Jerusalénta atacayänanpä willakunqan
6
¡Benjamín trïbu runakuna, Jerusalénpita qeshpir aywakuyay!¡Tecoacho cornëtata tukayay!
¡Bet-haquerem jirkacho qoshnitsiyay!a
¡Nortipitami pasaypa mantsariypä castïgu chämunanpäna kaykan!
2 “Siónta ushakätsinäpänami kaykä.
3 Tsaymi üsha mitsiqkuna üshankunata qatiqnö soldädunkuna pushashqa Jerusalénman reykuna chäyämunqa.
Üsha mitsiqkuna üshankunawan patsakuqnömi marka waqtankunaman tumaypa patsakuyanqa.
Nirkurmi qewata üshakuna ushaqnö markata chipyaq ushakätsiyanqa.
4 “Tsay reykunami willanakur niyanqa:
‘¡Shumaq kamarikushun Jerusalén runakunata atacanantsikpä!
¡Pullan junaq atacashun!
¡Tsaynö kaptinpis junaqaykannami!
¡Llantuypis päsaykannami!
5 ¡Tsaynö kaykaptinqa paqaspana atacashun!
¡Llapan palaciunkunatapis juchutsishun!’ ”
6 Tsay reykunatami llapanta mandaq Tayta Dios nin:
“¡Jerusalén punkuta pakiyänaykipä qerukunata muturiyay!
¡Murällan waqtankunaman witsar yaykuyänaykipä allpata qotuyay!
Tsay markacho kaykaq runakunataqa castigashämi.
Tsaychöqa mana alli runakunami kaykäyan.
7 Pukyucho imaypis yaku mana ushakanqannömi llutan ruraykunapis Jerusaléncho ushakantsu.
Pïmaypis mana allikunata rurarmi maqanakur wanutsinakuyan.
Runakuna ñakatsinakuykaqta y chikinakuykaqtami imaypis rikaykä.
8 Jerusalén runakuna, imanö kawayanqaykitapis tantiyakuyay.
Mana tantiyakuyaptikiqa kachariykuyäshaykimi.
Täyanqayki naciontapis tsunyaqmanmi tikratsishä”.
9 Llapanta mandaq Tayta Diosmi nin:
“Jerusaléncho quëdaq kaq runakunataqa chikiqninkuna kuchu kuchumi ashiyanqa.
Üvata pallar kutin kutin ashiqnömi prësu tsariyänanpä ashiyanqa”.
10 Tsaymi Tayta Diosta nirqä:
“¿Pitarä willashä?
¿Pitarä nishä?
¿Pirä wiyamanqa?
Tsay runakunaqa rinrinkuna tsapakashqanömi kaykäyan.
Willakuynikita wiyarpis asikuyanmi.
Imata ninqaykitapis manami wiyayta munayantsu.
11 Tsaymi qam ajanashqa kanqaykinö noqapis ajanaykä.
Rabyananqaykitaqa manami upällakümantsu”.
Tayta Diosmi nimarqan:
“Rabyanashqa castiganäpä kaqta cällicho kaykaq wamrakunatawan tröpanpa puriykaq chölukunatapis willay.
Warmitapis, runatapis, awkintapis, chakwantapis mana kuyapaypami prësu apakuyanqa.
12 Runakunapa chakrankunapis, wayinkunapis y warminkunapis jukpanami kayanqa.
Kay nacioncho taq runakunataqa noqami castigashä.
Noqa Tayta Diosmi tsaynö nï.
Profëtapis sacerdötipis jutsata rurayanqan
13 “Paykunaqa llapanpis yarpaykäyan suwakuypa imatapis tariyänanpämi.
Profëtakunapis sacerdötikunapis engañakuqllami kaykäyan.†
14 Paykunaqa kuyanqä runakuna däñakushqanö kayaptinpis manami alli jampiqnötsu kaykäyan.
Castïgu kananpä kaykaptinpis ‘manami ima castïgupis kanqatsu’ niyanmi.†
15 Melanaypä jutsata rurarpis manami penqakuyantsu.
Manami penqakuytapis yachayantsu.
Tsaynö kayanqanpita castigaptïmi wakin runakunawan iwal wanuyanqa.
Noqa Tayta Diosmi tsaynö nï”.
