4
Tsaynö nir mañakuyaptinmi Tayta Dios ninqa: “Israel runakuna, noqaman kutimuyta munarqa jutsa rurayta kachariyay. Ïduluykikunata jitaskir noqa munanqänö kawayay. 2 Sirviyämänaykipä llapan shonquykikunawan awniyämaptikiqa maytsay nacionkunapämi bendición kayanki. Tsaynöpami maytsaychöpis runakuna alabayämanqa”.3 Jerusalén runakunata y Judá runakunatami Tayta Dios nin:
“Mana muruna chakrata kichaqnö shonquykikunata kichapäyämay.†
Mana kichapäyämarqa kasha chakraman muruqnömi kaykäyanki.
4 Pactu ruranqantsikta cumpliyänaykipä shonquykikunata señalakuyay.a †
Tsaynö mana rurayaptikiqa pasaypami ajanäshä.
Ajanaptïqa manami imanöpapis qallqütsimayta kamäpakuyankitsu”.
Judá nación runakunata castigananpä Tayta Dios ninqan
5 “Jerusaléncho y Judácho taqkunata willay:
‘¡Atacayäshunaykipä shayämuptin cornëtata tukayay!b
¡Corralashqa markakunaman juklla amparakuyänanpä qayakuyay!
6 Noqaqa nortiläpitami soldädukunata kachamushä atacayäshunaykipä.
¡Runakuna Siónman qeshpir amparakuyänanpä bandërata jawiyay!
¡Juklla qeshpiyay!
7 “ ‘Maytsay nacionkunata ushakätsiq atska soldädukunami shamuykäyan.
Muntipita mallaqashqa león yarqamuqnömi yarqaykäyämun.
Wanutsiyäshuptikimi markaykikunapis raqällana rikakunqa.
8 Tsaynö kananpä kaykaptinqa llakikurnin qachqa latsapakunata jatikuyay.
Pasaypa nanätsikur waqarnin qayaräyay.
Pasaypa rabyananqätaqa manami imanöpapis qallqütsiyankitsu’ ”.
9 Tayta Diosmi nin:
“Tsay junaq chämuptinqa reypis autoridäkunapis mantsariyllawanmi tsuktsukyäyanqa.
Tsaynöllami sacerdötikunapis y llulla profëtakunapis pasaypa mantsakäyanqa”.
10 Tayta Dios tsaynö nimaptinmi nirqä: “¡Ay Tayta Dios! ¿Imanirtä Jerusalén runakunata llullapashqayki? ¿Imanirtä profëtakunata kacharqayki Jerusalén runakunata imapis mana päsananpä kanqanta willakuyänanpä? Tsaynö willakuyaptinpis kananqa kunkankunaman cuchillu churashqanömi kaykäyan”.
11 Tayta Diosmi nimarqan: “Tsay witsanmi Jerusalén runakunata willayanqa tsunyaqpita achaq wayrata wayraykätsimunqäta. Tsay wayraqa manami trïguta wayrananpänötsu kanqa, 12 tsaypa trokinqa shukukuy wayrami kanqa. Tsay wayrataqa kikïmi wayratsimushä. Tsaywanmi Jerusalén runakunata pasaypa castigashä”.c
13 Tsayta rikarmi Jerusalén runakuna niyanqa:
“¡Chikimaqnintsikkunaqa yana pukutaynörämi shamuykäyan!
¡Guërra carrëtankunapis shukukuy wayranörämi shayämun!
¡Cawallunkunapis anka pajanqanpita masmi cörriykäyämun!
¡Kananchi kananllaqa!
¡Manami imanöpa qeshpiytapis kamäpakuntsiknatsu!”
14 Jerusalén runakuna, salvakuyänaykipä jutsaykikunata kacharir shonquykikunata mayllayay.
¡Imayyaqrä jutsa rurayllapä yarpachakuyanki!
15 Dan markapita y Efraín jallqakunapitami desgracia chämunanpä kaqta willakayämun.
16 Tsaynö kaykaptinqa Jerusaléncho taqkunata y cercan nacionkunacho taqkunatapis willayay karu nacionpita chikiqninkuna shamuykäyanqanta.
Tsay chikiqninkunaqa Judá nacionman yaykur atacayänanpämi büllata rurar shamuykäyan.
