Tayta Diosta sirvinantsikpä churamanqantsik
12
Wawqikuna panikuna, qamkunatami rugä Tayta Diospa munayninman kawaynikikunata churayänaykipä. Pay kuyapaykäyäshuptikiqa kawaykaq santu sacrificiu kaykuyällay. Tsaynö karmi Tayta Dios munanqannö rasunpaypa sirviyanki. 2 Wakin runakuna jutsata rurayaptinpis qamkunaqa jutsata ama rurayaytsu. Yarpaynikikunapis ñöpata kanqannöqa ama katsuntsu, sinöqa Tayta Dios munanqannöna katsun. Tsaynö kawarmi tantiyayanki pay munanqannö kaway kushikuypä kanqanta.3 Tayta Dios kuyamarmi willakuqnin kanäpä churamashqa. Tsaymi llapaykita nï: Wakin kaqpita mas väliq kayanqaykita ama yarpäyaytsu. Payman yärakunantsikpä Tayta Dios yanapaykämashqaqa llapantsikpis välinqantsikta tantiyakushun. 4 Cuerpuntsikcho atska partintsikkuna karpis juk cuerpullachömi kaykan. Tsaynö karpis manami tsay rurayllatatsu rurayan. 5 Tsaynöllami Jesucristuman criyikuqkuna atskaq karpis juk cuerpunölla kantsik.†
6 Tsaynö kashqami Tayta Dios juknintsik juknintsikta churamantsik pay munanqannö sirvinantsikpä. Profëta kanantsikpä churamashqaqa payman yärakur willakuyninta willakushun. 7 Yanapanantsikpä churamashqaqa yanapashun. Yachatsinantsikpä churamashqaqa yachatsishun. 8 Shakyätsinantsikpä churamashqaqa shakyätsishun. Imatapis qaranantsikpä churamashqaqa alli shonquntsikwan qarashun. Mandanantsikpä churamashqaqa shumaq yarpachakuykur mandashun. Kuyapäkuq kanantsikpä churamashqaqa kushishqa pitapis yanapashun.†
Imanö kawanantsikpäpis yätsinqan
9 Janan shonqulla kuyanakuyänaykipa trokinqa llapan shonquykikunawan kuyanakuyay.
Llutankunata rurayänaykipä ama yarpayllapis yarpäyaytsu. Tsaypa trokinqa allita rurar kawayay.
10 Castaykikunawan kuyanakuyanqaykinö kuyanakuyay. Tsaynöpis jukniki jukniki respitanakuyay. Kikillaykikuna alli kawayänaykipä yarpachakuyänaykipa trokinqa wakinkunapis alli kawayänanpä yarpachakuyay.
11 Ama qela kayaytsu, tsaypa trokinqa kushi kushilla Tayta Diosta sirviyay.
12 Tayta Diosta shuyar kushishqalla kawayay.
Imanö ñakarpis payman yärakuyay.
Imaypis payta mañakuyay.
13 Jesucristuman yärakuq mayikita imaynaqta rikarqa yanapayay. Wayikikunaman chäyämuptinpis patsatsiyay.†
14 Chikishuqnikipa wasanta ama rimayaytsu. Tsaypa trokinqa Tayta Dios yanapananpä mañakuyay.†
15 Kushishqa kaqkunawan kushikuyay. Waqaq kaqkunawan waqayay.
16 Jukniki juknikipis alli kawayay. Runa tukuyänaykipa trokinqa qollmi shonqu kaqkunawanpis kuyanakur kawayay. Ama yachaq tukuyaytsu.†
17 Chikiyäshuptikipis ama chikiyaytsu. Tsaypa trokinqa pïmaypis rikananpä allita rurar kawayay. 18 Imaykanöpapis llapan runakunawan alli kawayay.
19 Kuyay wawqikuna panikuna, chikishuqnikikunapa contran ama venganzata ashiyaytsu. Tsaypa trokinqa Tayta Dios juzgananpä paypa munayninman churaykuyay. Tayta Diospa palabranchöpis kaynömi qellqaraykan: “Llutanta rurayanqanpita kikïmi juzgashä”.†
20 Mastami nin:
“Chikishuqniki mallaqaptinqa mikuyta qaraykuy.
Yakunaptinqa yakuta makyaykuy.
Tsaynö ruranqaykipitami pasaypa penqakunqa”.†
21 Runakuna llutanta rurayaptinpis qamkunaqa allillata rurayay.