Jerusalén runakuna jutsata rurayanqan
5
Tayta Diosmi nin:“Jerusalén cällikunapa purirnin shumaq rikachakuyay.
Entëru pläzakunachöpis shumaq ashiyay.
Tsaycho mä ¿tariyankikush jukllayllatapis alli ruraq runata y rasun kaqllata parlaqta?
Jukllayllatapis tariyaptikiqa Jerusaléncho taqkunata perdonashämi.
2 Tsay runakunaqa jutïcho jurarpis janan shonqullami jurayan”.
3 Tayta Dios, qamqa munanki runakuna awniyäshunqaykinölla imaypis cäsukuyäshunaykitami.
Jerusalén runakunaqa corrigir castigaptikipis manami cäsukuyäshunkitsu.
Castigaptikipis manami wiyakuyäshunkitsu.
Paykunapa shonqunkunaqa ruminömi kaykan.
Mana wanakuypami jutsatapis rurayan.
4 Tsaymi nirqä: “Mana yachaq runakunallami llutanta rurayan.
Tayta Diospa yachatsikuyninta mana musyarmi pay munanqannö kawayantsu.
5 Imaykayuq runakunami itsanqa Tayta Diospa näninta reqir pay munanqannö kawayan”.
Tsaynö yarparmi aywarqä imaykayuq runakuna kaqman Tayta Dios munanqannö kawayanqanta o mana kawayanqantapis musyamunäpä.
Paykunawan parlarmi tantiyarqä imaykayuq runakunapis Tayta Dios munanqannö mana kawayanqanta.
6 “Tsaynö kayaptinmi muntipita yarqamuq leonnö paykunata wanutsiyanqa.
Tsunyaqcho mallaqashqa löbunömi rachir ushayanqa.
Marka ñöpankunachöpis tigrikunanömi wanutsiyänanpä shuyaraykäyanqa.
Markapita yarquq kaqtaqa pitapis wanutsiyanqami.
Tsaynö kanqa kutin kutin mana cäsukuypa jutsata rurayanqanpitami”.
7 Tayta Diosmi nin:
“Israel runakuna, tsaynö kayanqaykipita manami perdonayäshaykitsu.
Qamkunaqa jaqiramarmi manapis rasunpaypa kaq dioskunapa jutincho juraykäyanki.
Llapan ministiyanqaykitapis kamaripaykaptïmi runanta warmi jaqiriqnö qamkunapis jaqiriyämashqayki.
Prostitütapa wayinman aywaq runakunanömi tröpanpa tröpanpa juk dioskunata adoraq aywaykäyanki.
8 Tsaynöllami yëwata wera cawallu qatiraqnö runa mayikipa warminta qatiraykäyanki.
9 Tsay niraq runakunataqa mana kuyapaypami castigashä.
10 “Jerusalén runakuna üva chakrä ñöpata kashqa karpis kananqa manami chakränatsu kaykan.
Tsaynö kaykaptinqa contrankuna shayämur corral jananpa yaykuykur üva chakräta ushakätsiyätsun.
Üvapa llimllankunata rutuyätsun.a
Llapantaqa ama ushakätsiyätsuntsu.†
11 Israel runakuna y Judá runakunapis kutin kutin awniykämarpis manami cumpliyantsu.
Noqa Tayta Diosmi tsaynö nï.
12 “Jerusalén runakunaqa manakaqman churamarmi niyan:
‘Tayta Dios manami kantsu.
Ima desgraciapis manami päsamäshuntsu.
Manami kanqatsu guërrapis ni muchuypis.
13 Tayta Diospa profëtankuna willakuyanqanpis wayra päsaqnöllami kaykan.
Paykunataqa manami pipis kachamushqatsu.
Castïgu shamunanpä willakuyanqanpis kikinkunallaman chätsun’ ”.
14 Tsaymi llapanta mandaq Tayta Dios nimashqa:
“Tsaynö niyanqanpitami noqapa jutïcho willakunqayki ninanö kanqa.
Tsay runakunanami yantanö kayanqa.
Nina rupaptin yanta ushakanqannömi paykunapis ushakäyanqa.
