ ‘Kay nacionnikicho imaypis añaw kawayänaykipä mana alli ruraykunata jaqirir allikunallatana rurayay. Runa mayikita alli rikayay. 6 Jäpa runakunata, waktsakunata y viüdakunata ama ñakatsiyaytsu. Alli runakunata ama wanutsiyaytsu. Juk dioskunatapis ama adorayaytsu. Juk dioskunata adorarqa desgraciamanmi chäyanki. 7 Yätsinqänö kawayaptikiqa kay nacionnikicho añaw kawayänaykipämi imaypis yanapayäshayki. Kay naciontaqa kaycho imayyaqpis täyänanpämi unay castaykikunata entregarqä.
8 “ ‘Qamkunaqa llullapäyäshunqaykita criyirmi yarpaykäyanki templü kaycho kanqanpita imaypis mana castiganäpä kanqanta. Tsaytaqa ama criyiyaytsu. 9 Qamkunaqa suwakuykäyanki, runa mayikikunata wanuykätsiyanki, jukpa majanwan kakuykäyanki, llullakur juraykäyanki y inciensiuwan Baalta qoshniykätsiyanki. Tsaynöllami wakin dioskunatapis adoraykäyanki. Tsay dioskunataqa unay castaykikunapis manami imaypis adorayashqatsu.
10 “ ‘Tsaynö ruraykarpis penqakuynikikuna manami kantsu templüman shamur jutïta joqarir adorayämänaykipä. Qamkunaqa yarpaykäyanki llutanta ruraskirpis kay templuman shayämuptikiqa mana castiganäpä kanqantami. 11 Adorayämänayki templu ¿suwakunapa machaynin kanqantaku yarpaykäyanki?† Imata rurayanqaykitapis llapantami rikashqä. Noqa Tayta Diosmi tsaynö nï.
12 “ ‘Maski Silo markamana aywayay imanö kanqantapis rikayämunaykipä. Tsay markacho tänäpä akrashqa karpis tsaycho taq runakuna ajanätsiyämar jutsata rurayaptinmi ushakätsishqä. 13 Qamkunapis llutan rurayta kachariyänaykipä nikaptïpis manami cäsukayämankitsu. Kutin kutin parlapaptïpis manami wiyakayämankitsu. Tsaynö kayanqaykipitami† 14 Silo markata ushakätsinqänö kay yärakuyanqayki templutapis ushakätsishä. Tsaynömi ushakätsishä kaycho adorayämänaykipä qamkunata y unay castaykikunata entregashqa kaykarpis. 15 Efraín runakunata nacionninpita qarqunqänömi qamkunatapis ñöpäpita juklä nacionman qarquyäshayki’.
Ïdulukunata Judá runakuna adorayanqan
16 “Jeremías, kay runakunapa janan shärir ama rugakamaytsu. Kutin kutin rugakamaptikipis manami wiyashaykitsu. 17 ¿Manaku rikanki markakunacho y Jerusalén cällikunacho imanö ajanätsiyämanqantapis? 18 Ciëlucho kaykaq reina niyanqan diösapä† mikuyta rurayänanpämi wamrakuna yantata qoriyan. Taytankunami ninata tsaritsiyan. Warmikunanami tantata masarakuyan. Jäpa runakuna adorayanqan wakin dioskunapäpis vïnutami jichayan. Tsaykunata rurarmi pasaypa ajanätsiyäman. 19 Tsaynö ajanätsimarmi kikinkuna penqakuycho kaykäyan.
20 “Tsaymi nï: Pasaypa rabyanashqa karmi kay templuta ushakätsishä. Nina lunyaypa lunyar imatapis ushanqannömi runakunatapis, uywakunatapis, jachakunatapis y mikuykunatapis chipyaq ushakätsishä”.
Sacrificiuta rupatsiyänanpa trokin cäsukuyänanta Tayta Dios munanqan
21 Israel runakunata kuyaq y llapanta mandaq Tayta Diosmi nin: “Rupatsina sacrificiuta noqapä rupatsiyanqaykita manami chaskishänatsu. ¡Tsay aytsataqa wakin sacrificiutanö qamkunalla mikuyay! 22 Unay castaykikunata Egiptupita jipimur manami nirqätsu rupatsina sacrificiuta ni ima sacrificiutapis altarcho rupatsiyänanpä.† 23 Tsaypa trokinmi nirqä: ‘Ninqäta wiyakayämaptikiqa Diosnikikunami kashä. Qamkunami kuyanqä runakuna kayanki. Munanqänö kawayaptikiqa llapan rurayanqaykipis allimi kanqa’.†
24 “Tsaynö niptïpis paykunaqa ninqäkunata mana wiyamarmi cäsukayämashqatsu. Tsaypa trokinqa shonqunkuna munanqanta rurarmi llutankunata rurayashqa. Munanqänö kawayänanpa trokinqa jaqirayämashqami.
25 “Tsaynöllami unay castaykikunata Egiptupita jipimunqä junaqpita patsa hasta kananyaq sirvimaqnï profëtakunata imaypis qamkunaman kachamushqä. 26 Tsaynö kaptinpis manami wiyakayämashqaykitsu. Tsaypa trokinqa unay castaykikunapitapis mas peormi mana wiyakuq kaykäyanki.
Ïduluta adorayanqanpita Tayta Dios rabyakunqan
27 “Jeremías, mana cäsuyäshunayki kaptinpis ninqäkunata willay. 28 Willakur ninki: ‘Kay nación runakunaqa kuyanqan Tayta Dios ninqanta manami yanqallapis wiyakuyantsu. Ollqutupaptinpis manami chaskikuyantsu. Tayta Dios munanqannö kawayänanpä awniyanqantapis manami cumpliyantsu. Cumpliyänanpäqa manami parlayllapis parlayannatsu. 29 ¡Llakikurnin aqtsaykikunata rutuyay! ¡Tsunyaqman aywaykur waqay waqayta cantayay! Tayta Diosmi pasaypa ajanar kachariyäshushqayki. Manami rikaytapis munayäshunkinatsu’ ”.
30 Tayta Diosmi nin: “Judá runakunaqa adorayämänan templüta mana respitarmi mana väliq ïdulunkunata churayashqa. Tsaynö jutsata rurarninmi pasaypa ajanätsiyämashqa. 31 Tsaynöllami Ben-Hinom raqracho kaykaq Tofet niyanqancho altarkunata pirqayashqa† ollqutapis warmitapis tsurinkunata rupatsiyänanpä.† Tsayta rurayänanpäqa noqa manami nirqätsu ni yarpayllapis yarparqätsu”.
32 Tsaymi Tayta Dios nin: “Castiganä junaq chämuptin tsay raqrata manami Tofet jutiwantsu ni Ben-Hinom jutiwantsu reqiyanqa, sinöqa Wanutsinakuy Raqra jutiwanmi reqiyanqa.† Ayakunata pampayänanpä patsa mana jäkuptinmi Tofetmanna pampayanqa. 33 Tofetchöpis sitiu mana kaptinmi pampallachöna ayakuna jitaräyanqa. Tsay ayakunatami wiskurkunawan jirka uywakuna mikuyanqa. Wajakunallanpäpis manami pipis kanqatsu.
34 “Tsaynö castigaptïmi kay llapan nación tsunyaq rikakunqa. Tsaymi Judá nacioncho kaq markakunacho y Jerusalén cällikunacho runakuna kushikuyanqan ni asikuyanqanpis wiyakanqanatsu. Majatsakay fiestapis manana kaptinmi ni chölupis ni jipashpis kushikur cantapänakuyanqanatsu”.†