Wakin Israel runakunalla salvakuyanqan
11
Israel runakunata ¿Tayta Dios kachariykushqatsurä? ¡Manami! Noqapis Abraham casta karmi Benjamín trïbupita Israel runa kä.† 2 Israel runakunata Tayta Dios manami kacharishqatsu. Paykunataqa unaypita patsami akrashqa kuyanqan runakuna kayänanpä. ¿Manaku musyayanki Tayta Diospa palabran Elíaspä imata ninqantapis? Israel mayinkunata acusarmi Tayta Diosta mañakurnin Elías nirqan: 3 “Tayta Dios, llapan profëtaykikunatami wanutsiyashqa. Altarnikikunatapis juchutsirmi ushayashqa. Japallänami kawaykar quëdashqä. Kananqa noqatapis wanutsiyämänanpänami ashiykäyäman”.†4 Elías tsaynö niptinmi Tayta Dios nirqan: “Manami yarpanqaykinötsu kaykan. Qanchis waranqa (7,000) runakunatami akrashqä Baalta imaypis mana adorayänanpä”.†
5 Elías kawanqan witsannöllami kananpis wakin Israel runakuna Tayta Diosta sirviykäyan. Tsaynö sirviykäyan Tayta Dios paykunata kuyapar akranqanpitami. 6 Manami imatapis allita rurayanqanpitatsu akrarqan, tsaypa trokinqa jutsayuq kaptinpis kuyakuq karmi akrarqan. Imatapis allita rurayanqanpita akrarqa manami kuyakuq kartsu akranman karqan.
7 Tsaymi akranqan kaq Israel runakunalla salvacionta tariyan. Wakin kaq Israel runakunaqa salvacionta ashirpis manami tariyantsu. Paykunapa shonqunkunatami Tayta Dios chukruyätsirqan willakuyninta mana cäsukuyänanpä. 8 Tayta Diospa palabranchöpis kaynömi qellqaraykan:
“Pasaypa mana tantiyakuq kayänanpämi Tayta Dios upayätsishqa.
Tsaymi kananyaqpis paykunaqa rikaykarpis mana rikaqnö kaykäyan
y wiyaykarpis mana wiyaqnö kaykäyan”.†
9 Tsaynö kaqkunapämi rey Davidpis Tayta Diosta mañakur nirqan:
“Banquëtita mikuyanqanpis paykunapä imayka trampanö kaykullätsun.
Bendicionnikita churamunaykipa trokin castigaykullay.
10 Paykunapa ñawinkunapis qaprayätsun.
Imaypis mana derechakäyänanpä waqtankunapis kurkuyätsun”.†
Mana Israel runakunapis salvakuyanqan
11 Israel runakunaqa ¿manatsurä imaypis Jesucristuman criyikuyanqa? ¡Awmi, criyikuyanqami! Mana Israel runakunata Tayta Dios salvaykaqta rikarmi Israel runakunapis Jesucristuman criyikuyänanpä tantiyakuyanqa. 12 Tsaynö kaptinpis Jesucristuman mana criyikuyaptinmi mana Israel runakunana Jesucristuman criyikur salvakuykäyan. Paykuna salvakuyanqan kushikuypä kaptinpis Israel runakuna salvakuyaptinqa masrämi kushikuypä kanqa.
13 Mana Israel runakuna, shumaq tantiyakuyay. Tayta Diosmi churamashqa apostolnin kar mana Israel runakunaman imaykanöpapis alli willakuyninta apanäpä. 14 Tsaynö willakü mana Israel runakuna salvakuqta rikar Israel mayïkuna wakillanpis Jesucristuman criyikur salvakuyänanpämi. 15 Israel runakuna Jesucristuman mana criyikuyaptinpis mana Israel runakunaqa maytsaychömi criyikuykäyan. Paykunapis salvashqa karmi wanushqanö kayanqanpita kawarimushqanöna kaykäyan.
Mana Israel runakuna mana alabakuyänanpä yätsinqan
16 Mäsapita rakiskir primiciata Tayta Diospä apaptinmi llapan mäsapis sagrädu kaykan. Tsaynöllami jachapa michina sagrädu kaptinqa llimllankunapis sagrädu kaykan. 17 Israel runakunapis sagrädu kaykarmi Jesucristuman mana criyikur olïvu jachapita mutushqanö kaykäyan. Qamkunaqa olïvu jachaman injertashqanönami kaykäyanki. Tsaymi lluta olïvupa llimllankunanö kaykarpis tsay alli olïvu jachapa jawanpita salvacionta chaskiykäyanki.b
18 Olïvu jachaman injertashqanö kaykarqa ama alabakuyaytsu Israel runakunapita mas väliq kayanqaykita. Manami llimllatsu jachata kawayta qaran, sinöqa michinmi. 19 Capazchi qamkuna nikäyanki: “Israel runakunaqa mutushqa llimllakunanöllami kaykäyan. Paykunata salvananpa trokinqa noqakunatanami Tayta Dios salvaykäyäman”.
