10
Wawqikuna panikuna, Israel mayïkuna salvakuyänanpämi llapan shonqüwan Tayta Diosta rugakü. 2 Paykuna Tayta Diosta cäsukuyta munarpis manami tantiyayantsu 3 imanö perdonamanqantsikta. Tsaymi yarpäyan Diospa leyninkunata cumplirrä perdonashqa kayänanpä kanqanta. Perdonashqa kayta munarpis manami Jesucristuman yärakuyantsu. 4 Jesucristo shamushqana kaptin manami Diospa leyninkunata cumplirtsu perdonashqa kaykantsik, tsaypa trokinqa Jesucristuman yärakurmi. Payman yärakuq kaqtaqa llapantami Tayta Dios perdonan.5 Leykunata cumplirrä Tayta Dios munanqannö kawayta munaqkunapämi Moisés qellqarqan: “Leynïkunata cumpliq kaq runaqa llapantami cumplinman”.†
6 Jesucristuman yärakurrä perdonashqa kanqantsikta tantiyarmi nintsik: “Shonquntsikcho ama yarpäshuntsu:† ‘¿Pirä ciëluman witsanman?’ ”
(Tsay ninqannöllami Jesucristuta kay patsaman pushamunanpä pipis ciëlumanrätsu aywanman.)
7 “Tsaynöpis ama yarpäshuntsu: ‘¿Pirä patsa rurinman yaykuykunman?’ ”
(Tsay ninqannöllami pipis willakuyninta musyayta munar Jesucristuta kawatsimunanpä patsa rurinmanrätsu yaykunman.)
8 Tsaypa trokinqa kaynömi nintsik: “Tayta Diospa willakuynin shimikikunacho y shonquykikunachömi kaykan”.†
Tsaymi willakuyninta willakur nintsik: 9 Señornintsik Jesucristo mandashuqniki kanqanta nirqa y wanunqanpita Tayta Dios kawatsimunqanta llapan shonquykikunawan criyirqa salvashqami kayanki. 10 Llapan shonquykiwan criyiyaptikiqa Tayta Dios perdonayäshunkimi. “Señor Jesucristuqa ämümi kaykan” niyaptikiqa Tayta Dios salvayäshunkimi. 11 Tayta Diospa palabran kaynömi nin: “Pipis payman yärakuq kaqqa manami manakaqllapätsu yärakunqa”.†
12 Tsaymi Israel runatapis mana Israel runatapis yärakuptinqa Tayta Dios perdonan. Llapantsikpapis japallan Diosnintsik karmi mañakuq kaqtaqa pïmaytapis salvan. 13 Tayta Diosmi palabrancho nin: “Noqata mañakamaq kaqtaqa pïmaytapis salvashämi”.†
14 ¿Imanörä salvananpä mañakuyanqa Jesucristo salvamaqnintsik kanqanta manarä yärakurqa? ¿Imanörä yärakuyanqa willakuyninta manarä wiyarqa? ¿Imanörä wiyayanqa pipis mana willaptinqa? 15 ¿Imanörä willanqa willakunanpä pipis mana kachaptinqa? Tayta Diospa palabranchöpis kaynömi qellqaraykan: “Alli willakuyta apamuqkunami pasaypa kushikuypä kaykäyan”.†
16 Itsanqa willakuyaptinpis manami llapan runakunatsu Jesucristupa alli willakuyninta cäsukuyan. Isaías qellqanqanchöpis kaynömi nin: “Tayta Dios, willakuyanqäta ¿pirä criyishqa?”†
17 Imanö kaptinpis Jesucristupa alli willakuynintaa wiyarrämi payman pipis yärakun.
18 Tsaynö kaptinpis ¿manatsurä willakuyninta Israel runakuna wiyayashqa? Paykuna unaynami wiyayashqa. Tayta Diospa palabranchöpis kaynömi nin:
“Willakuyninqa maytsaychömi musyakaykan.
Palabrankunaqa patsa kuchunyaqmi chan”.†
19 Tsay willanqankunata musyaykarpis ¿manatsurä Israel runakuna tantiyayashqa? Paykunaqa tantiyayarqanmib. Moiséspis qellqarmi nirqan: “Juklä marka runakunatana yanaparmi qamkunata ajanätsishayki. Mana tantiyakuq runakunata chaskirmi qamkunata llakikatsishayki”.†
20 Tsaynöllami Isaíaspis qellqar nirqan: “Mana ashimaqkunatami parlapashqä. Mana rugakamaq runakunatami yanapashqä”.†
21 Israel runakunapämi itsanqa qellqar nirqan: “Mana cäsukamaq runakunamanmi qoyay qoyay makïta makyarashqä”.†