17 Jerusalénman chaykurmi tumaypa tsaparäyanqa.
Chakranta cuidaq runa pipis mana yaykunanpä siguraqnömi tsapaskiyanqa.
Akranqä runakunata tsaynö päsanqa conträ tikrayanqanpitami.
Noqa Tayta Diosmi tsaynö nï.
18 Judá runakuna, mana cäsukuypa llutanta rurayanqaykipitami tsaynö päsayäshunki.
Tsaynö päsayäshuptikimi pasaypa llakikur shonquykikunapis nananqarä.
Jeremías pasaypa llakikunqan
19 ¡Ay shonqullä shonqu!
¡Llakikuptï shonqü tsapakayparämi nanaykun!
¡Manami upällakuytapis kamäpakütsu!
Guërrapä cornëta waqamuqtami wiyashqä.d
Soldädukuna shamur büllata ruraykäyaqtami wiyashqä.
20 Kutin kutin desgracia päsamaptintsikmi llapan nacionnintsik ushakaykan.
Patsakunantsikpä tolduntsikkunatapis wayintsikkunatapis illaqpitami ushakätsiyashqa.
21 Guërracho cornëta waqamuqta ¡imayyaqrä wiyaykäshä!
Atacamaqnintsik soldädukuna bandëran aptashqa shamuykäyaqta ¡imayyaqrä rikaykäshä!
22 Tayta Diosmi nin:
“Akranqä runakunaqa mana tantiyakuq karmi ninqäta tantiyayantsu.
Paykunaqa mana tantiyakuq yarpayniynaq upa wamranömi kaykäyan.
Alli ruraytaqa manami yachayantsu.
Llutanta rurayänanpämi itsanqa juiciunkunapis kan”.
Desgracia shamuykaqta revelacioncho Jeremías rikanqan
23 Pasaypa ushakashqa kaykaqta y tsunyaq kaykaqtami kay nacionta revelacioncho rikashqä.
Ciëluchöpis manami ima atsikyaypis kashqatsu.
24 Jirkakunatapis tsuktsukyaykaqtami rikashqä.
Jirkankunatapis siniganö kuyuykaqtami rikashqä.
25 Rikachakur manami pï runatapis rikashqätsu.
Pishqukunapis llapanmi aywakuyashqa.
26 Tsaynöllami rikashqä alli wayuq chakrakunatapis tsunyaqman tikrashqa kaykaqta.
Llapan markakunatapis tsunyaqllana kaykaqtami rikashqä.
Tayta Dios pasaypa rabyanarmi llapantapis tsaynö ushakätsishqa.
27 Tayta Diosmi nin:
“Llapan kay nacioncho runakunata castigarpis manami llapan naciontaqa ushakätsishätsu.
28 Ushakätsinäpä ninqätaqa cumplishämi.
Ushakätsiptïqa kay patsapis pasaypami llakikunqa.
Ciëlupis tsakanqarämi.
29 “Cawallun muntashqa soldädukuna patatarrä shamuykaqta wiyarmi llapan qeshpiyanqa.
Flëchan aptashqa shamuykäyaqta rikarmi markapita llapan qeshpir aywakuyanqa.
Muntikunamanmi pakakuyanqa.
Qaqakuna chawpinkunamanmi qeshpir yarkuyanqa.
Llapan markakuna tsunyaq quëdaptinmi pipis tsaycho täyanqanatsu.
30 “Tsaynö kananpä kaykaptinqa Jerusalén, ¿imatatä ruraykanki?e
¿Imapänatä puka latsapatapis jatikunki?
¿Imapänatä qori alhäjawanpis adornakunki?
¿Imapänatä ñawikitapis pintakunki?
Kuyayllapä kanqaykipis manakaqllapämi.
Kuyanqayki runakunaqaf llapanmi melanäyäshunki.
Paykunaqa wanunaykitami munaykäyan.
31 “Mayor wawanta qeshyakur qayaraykaqtanömi wiyaykä.
Siónmi tsaynö qayaraykan.
Makillan tsoqpashqa qayararmi nin:
‘¡Kayrächi kayllaqa! ¡Kananllapänachi karqäpis!
¡Wanutsikuqkunami wanutsiyämanqa!’ ”