Mana jamuränantsikpä yachatsinqan
14
Jesucristuman yärakuq mayintsikkuna shumaq mana tantiyayaptinpis ama jamuräyaytsu. Tantiyayanqaykinö mana tantiyayaptinpis paykunawan ama rimanakuyaytsu. 2 Wakinmi yarpäyan aytsata mikur jutsata mana rurayanqanta y wakinnami yarpäyan aytsata mikur jutsata rurayanqanta.a 3 Aytsata mikuqkunapis Tayta Diospa wamranmi kaykäyan. Tsaynö kaptinqa aytsata mana mikuq kaqqa ama jamurätsuntsu aytsata mikuq kaqta. Aytsata mikuq kaqpis ama jamurätsuntsu aytsata mana mikuq kaqta. 4 Qam ¿pitä kanki Jesucristupa sirviqninta juzganaykipä? Jutsata ruraptinqa patronnin Jesucristumi juzganqa. Imanö kaptinpis jutsata mana rurananpä Jesucristumi yanapan.5 Tsaynöllami wakin yärakuq mayintsikkuna yarpäyan Tayta Diosta alabanantsikpä reqishqa junaqlla qorikänantsikpä kanqanta. Wakinnami yarpäyan Diosta alabanantsikpä llapan junaqpis alli kanqanta. Reqishqa junaq qorikarpis o wakin junaq qorikarpis shumaq yarpachakuyay mayqan junaq qorikäyänaykipä kanqanta. 6 Qorikaykur Tayta Diosta alabayänaykipä juk junaq mas alli kanqanta yarpaq runapis Tayta Diosta cäsukuyta munarmi tsaynö yarpan. [Diosta alabayänaykipä llapan junaq alli kanqanta yarpaq runapis Tayta Diosta cäsukuyta munarmi tsaynö yarpan.] Aytsata mikuq runapis Tayta Diosta agradëcikurmi paypa jutincho mikun. Aytsata mana mikuq runapis Tayta Diosta agradëcikurmi paypa jutincho mikun.†
7 Manami kikillantsikpätsu kawantsik y manami kikillantsikpätsu wanuntsik. 8 Kawarpis Tayta Diospämi kawantsik. Wanurpis Tayta Diospämi wanushun. Kawarpis wanurpis Jesucristupa makinchömi kaykantsik. 9 Kawaqkunapa y wanuqkunapa Señornin kananpämi Jesucristo wanushqa y wanunqanpita kawarimushqa. 10 Llapantsikpis paypa munaynincho kaykarqa ¿imanirtä criyikuq mayintsikkunata juzgayanki? Tayta Diospa ñöpanmanb chashqami llapantsikta juzgamäshun.† 11 Tayta Diospa palabranchöpis kaynömi qellqaraykan:
“Noqa Tayta Diosmi jurar nï:
Llapanpis ñöpämanmi qonqurikayämunqa.
Llapanpis cäsukayämänanpämi niyämanqa”.†
12 Tsaynö kaptinqa llapantsiktami Tayta Dios cuentata mañamäshun.
Yärakuq mayintsikta jutsata mana ruratsinantsikpä ninqan
13 Tayta Dios juzgamänantsikpä kaykaptinqa yärakuq mayintsikkunawan ama juzganakushunnatsu. Yärakuq mayintsik imatapis ruranqantsikta rikar yärakuyninta kacharinanpä kaptinqa tsayta ama rurashuntsu. 14 Jesucristo discïpulunkunata yachatsishqa kaptinmi† llapan mikuypis aytsapis alli kanqanta musyä. Tsaynö kaptinpis wakin yärakuq mayintsikkuna mana tantiyarmi aytsata mikur jutsata rurayanqanta yarpäyan. Tsaynö yarparqa aytsata mikurmi jutsata rurayan. 15 Yärakuq mayiki llakikuyänanpä kanqanta musyaykar aytsata mikurqa manami paykunata kuyaykäyankitsu. Paykunatapis salvananpä Jesucristo wanushqa kaykaptinqa aytsata ama mikuyaytsu. Mikuqta rikayäshurnikimi Jesucristuman yärakuyanqanatsu. 16 Tsaynöpis yärakuq mayiki contrayki rimananpä kaptinqa aytsata ama mikuyaytsu.
17 Tayta Diospa mandakuynincho kawayqa manami munanqantsikta mikunantsikpätsu ni upunantsikpätsu, tsaypa trokinqa allita ruranantsikpä, pïmaywanpis alli kawanantsikpä y Espíritu Santu yanapamashqa kushishqa kawanantsikpämi. 18 Jesucristuta sirvir tsaynö kawarqa Tayta Dios munanqannömi kawaykantsik. Tsaynö kawashqaqa manami pipis jamurämäshuntsu. 19 Tsaynö kaptinqa shumaq yarpachakushun yärakuq mayintsikkunawan alli kawanantsikpä y shakyätsinakur Tayta Dios munanqannö kawanantsikpä.
20 Tayta Dios kamanqan llapan mikuy alli kaptinpis salvanqan kaqkuna yärakuyninta kacharinanpä kaptinqa tsay mikuyta ama mikuyaytsu. Mikurqa mana allitami rurayanki. 21 Yärakuq mayintsik [llakikuyänanpä] o yärakuyninta kachariyänanpä kaptinqa aytsatapis ama mikuyaytsu ni vïnutapis ama upuyaytsu. Tsaynölla imapis jutsa kanqanta yarpäyaptinqa ama rurayaytsu.
22 Imatapis mikur jutsata mana rurayanqaykita tantiyarqa mana willakuyllapa shonqullaykikunacho tsararäyay. Mikuyänaykipä alli kanqanta tantiyarqa kushishqami kayanki. 23 Aytsapis o ima mikuypis mana alli kanqanta yarparqa ama mikuyaytsu. Mana alli kanqanta yarpaykar mikurmi jutsata rurayanki. Tsaynöllami mana alli kanqanta yarpaykar imatapis rurarqa jutsata rurayanki.