Jukwan jukwan kakuq warminö Jerusalén runakuna kayanqan
3
Tayta Diosmi nin: “Pï runapis warminwan rakikaskiptin tsay warmi juk runawan taptinqa ¿punta kaq runan yapay qorinmantsurä?† ¡Manami! ¡Tsaynö ruraptinqa llapan nacionmi penqakuycho kanqa! Jerusalén runakuna, qamkunapis jukwan jukwan kakuq warminö karmi juk dioskunata adorayashqayki. ¿Tsaynö kaykarku mana penqakuypa noqaman kutimuyta yarpaykäyanki?2 “Jirkakunaman maski rikachakuyay. Mayqanläpa rikachakurpis tsay jirkakunacho juk dioskunatami adorayashqayki.† Qamkunaqa tsunyaq jirkacho kaykaq mañösa warminömi kaykäyanki. Nänipa puriq mayqan chöluwanpis kakunanpä tsay warmi listu kanqannömi qamkunapis mayqan diostapis adorayänaykipä listu kaykäyanki. Juk dioskunata adorarninmi jutsata rurar nacionnikikunatapis qanratäyashqayki. 3 Tsaynö kayanqaykipitami tamya killa witsanpis ni jachakuna tuktunqan witsanpis manana tamyamushqanatsu.
“Pïmaywanpis kakuq warmi penqakuyniynaq kanqannömi qamkunapis kaykäyanki. 4 Kananqa cärayki kanrämi niyämänaykipä: ‘Qamqa taytämi kaykanki. Wamra kayanqäpita patsami yanapamaqnï kashqayki. 5 Amana noqakunawan rabyakuynatsu. Tsaypa trokinqa perdonayämayna’. Tsaynö nir mañakaykämarpis jinallami qamkuna mana allikunata ruraykäyanki”.
Israel nación runakuna kayanqannö Judá nación runakunapis kayanqan
6 Josías rey kaykanqan witsanmi† Tayta Dios nimarqan: “¿Rikashqaykiku mana wiyakuq Israel nación imata ruranqantapis?a Llapan jirkankunacho y raprasapa jachakunapa chakinkunachöpis noqata jaqiramarmi juk dioskunata adorashqa. Tsaynö rurarmi runanta qanrataq warminö kaykan.
7 “Tsaynö ruraptinpis yarparqä jutsata rurashqa karpis noqaman kutimunanpä kanqantami. Tsaynö yarpaptïpis manami kutimushqatsu. Tsaytaqa rikashqami mana wiyakuq ñañan Judápis.
8 “Noqawan kaykar jukwan jukwan imaypis kakunqanpitami rakikar Israelta qarqushqä.b Tsaytapis Israelpa mana wiyakuq ñañan Judá rikashqami. Rikaykarpis Judáqa mana penqakuypami paypis mañösa warminö jukwan jukwan kakushqa. 9 Tsaymi rumipita y qerupita rurashqa ïdulukunata mana penqakuypa adorashqa. Tsaynö ruranqanpitami Judá nacionpis pasaypa qanratashqa kaykan. 10 Noqaman kutimurpis janan shonqullami adoraq tukaman. Noqa Tayta Diosmi tsaynö nï”.
Israel nación runakuna Tayta Diosman kutiyänanpä willakunqan
11 Tayta Diosmi nimarqan: “Mana wiyakuq Israel runakunapitapis mas peormi Judá runakuna kaykäyan. 12 Norti kaqläpa rikärir Israel nación runakunata niy:
“Tayta Diosmi nin:
‘¡Mana wiyakuq Israel runakuna, noqaman kutikayämuy!
Kutiyämuptikiqa kushishqami chaskiyäshayki.
Kuyapäkuq karmi mayjina rabyanashqa karpis perdonashayki.
13 Tsaynö kashqa karpis mana wiyakur jutsayuq kayanqaykita reconöciyay.
Qamkunaqa adulteriu jutsata juk warmi ruranqannömi raprasapa jachakunapa chakincho juk dioskunata adoraykäyanki.
Noqa Tayta Diosmi tsaynö nï’ ”.†
14 Tayta Diosmi nin: “Mana wiyakuq wamräkuna, noqaman kutikayämuy. Qamkunaqa noqapami kaykäyanki. Kutikayämuptikiqa cada markapitami jukta y cada castapitami ishkayta Sióncho täyänaykipä churayäshayki. 15 Tsaychömi rey kananpä shonqüpänö kaqkunata churapäyäshayki. Paykunami tantiyakuq y yachaq karnin alli kawayänaykipä shumaq rikayäshunki”.
16 Tayta Diosmi nin: “Tsaycho täyaptiki tsurikikunapis atskamanmi mirayanqa. Tsaycho Pactu Babul mana kaptinpis tsay babulpä manami pipis parlanqanatsu ni watukanqanatsu. Ni juk babulta rurananpäpis manami yarpanqanatsu.† 17 Tsay witsanmi Jerusalénta niyanqa Tayta Diospa trönun kanqanta.c
“Jerusalénmanmi maytsay nacionpitapis runakuna shayämunqa adorayämänanpä. Mananami shonqun munanqannö jutsata rurar puriyanqanatsu.
18 “Tsay witsanmi Israel runakunawan Judá runakuna norti kaqlä nacioncho taykäyanqanpita kutiyämunqa. Ishkan qorikaskirmi unay castankunata rikatsinqä nacioncho täyanqa.†
19 “Israel runakuna, qamkunataqa imaypis tsurïtanömi rikayta munarqä.
Nacionniki maytsay nacionpita mas alli kanantami munarqä.
‘¡Papä!’ niyämänaykipä kanqantami noqaqa yarparqä.
Yarparqä imaypis mana jaqiriyämänaykipä kanqantami.
20 Tsaynö kuyaykaptïpis kachariyämashqaykimi.
Runanta jaqirir juk runawan aywakuq warminömi juk dioskunatana adorayashqayki.
Noqa Tayta Diosmi tsaynö nï.
21 “¡Tsunyaq jirkakunacho qayaräyämunqanmi wiyakaykämun!
Tsaychömi Israel runakuna waqayar pillapis kuyapaykunanpä mañakuykäyan.
Paykunaqa tsaynö kaykäyan Tayta Diosnin kaykaptï mana cäsukamaypa jutsa rurayanqanpitami.
22 “Mana wiyakuq tsurïkuna, ¡noqaman kutikayämuy!
Kutikayämuptikiqa mana wiyakuq kayanqaykipita perdonayäshaykimi.
“Tsay witsanmi Israel runakuna niyämanqa:
‘Noqakunaqa qammanmi kutikayämü, Tayta.
Noqakunapaqa qammi Tayta Diosnï kaykanki.
23 Manakaqllapämi jirkankunacho kaykaq altarkunaman juk dioskunata mañakuq aywayashqä.
Manakaqllapämi jirkakunachöpis tsay dioskunapä fiestata rurayashqä.
Tayta Diosllä, qamllami salvayämanki.
24 Mana väliq ïdulukunata penqakuypä adorayanqäpitami imaykäkunapis ushakashqa.
Tsaymi wamrallarä kaykäyaptï mamä taytä wätakuyanqan üshankuna, wäkankuna y warmi ollqu tsurinkunapis ushakäyashqa.
25 Unay castäkunapis y kikïkunapis chölu kayanqäpita patsami jutsata rurar qamta ajanätsiyashqä.
Tsaynö kayanqäpitami pasaypa penqakur umpuraykäyä’ ”.