20 Awmi, niyanqaykinöllami kaykan. Tsaynö kaptinpis mutushqa llimllanö kaykäyan Jesucristuman mana criyikuyanqanpitami. Qamkunaqa Jesucristuman yärakuyanqaykipitami injertashqanö kaykäyanki. Qamkunapis Tayta Diosta mana cäsukurqa paqtä mutushqa llimllanö rikakuyankiman. 21 Legïtimu olïvupa llimllannö kayaptinpis mana cäsukuq Israel runakunata Tayta Dios manami salvantsu. Paykunatapis mana salvaykarqa qamkunatapis mana cäsukuyaptikiqa manami salvayäshunkitsu.
22 Tayta Dios kuyapäkuq y castigakuq kanqanta tantiyakuyay. Mana cäsukuqkunataqa castiganmi. Cäsukuqkunatami itsanqa kuyaparnin salvan. Kuyapäyäshurnikipis mana cäsukuyaptikiqa qamkunatapis llimllatanömi muturiyäshunki. 23 Tsaynöllami Israel runakuna Jesucristuman criyikuyaptinqa jachaman injertashqa llimllanö kayänanpä Tayta Dios kuyapar salvanqa. Payqa munayyuqmi kaykan jachaman yapay injertananpäpis.
24 Mana Israel runa karmi qamkunaqa lluta olïvupa llimllannö kaykäyanki. Tsaynö kayaptikipis Jesucristuman criyikuyaptikimi Tayta Dios salvayäshushqayki. Israel runakuna legïtimu olïvupa llimllannö kaykäyaptinqa Jesucristuman criyikuyaptin paykunatapis salvanqami.
Israel runakunapis salvakuyänanpä ninqan
25 Wawqikuna panikuna, mana alabakuyänaykipämi runakuna mana musyayanqanta kanan willashayki. Wakin Israel runakuna kanan chukru shonqu karpis manami tsaynöllatsu kayanqa. Paykuna tsaynö kayanqa mana Israel runakunapita Tayta Dios akranqankunata salvanqanyaqllami. 26 Tsaypitanami llapan Israel runakunapis salvakuyanqa. Tayta Diospa palabranchöpis kaynömi qellqaraykan:
“Salvakuqmi Siónpita shamunqa.
Jacobpita aywaraqkunatami jutsankunata kachariyänanpä tantiyatsinqa.†
27 Jutsankunata perdonarmi paykunawan pactuta rurashä”.†
28 Tsaynö kaptinpis kananqa Israel runakuna Jesucristupa alli willakuyninta manami chaskikuyta munayantsu. Tayta Diospa contran kayaptinmi paykunapa trokin qamkunatana salvayäshunki. Tayta Diospa contran kanan kayaptinpis Abrahamta, Isaacta y Jacobta awninqanta cumplirmi Israel runakunata imaypis kuyan. 29 Tayta Dios imatapis awnirqa cumplinmi. Pitapis salvananpä akrarqa imaypis salvanmi.
30 Ñöpataqa Tayta Diosta manami cäsukuyarqaykitsu. Kananqa Israel runakunanami cäsukuyantsu. Tsaymi paykunapa trokin Tayta Dios qamkunatana kuyapaykäyäshunki. 31 Tsaynö kuyapaykäyäshunki Israel runakuna tantiyakuyaptin Tayta Dios kuyapar salvananpämi. 32 Tsaymi juk tiempucho Israel runakuna mana wiyakuq kayänanpä yarpayninkunata Tayta Dios pantakätsirqan y juk tiempuchönami mana Israel runakunapis mana wiyakuq kayänanpä yarpayninkunata pantakätsirqan. Tsaymi Israel runakunatapis y mana Israel runakunatapis kuyapäkuq kar salvan.
33 ¡Tayta Dios pasaypa yachaq y tantiyaqmi kaykan!
¡Pay yarpanqankunata y ruranqankunata manami pipis tantiyayta kamäpakuntsu!†
34 Tayta Dios yarpanqankunata ¿pillaqa musyantsurä?
Yachaq kananpä ¿pillaqa payta yachatsintsurä?†
35 Diosta mandananpä ¿pirä munayyuq kanman?†
36 Llapantapis Tayta Diosmi kamashqa.
Pay munaptinmi llapan imaykapis kaykan.
Llapanpis payllapami kaykan.†
¡Imayyaqpis Tayta Dios alabashqa kaykullätsun!
Amén.