Akranqan runakuna Tayta Diosta mana cäsukuyanqan
16 Tayta Diosmi nin:
“Tinkuq nänikunacho ichiykur tapukuyay mayqan näni mas unay kanqanta y alli kawayman chätsikuq kanqanta.
Tsay alli kaq nänipana aywayay.b
Tsaynöpami jamayta tariyanki”.†
Tayta Dios tsaynö niptinpis runakunaqa niyan:
“¡Manami tsay nänipa aywayäshätsu!”
17 Tsaymi rikachakuqkunata churaskir runakunata Tayta Dios nin:
“¡Rikachakuqkuna cornëtata tukayämunqanta maya mayalla kaykäyay!”c
Tsaynö niptinpis runakunaqa niyan:
“Manami wiyaytapis munayätsu”.
Jerusalén runakuna castigashqa kayänanpä willakunqan
18 “¡Maytsay nación runakuna, wiyayämay!
¡Kuyanqä runakunata imanö castiganäpä kanqantapis musyayay!
19 “¡Llapan mundu, shumaq wiyayämay!
Kay runakunata pasaypami castigashä.
Tsaynö castigashä willakunqäta mana wiyakuyanqanpita y leynïkunata mana cäsukuyanqanpitami.
20 Paykunaqa manakaqllapämi juklä nacionpita mushkuq jachakunata apayämun.
Sabá nacionpita inciensiutapis manakaqllapämi altarnïman apayämun.
Noqaqa manami chaskïnatsu sacrificiuta altarcho rupatsiyanqantapis.
Sacrificiukunata apayämunqanqa manami shonqüpänötsu.
21 Tsaymi maypa aywayaptinpis paykunapä trampanö kashä.
Taytanpis, tsurinpis, vecïnunpis y reqinakuyanqanpis wanuyanqami.
Noqa Tayta Diosmi tsaynö nï”.
22 Tayta Diosmi nin:
“Norti kaqlä munayyuq nacionpita shayämunanpämi soldädukuna kamarikuykäyan.
Pasaypa karucho täyanqanpitami shayämunqa.
23 Paykunaqa flëchankunawan y espädankunawanmi kaykäyan.
Mana alli runa karmi pitapis kuyapäyantsu.
Pelyarpis qayaräyan lamar yaku pulchaqyar qayaraqnörämi.
Cawallun muntashqallami guërrata rurayänanpä kaykäyan.
¡Sión runakuna, atacayäshunaykipämi shayämunqa!”†
24 Tsaymi Jerusalén runakuna niyanqa:
“Tsay soldädukuna mana kuyapäkuq kayanqanta musyarmi pasaypa mantsariyllawan kallpäkunapis kannatsu.
Pasaypa llakikurmi wachay nanaywan kaykaq warminö kaykäyä.
25 ¡Jirkapa ama aywashuntsu!
¡Nänikunapapis ama purishuntsu!
Chikimaqnintsikkunaqa tsaychömi espädankunawan kaykäyan.
Maytsaychöpis pasaypa mantsariypämi kaykäyan”.†
26 Tsaymi noqa nï:
“¡Marka mayikuna, qachqa latsapakunata jatikurkur uchpacho qoshpayay!
¡Japallan tsuriki wanuptin waqaqnö pasaypa waqayay!
¡Ushakätsimänantsikpä shamuqkuna illaqpitami chäyämunqa!”
27 Tayta Diosmi nimarqan:
“Qamtami churä kuyanqä runakuna imanö kawayanqanta rikanaykipä”.
28 Tsaymi nirqä:
“Paykunaqa llapanpis mana wiyakuq y tumpakuq runakunami kaykäyan.
Broncinö y fiërrunö shonqunkuna chukru kaptinmi pasaypa llutan rurayman churakashqa kaykäyan.
29 Herrërukuna fräwawan mayjina pükatsirpis qellaycho tallushqa metalkunata tsullutsiyta mana kamäpakuyanqannömi kaykä.
Tsaymi Jerusalén runakunata mayjina willarpis jutsa rurayta kachariyänanpä tantiyatsiyta kamäpakütsu.
30 Tsay runakunataqa Tayta Dios manami yanapanqanatsu.
Tsaymi pïmaypis niyanqa jitarishqa qellay kayanqanta”.