15 Israel runakuna, qamkunata atacayäshunaykipämi karu nación runakunata pushamushä.
Tsay runakunaqa unaypita patsami pasaypa kallpasapa kaykäyan.
Paykunapa parlayninta mana tantiyarmi imata niyanqantapis tantiyayankitsu.
16 Paykunaqa llapanpis geniullantämi kaykäyan.
Pitapis flëcharqa wanutsiyanmi.
17 Llapan mikuynikikunatami ushakurkuyanqa.
Tsurikikunatapis warmita ollqutapis wanutsiyanqami.
Üshaykikunata, wäkaykikunata, üvaykikunata y hïgusnikikunatapis ushakurkuyanqami.
Jinchi sigurashqa markakunaman yärakuyanqaykitapis ushakätsiyanqami”.†
18 Tayta Diosmi nimarqan: “Tsaynö castigarpis manami llapaykikunataqa ushakätsiyäshaykitsu. 19 Desgracia tsariptinmi tapuyäshunki imanir Diosnin kaykar tsaynö ruranqäta. Tsaynö tapuyäshuptiki ninki: ‘Qamkunaqa Tayta Diosta qonqaykurmi juklä nacionkunapa diosninkunata nacionnikicho adorayashqayki. Tsaymi qamkunapis juklä nación runakunata jäpa nacioncho sirviyanki’ ”.
Castïgu shamunanpä willakunqan
20 Tayta Diosmi nin:
“Jacobpita aywaraq Israel runakuna y Judá runakuna, willakunqäta wiyayämay.
21 Ñawiki kaykaptinpis mana rikaq,
rinriki kaykaptinpis mana wiyaq,
mana tantiyakuq upa runakuna, wiyayämay.†
22 Noqa Tayta Diosmi nï:
Lamar yaku kuchunpita masta mana päsananpämi aqushata churashqä.
Tsaymi mayjina wayraptin pulchaqyarpis päsantsu.†
Lamarpis cäsukaykämaptinqa ¿imanirtä qamkunaqa cäsukayämankitsu?
Castigakuq kanqäta musyaykarqa ¿imanirtä mantsapakamar ñöpächo tsuktsukyäyankitsu?
23 “Qamkunaqa ishkay yarpayyuq y mana wiyakuq karmi jaqiriyämashqayki.
24 Shonqullaykikunachöpis manami yarpachakuyankitsu noqapita mantsapakayämänaykipä kanqanta.
Manami tantiyayankitsu mikuyniki alli qeshpinanpä punta kaq tamyata y qepa kaq tamyatapis noqarä tamyatsimunqäta.
Tsaynöllami tantiyakuyankitsu mikuynikikunata qoriyänaykipäpis noqarä usyatsimunqäta.
25 Tsaymi kananqa jutsata rurayanqaykipita tamyatsimushänatsu.
Imayka allikunata tariyänaykipä kaqtapis manami tariyankinatsu.
26 “Qamkuna kaqchöqa mana alli runakunami kaykäyan.
Tsay mana alli runakunaqa pishqukunata tsariqnömi runa mayinkunata engañayänanpä shuyaraykäyan.
27 Jaulacho pishqukuna atska kayanqannömi wayinkunachöpis suwakuyanqankuna atska kaykan.
Tsaynöpa imaykayuq tikrarmi paykunaqa munayyuq tikrayashqa.
28 Alli allita mikurmi wera werarä kaykäyan.
Mana kachaypami llutankunata rurayan.
Waktsakuna quejakuyaptinpis manami janan shäriyantsu.
Ñakaykaqta rikaykarpis manami yanapayantsu.
29 “Noqa Tayta Diosmi nï:
Tsay niraq runakunataqa mana kuyapaypami castigashä.
Ajanätsiyämanqanman tupumi castigashä.
30 Paykunaqa pasaypa mantsariypä llutankunatami kay nacioncho ruraykäyan.
31 Profëtakunapis llullakuykäyanmi.
Sacerdötikunapis shonqunkuna yarpanqallantami yachaykätsiyan.
Tsaynö kaptinpis qamkunataqa manami imapis importayäshunkitsu.
Tsaypa trokinqa paykuna tsaynö kanantami munaykäyanki.
Ushakäyänayki junaq chämuptin ¿imanörä salvakuyanki?”