Judá nacionpa mandaqnin reypä Tayta Dios ninqan
22
Tayta Diosmi nimarqan: “Ayway Judá nacionpa mandaqnin reypa palaciunman. Tsaycho willakur ninki: 2 Davidpa trönuncho jamaraykaq Judá nacionpa mandaqnin rey, Tayta Dios nishunqaykita wiyakuy. Tsaynölla autoridäkuna y kay markacho taq llapan runakunapis payta wiyakuyätsun. 3 Tayta Diosmi nin: ‘Shumaq juzgarnin jutsaynaq runakunapa janan shäriyay. Jukpa makincho ñakaykaqkunata jipiyay. Jäpa runakunata, waktsakunata y viüdakunatapis ama ñakatsiyaytsu. Alli runakunata ama wanutsiyaytsu.4 “ ‘Kanan nikanqäta wiyayämaptikiqa Davidpa trönunman jamaykur mandananpä imaypis rey kanqami. Tsaymi palaciu punkupapis yaykayämunqa carrëtankunawan y cawallunkuna muntashqa. Paykunawanmi yanapaqninkunapis y marka runakunapis yaykayämunqa. 5 Kanan nikanqäta mana wiyayämaptikimi itsanqa kikïpa jutïcho jurä kay palaciupis raqällana rikakunanpä kanqanta. Noqa Tayta Diosmi tsaynö nï’ ”.
Rey tanqan palaciuta ushakätsiyänanpä Tayta Dios ninqan
6 Judá runakunapa mandaqnin rey tanqan palaciupämi Tayta Dios nin:
“Noqapäqa Galaad jirkanö y atska muntiyuq Líbanunömi kay palaciu kuyayllapä kaykan.
Tsaynö kaptinpis pasaypa tsunyaqman tikratsiptïmi pipis tsaycho tanqanatsu.
7 Ushakätsiyänanpämi armashqa runakunata kachamushä.
Paykunami palaciucho kaykaq kuyayllapä jatusaq cedru qerukunatapis mutuskir rupatsiyanqa.
8 “Tsaynö ushakätsiyaptinmi kay marka ñöpanpa päsaq runakuna kikinkunapura parlar niyanqa: ‘Kay jatunkaray markata ¿imanirrä Tayta Dios ushakaykatsishqa?’ 9 Tsaymi niyanqa: ‘Tayta Diosninkunawan pactu rurayanqantami cumpliyashqatsu. Tsaypa trokinqa jäpa runakuna adorayanqan dioskunatami adorayashqa. Tsaymi paykunata tsaynö castigashqa’ ”.
Rey Salum imanö kananpäpis Jeremías willakunqan
10 Judá runakuna, rey Josías wanunqanpita ama waqayaytsu.
Tsaypa trokinqa tsurin Salumpäa waqayay.
Paytami prësu apakuyashqa imaypis manana kutimunanpä.
Yurinqan markatapis manami rikanqanatsu.
11 Judá nacionpa mandaqnin rey Josíaspa tsurin Salumtami taytanpa trokin rey kaptin prësu apakuyarqan. Paypämi Tayta Dios nin: “Manami imaypis kutimunqanatsu. 12 Payqa wanunqa prësu apayanqan nacionllachönami. Kay naciontaqa manami imaypis rikanqanatsu”.
Rey Joacim imanö kananpäpis Jeremías willakunqan
13 “¡Ay, imanörä kanki, rey Joacim!
Qamqa palaciuykita arutsir runakunata mana pägaypami arutsishqayki.
14 Jatusaq sälayuq y ventänayuq palaciuta ruratsinaykipämi yarpachakushqayki.
Tsay palaciu cedru tablakunawan entablashqa y pukawan pintashqa kananpämi yarpachakushqayki.
15 “¿Cedru tablawan entablashqa wayiyuq kanqallaykipitaku alli rey kanqaykita yarpanki?
Taytaykiqa alli reymi kashqa.
