Egiptupita jipimunqanta Israel runakunata Tayta Dios yarpätsinqan
2
Tayta Diosmi nimarqan:2 “Jerusaléncho taq runakunaman aywar ninqäta willay:
Jipasha kar cäsukamanqaykita yarparaykämi.†
Tsay witsanmi tsunyaq jirkapa y mikuy mana wayunqan chakrapa purir qatirämarqayki.
Tsayrä majatsakashqa jipash runanta kuyaqnömi kuyamarqayki.†
3 Tsay witsanqa munanqänömi kawarqayki.
Punta poquq mikuy noqapä kanqannömi qampis noqapä karqayki.
Mayqan nacionpis ñakatsishuptikiqa tsay nacionta pasaypami castigaq kä.
Noqa Tayta Diosmi tsaynö nï”.
Israel runakunapa unay castankuna jutsata rurayanqan
4 Jacobpita aywaraq Israel runakuna, mayqan casta karpis Tayta Dios ninqanta llapaykikuna shumaq wiyayämay. 5 Tayta Diosmi nin:
“¿Imatatä mana allita rurashqä unay castaykikuna mana cäsukayämänanpä?
Mana väliq dioskunata adorarmi kikinkunapis mana väliq tikrayarqan.
6 Egiptupita jipimur tsunyaq jirkapa pushaykämuptïpis paykunaqa manami munanqänötsu kawayarqan.
7 Paykunatami kuyayllapä nacionman pushamurqä imayka wayuqtapis mikur kushishqa kawayänanpä.
Tsaynö kaptinpis jutsa rurayta rurarmi nacionnïta impüruyätsiyarqan.
Tsaynöpami nacionnï pasaypa melanaypä tikrarqan.
8 “Sacerdötikunapis munanqänöqa manami rurayantsu.
Leyta yachatsiqkunapis manami cäsukayämantsu.
Reykunapis conträmi tikrayan.
Profëtakunapis mana väliq dioskunallaman yärakurmi Baalpa jutincho willakuyan.
9 Tsaymi kananqa qamkunatapis, tsurikikunatapis y willkaykikunatapis castigayäshayki.
Noqa Tayta Diosmi tsaynö nï”.
Ïduluta adorar Israel runakuna imanö kayanqanpis
10 “Qamkuna kayanqaykinö ¿mayllachöqa runakuna kayantsurä?
Rupay jeqanan kaqlächo kaq islakunaman aywayay tsaycho taqkunata shumaq rikayämunaykipä.
Cedarlämanpis pillatapis kachayay tsaycho taq runakuna imanö kayanqantapis musyayämunanpä.
11 Paykuna adorayanqan dioskuna mana rasunpaypa dios kaptinpis ¿mayqan nacionllachöqa diosninkunata trukatsishqatsurä juk dioskunata adorayänanpä?†
Kuyanqä runakunami itsanqa munayyuq Diosnin kaykaptïpis mana väliq dioskunatana adoraykäyan”.
12 Tayta Diosmi nin:
“Qamkuna tsaynö kayanqaykipitami ciëlupis mantsarin.
Mana allikunata rurayanqaykita rikarmi tsuktsukyan.
13 Kuyanqä runakuna kayaptikipis jutsaykikuna ishkaymi kaykan.
Jukaq jutsaykikunami kaykan noqata jaqiriyämanqayki.
Jukaqnami kaykan juk dioskunaman yärakuyanqayki.
Tsaynöpami mana tsakiq pukyuta kacharir shaqacho pözuta ruraqnö kaykäyanki.†
14 “Israel runa kaykarqa manami wätaytsu kaykäyanki ni wätay kayänaykipätsu yuriyashqayki.
Tsaynö kaykaptinqa ¿imanirtä juklä runakuna shamur imaykaykikunatapis apakur ñakaykätsiyäshunki?
15 Qamkunamanqa imayka leonnörämi qayararrä chikishuqnikikuna yaykayämushqa.
Llapan nacionnikicho markaykikunatapis raqällatanami jaqiyashqa.
Markaykikunata rupatsiyaptin manami pipis tsaycho tannatsu.†
16 Menfis soldädukuna y Tafnes soldädukunapis Egiptupita shamurmi vinciyäshurqayki.
17 Qamkunata tsaynö päsayäshurqayki pushaykaptïpis noqa Tayta Diosnikita jaqiriyämanqaykipitami.
18 “Kananqa ¿imatatä jipiyashqayki Egiptuman aywar Nilo mayupita yakuta upuyanqaykiwan?†
¿Imatatä jipiyashqayki Asiriaman aywar Éufrates mayu yakuta upuyanqaykiwan?b
19 Qamkunaqa kikikikunapa jutsaykikunapita y mana cäsukayämanqaykipitami castïguta chaskiyanki.
Tsay hörami tantiyayanki noqata qonqaskamar mana mantsapakayämanqaykipita desgracia päsayäshunqaykita.
Llapanta mandaq Tayta Dios karmi tsaynö nï.
20 “Unaypita patsami qamkunaqa makïpita yarqukur munayanqaykita ruraykäyanki.
