Jesucristuman yärakuq mayintsikwan alli kawanantsikpä ninqan
15
Yärakuq mayintsik shumaq mana tantiyar imallapis jutsa kanqanta yarpaptinqa tsayta ama rurashuntsu. Munanqantsikta ruranantsikpa trokinqa 2 imatapis rurashun yärakuq mayintsikkuna Tayta Dios munanqannö kawayänanpä. 3 Jesucristupis manami kikin munanqantatsu rurarqan. Tayta Diospa palabranchöpis kaynömi qellqaraykan: “Qamta manakaqman churashuqnikiqa noqatapis manakaqmanmi churayäman”.†4 Tayta Diospa palabranqa tantiyatsimänantsikpämi kaykan. Palabranta yachakurmi payman yärakur awninqankunata cumplinanpä kanqanta musyantsik. 5 Mana ajayaypa y mana llakikuypa yärakunantsikpämi Tayta Dios imaypis yanapaykämantsik. Tsaymi payta mañakü Jesucristo kuyamanqantsiknö jukniki juknikipis kuyanakur alli kawayänaykipä. 6 Kuyanakur kawarmi Señornintsik Jesucristupa Yayan Tayta Diosta tsay yarpaylla alabayanki.
Mana Israel runakunapäpis Diospa alli willakuynin kanqan
7 Tsaynö kaykaptinqa Jesucristo kuyamanqantsiknö yärakuq mayintsikkunawan kuyanakushun. Tsaynö kawashqami Tayta Diosta alabayanqa. 8 Yarpätsishayki: Israel runakunata salvananpämi Jesucristo shamurqan. Tsaynöpami Abrahamta, Isaacta y Jacobta awninqanta† Tayta Dios cumplirqan. 9 Tsaynöpis Jesucristo shamurqan mana Israel runakunapis kuyapäkuq kanqanpita Tayta Diosta alabayänanpämi. Tayta Diospa palabranchöpis kaynömi qellqaraykan:
“May nacioncho karpis adorashaykimi.
Llapan shonqüwan cantarmi alabashayki”.†
10 Tsaynöllami nin:
“Maytsay nacioncho taqkuna,
Tayta Dios kuyanqan runakunawan juntu kushikuyay”.†
11 Mastami nin:
“Maytsay nacioncho taqkuna,
Tayta Diosta alabashun.
Maytsaycho tarpis payta adorashun”.†
12 Profëta Isaías qellqanqanchöpis kaynömi nin:
“Isaípita aywaraqpitami juk runa yurinqa.
Maytsay nacioncho taq runakunata mandananpämi shamunqa.
Mana Israel runakunapis paymanmi yärakuyanqa”.†
13 Tayta Dios yanapaykuyälläshuy payman yärakur jukniki juknikipis alli kawayänaykipä, Espíritu Santupa munaynincho kawayänaykipä y ñöpanman chäyänaykipä kanqanta musyar qoyay qoyay kushishqa kawayänaykipäpis.
Maytsaypapis Pablo willakur purinqan
14 Wawqikuna panikuna, musyämi alli shonqu kayanqaykita, Tayta Diospa willakuyninta yachakuyanqaykita y wakintapis tantiyatsiyänaykipä alli yachayanqaykita. 15 Tsaynö kayaptikipis kay cartawanmi qamkunata yarpaykätsimü yachakuyanqaykita mana qonqäyänaykipä. Tsaynö nï Tayta Dios kuyapämar 16 Jesucristupa alli willakuyninta mana Israel runakunata willanäpä churamashqa kaptinmi. Tsaymi willakuykä mana Israel runakunapis Espíritu Santu yanapaptin Tayta Diospä alli sacrificiu kayänanpä.
17 Willakunäpä Jesucristo yanapamaptinmi kushikü. 18 Alabakunäpa trokin pay yanapamanqallantami maytsaychöpis parlashä. Yanapamaptinmi willakuyninta willakuykä y runakuna rikayänanpämi alli kawaykä. Tsaymi mana Israel runakunapis Tayta Diosta cäsukuyan. 19 Espíritu Santupa munayninwan milagrukunata rurarmi Jerusalénpita qallaykur hasta Ilírico provinciayaq Jesucristupa willakuyninta willakushqä.
20 Willakur purirpis wakinkuna willakuyanqan markakunamanqa manami aywayta munätsu. Tsaymi pipis manarä willakunqan markakunacho Jesucristupa willakuyninta willakuykä. 21 Tayta Diospa palabranchöpis kaynömi qellqaraykan:
“Pipis mana willakunqantami musyayanqa.
Imaypis mana wiyayanqantami wiyayanqa”.†
Romaman Pablo aywayta yarpanqan
22 Maytsaypapis willakur purirmi qamkuna kaqman shamuyta kamäpakushqätsu.† 23 Kananqa kay puriykanqä markakunacho Jesucristupa willakuyninta willakushqänami. Unaypita patsa yarpanqänöllami qamkunata watukaskir 24 Españapa aywayta yarpaykä. Tsayman aywanäpä yanapayämänaykitami munä.
25 Kananqa Jerusalénparämi aywaykä yärakuq mayintsikkunapä qoriyanqan ofrendata apar. 26 Macedonia y Acaya provinciakunacho yärakuq mayintsikkunami tsay ofrendata qoriyashqa Jerusaléncho imaynaq wawqikunata y panikunata yanapayänanpä.† 27 Ofrendata qorir allitami rurayashqa. Paykunapis Jesucristupa willakuyninta Jerusalénpita qallaykur willakuyaptinmi criyiyashqa. Willakuyanqanpita kushikurmi ofrendata qoriyashqa Jerusaléncho imaynaq wawqikunaman y panikunaman apanäpä.† 28 Kay ofrendata Jerusaléncho wawqikunata y panikunata entregaskirnami Españaman aywaqnölla qamkunaman chämushä. 29 Qamkuna kaqman chämuptïmi Jesucristo yanapamäshun shakyätsinakur kushikunantsikpä.
30 Wawqikuna panikuna, Señornintsik Jesucristupa jutincho y kuyamaqnintsik Espíritu Santupa jutinchömi rugakü llapan shonquykikunawan Tayta Diosta noqapä mañakuyänaykipä. 31 Tsaynö mañakuyay Judea provinciaman chaptï mana wiyakuq runakunapita Tayta Dios tsapämänanpä. Tsaynöpis mañakuyay apanqä ofrendata Jerusaléncho wawqikuna panikuna kushishqa chaskiyänanpä. 32 Jerusaléncho llapanpis alli kananpä Tayta Dios yanapamaptinmi qamkuna kaqman chämuptï kushishqa kashun.
33 Llapaykipis alli kawayänaykipä Tayta Dios yanapaykuyälläshuy. Amén.