Payqa mikunanpä y upunanpä tarinqallanwanmi contentakushqa.
Pïmaytapis alli rikarmi bendicionta chaskishqa.
16 Waktsakunapapis y ñakaqkunapapis janan kaptinmi llapan ruranqanpis alli kashqa.
Tsaynö kawaqkunaqa noqata reqiyämanmi.
Noqa Tayta Diosmi tsaynö nï.
17 “Qamqa imapäpis ayrajashqami kaykanki.
Jutsaynaq runakunatami wanuykätsinki.
Marka mayikikunatapis pasaypami ñakaykätsinki”.
18 Tsaymi Judá nacionpa mandaqnin rey Josíaspa tsurin Joacimpä† Tayta Dios nin: “Joacim wanuptinqa manami pipis waqanqatsu: ‘¡Ay wawqillä wawqi! ¡Ay taytallä tayta! ¡Ay mandaqllä!’ nir. 19 Jerusalénpita qarachashqa aparmi ashnutanö pampaykuyanqa”.
Jerusalén runakunata desgracia päsananpä ninqan
20 Jerusalén runakuna, yanapayäshunaykipä minkakuyanqayki nacionkuna llapanmi ushakäyashqa.b
Tsaynö kaykaptinqa llakikurnin Líbanucho kaykaq jirkakunaman witsaykur waqayay.
Basán jirkakunamanpis aywaykur waqayay.
Abarim jirkakunachöpis qayarar waqayay.
21 Manarä imapis kaptinmi desgracia kananpä kaqta willarqä.
Willaptïmi niyämarqayki mana cäsukayämänaykipä kanqanta.
Qamkunaqa unaypita patsami wiyakayämashqaykitsu.
22 Tsaymi castigaptï mandashuqnikikunatapis shukukuy apaqnö prësu apakuyanqa.
Yanapayäshunaykipä minkakuyanqayki nacionkunapa mandaqninkunatapis prësumi apakuyanqa.
Tsayrämi mana wiyakamaypa jutsa rurayanqaykipita penqakuyanki.
23 Líbanucho kaykaq jatusaq cedru jachacho qeshunta ruraq pishqunö karmi imapis mana päsayäshunaykipä kanqanta yarpaykäyanki.
Tsaynö kaptinpis desgracia chämuptin wachay nanaywan qayaraq warminömi qayaräyanki.
Rey Conías imanö kananpäpis willakunqan
24 Tayta Diosmi nin: “Judá nacionpa mandaqnin Joacimpa tsurin rey Conías,c derëcha kaq makïcho jatiranqä sellakunä sortïjänö kaptikipis kaypita qarqushaykimi. Noqa Tayta Diosmi tsaynö qarqunäpä jurä. 25 Wanutsiyäshunaykipämi pasaypa mantsanqayki Babilonia nacionpa mandaqnin rey Nabucodonosorpa makinman y soldädunkunapa makinman entregashayki. 26 Mamaykitawanmi mana yuriyanqayki nacionman prësu apatsishayki. Tsaychömi wanuyanki. 27 Yurinqayki nacionman mayjina kutimuyta munarpis manami kutiyämunkinatsu”.
28 Coníasqa manami pakishqa kanallanötsu.
Manami pakishqa mankanötsu imapäpis mana väliq kaykan.
Alli runa kaykaptinqa ¿imanirtä mana väliqtanö Tayta Dios rikanqa?
¿Imanirtä llapan tsurinkunatawan jäpa nacionman qarqunqa?
29 ¡Allaw, kay patsacho kaykaq runakuna!
¡Tayta Dios ninqanta wiyayay!
30 Tayta Diosmi nin: “Coníastaqa desgraciallami päsanqa. Paypita aywaraq kaqqa manami mayqanpis David jamaranqan trönuncho jamaranqatsu ni Judácho rey kanqatsu. Tsaymi tsuriynaqnölla wanunqa. Tsay ninqänö rasunpaypami kanqa”.