Adorayämaytapis manami munayankinatsu.
Tsaynö karmi maytsay jirkankunacho y raprasapa jachakunapa chakinkunachöpis jukwan jukwan kakuq warminö juk dioskunata adoraykäyanki.
21 “Qamkunataqa allinnin kaq üvata akraykur plantaqnömi plantashqä.†
Tsaynö ruraykaptïqa ¿imanöpatä mana alli üvanö tikrayashqayki?
22 Lijyawan mayjina mayllakurpis y maytsika jabonwan bäñakurpis jutsaykikunata manami mayllayankitsu.
Noqa Tayta Diosmi tsaynö nï.
23 “Baal dioskunata adoraykar ¿imanöpatä niyankiman jutsaynaq kayanqaykita?
Tsaynö nir llutanta niyanqaykita tantiyayänaykipä raqracho ïdulukunata adorayanqaykita yarpäyay.†
Ïdulukunata adorayänaykipäqa imayka qollpanaq camëllu cörrikachaqnömi kaykäyanki.
24 Tsunyaq jirkallacho täkuq china ashnu orqu ashnupa asyayninta mayaskir qollpanar cörrikachaqnömi kaykäyanki.
Tsay ashnuta ¿pirä tsapanman?
Qollpanaykaq ashnuta orqu ashnu tarinqannömi qamkunatapis tariyäshunki juk dioskunata adoraykäyaqta.†
25 ¡Imayyaqrä llanqikikunapis ushakashqa tsay dioskunapa qepanta cörriyanki!
¡Imayyaqrä kunkaykikunapis tsakishqa tsay dioskunata qatiraykäyanki!
Tsaynö kaptinpis qamkunaqa niyämanki:
‘Alfin imanäyäshätä.
Noqakunaqa jäpa dioskunatami pasaypa kuyayä.
Imanö karpis paykunatami sirviyäshä’.
26 “Taripaykuptin suwa runa penqakunqannömi qamkunapis mana cäsukuq kayanqaykipita penqakuyanki.
Tsaynöllami penqakuyanqa mandashuqniki reykunapis, autoridänikikunapis, sacerdötikikunapis y llulla profëtaykikunapis.
27 Qamkunaqa qerupita rurashqa ïdulukunatami ‘papä’ nikäyanki.
Tsaynöllami rumipita rurashqa ïdulukunatapis ‘mamay’ nikäyanki.
Noqataqa manami imapäpis cuentayämankinatsu.
Tsaynö kaptinpis desgraciakuna päsayäshuptikirämi ‘¡Taytay, salvaykallämay!’ niyämanki.
28 Desgracia päsayäshuptiki ¿imanirtä ruranqayki diosnikikunata mañakuyankitsu?
¿Imanirtä tsaykuna yanapayäshunkitsu?
Judá runakuna, markaykikuna atska kayanqannömi rurayanqayki diosnikikunapis atska kaykäyan.†
29 “Noqa Tayta Diosmi nï:
Manami noqatsu qamkunapa contrayki shärishqä, sinöqa qamkunami conträ shäriyashqayki.
Tsaynö kaykaptinqa ¿imanirtä conträ parlaykäyanki?
30 Tsurikikunata castigaptïpis manami cäsukuyantsu.
Kachamunqä profëtakunatapis león atacaqnörämi espädawan wanutsiyashqayki.†
31 “¡Israel runakuna, noqa Tayta Dios imata ninqätapis shumaq tantiyakuyay!
Qamkunapäqa ¿tsunyaq jirkanöku kashqä?
¿Tsakaykaq paqasnöku kashqä?
Llapanchöpis yanapaykaptïqa ¿imanirtä witikuykäyanki?
¿Imanirtä niyämanki manana yärakayämänaykipä kanqanta?
32 Adornunkunata ¿jipash qonqaykunmantsurä?
Majatsakänanpä jatikunqan latsapanta ¿qonqaykunmantsurä?
Qamkunami itsanqa qonqaykayämashqayki.
33 “Waynata tariyänaykipäqa cösami yarpachakuyanki.c
Mañösa warmikunapis qamkunapitami yachakuyashqa.
34 Jutsaynaq muchuqkunata wanutsiyaptikimi latsapaykikunapis yawarllana kaykan.
Jutsata mana ruraykäyaptinmi tsay runakunata wanutsiyashqayki.
35 Tsaynö ruraykarpis nikäyankirämi:
‘Noqakunaqa jutsaynaqmi kaykäyä.
Tayta Diospis noqakunawan manami rabyashqatsu kaykan’.
Tsaynö niyaptikipis llapan jutsaykikunapitami juzgayäshayki.
36 “¿Imanirtä shumaq mana yarpachakur llutalla juklä nacionkunaman yärakuykanki?
Tsay nacionkunamanqa wallällami yärakuykäyanki.
Asiria nación engañayäshunqaykinöllami Egipto nacionpis engañayäshunki.
37 Egiptuman yärakuyanqaykipitami pasaypa llakikuyanki.
Yärakuyanqayki nacionkunata kacharishqa kaptïmi tsay nacionkunaman wallälla yärakuyanki”.