Autoridäkunata cäsukunantsikpä yätsinqan
13
Llapan autoridäkunata Tayta Dios churashqa kaykaptinqa paykunata cäsukuyay. 2 Autoridäkunata mana cäsukurqa Tayta Diostapis manami cäsukuyantsu. Autoridäkunata mana cäsukuq kaqtaqa Tayta Diosmi juzganqa.3 Autoridäkunata cäsukuqkunaqa manami mantsapakurtsu puriyan. Mana cäsukuqkunami itsanqa mantsapakur puriyan. Tsaynö mana puriyänaykipä autoridäkunata cäsukuyay. Cäsukuyaptikiqa paykuna allimi rikayäshunki.
4 Llutanta rurashqaqa autoridäkunami castigamäshun. Paykunataqa Tayta Diosmi churashqa alli ruraqkunapa janan shäriyänanpä y llutan ruraqkunata castigayänanpä. Manami manakaqllapätsu autoridä kaykäyan. 5 Tsaynö kaptinqa autoridäkuna ninqankunata cäsukushun. Manami castigamänantsikpä kanqallanpitatsu cäsukushun, tsaypa trokinqa Tayta Diosta respitarmi.
6 Runakunata yanaparqa Tayta Diostami autoridäkuna sirviyan. Paykunata Tayta Dios churashqa kaykaptinqa impuestukunatapis pägashun. 7 Cumpliyänaykipä kaqkunata llapanta cumpliyay. Impuestuta pägayänayki kaptinqa pägayay. Pitapis respitayänayki kaptinqa respitayay. Pitapis alabayänayki kaptinqa alabayay.†
Kuyanakunantsikpä ninqan
8 Pipapis jaqan karqa pägayay. Jaqa kaynikita pägayänaykipä yarpachakuyanqaykinölla kuyanakuyänaykipäpis yarpachakuyay. Runa mayintsikta kuyarqa Tayta Diospa llapan leyninkunatami cumplintsik. 9 Tsay leykunachömi nin:
“Ama majaykita qanratankitsu.†
Ama runa mayikita wanutsinkitsu.†
Ama suwakunkitsu.†
[Ama manakaqkunata pitapis tumpankitsu.]†
Ama runa mayikipa imaykankunatapis munapankitsu”.†
“Kikiki kuyakunqaykinö runa mayikita kuyanki” ninqan mandamientuta cumplirqa llapan mandamientukunatami cumpliykantsik.† 10 Runa mayintsikta kuyarqa manami contran shärintsiktsu. Tsaynöpami Tayta Diospa llapan leyninkunata cumplintsik.
Jutsa ruraykunata kacharinantsikpä ninqan
11 Jesucristo kutimur salvamänantsikpä kaq junaq cercachönami kaykan. Tsaynö kaykaptinqa punukashqanö kanqantsikpita rikchashun. 12 Patsa waränanpänöna kaykaptinqa jutsa ruraykunata kacharir Tayta Dios munanqannö kawanantsikpä shumaq yarpachakushun. Tsakäpakushqanö kawanantsikpa trokinqa aktsichönöna kawashun. Espädan kamarikushqa soldädunö noqantsikpis kaykäshun.
13 Aktsichönö kawaykarqa jutsata mana ruraypana kawashun. Wakin runakuna qorikaykur mikur upyar kakuyaptinpis noqantsikqa ama tsaynö kashuntsu. Tsaynöpis majantsikta ama qanratäshuntsu ni majaynaq karpis jukwan jukwan purikushuntsu. Ama qayapänakushuntsu ni chikinakushuntsu. 14 Tsaypa trokinqa qanra latsapata jipikur jaqiyanqaykinö jutsaykikunata kacharir Jesucristupa makincho kawayay. Llutanta rurayta munarpis ama rurayaytsu.