3 Priscilata y Aquilata winchikuynïta qoykuyällanki. Paykunami Jesucristupa willakuyninta willakur puriptï yanapayämashqa.^† 4 Paykunaqa wanuytapis mana mantsaypami yanapayämashqa. Tsaynö yanapayämanqanpitami noqapis y llapan mana Israel wawqikuna panikunapis agradëcikuyä. 5 Wayincho qorikaq yärakuq mayintsikkunatapis winchikuynïta qoykuyällanki.

Tsaynöpis kuyanakuyanqä Epenetuta winchikuynïta qoykuyällanki. Paymi Asia provinciacho llapanpita mas puntata Jesucristuman criyikurqan. 6 Panintsik Maríatapis winchikuynïta qoykuyällanki. Paymi qamkunata alli yanapayäshushqayki. 7 Tsaynöpis Israel mayïkuna Andrónicuta y Juniastapis winchikuynïta qoykuyällanki. Paykunawanmi carcelcho wichqaräyarqä. Paykunami noqapita mas puntata Jesucristuman criyikuyarqan. Apóstol mayïkunapis paykunataqa allimi respitayan.

8 Tsaynöpis winchikuynïta qoykuyällanki kuyanakuyanqä Ampliasta, 9 willakuq mayï Urbanuta y kuyanakuyanqä Estaquista. 10 Tsaynölla Apelesta winchikuynïta qoykuyällanki. Jesucristupa alli sirviqnin kaptinmi payta llapan yärakuq mayintsikkuna respitayan. Tsaynöpis winchikuynïta qoykuyällanki Aristóbulupa castankunata, 11 Israel mayï Herodiónta y Narcisupa castancho Jesucristuman yärakuqkunata. 12 Tsaynölla Trifenatawan Trifosata winchikuynïta qoykuyällanki. Tsay warmikunami Jesucristupa willakuyninta willakuqkunata alli yanapaykäyan. Tsaynölla panintsik Pérsidata winchikuynïta qoykuyällanki. Paypis Jesucristupa willakuyninta willakuqkunatami alli yanapaykan. 13 Tsaynölla kuyay wawqintsik Rufuta^† y mamantapis winchikuynïta qoykuyällanki. Payqa imayka mamänömi alli rikamashqa. 14 Tsaynölla winchikuynïta qoykuyällanki Asíncrituta, Flegontita, Hermesta, Patrobasta, Hermasta y paykunawan qorikaq wawqikunata y panikunatapis. 15 Tsaynölla winchikuynïta qoykuyällanki Filóloguta, Juliata, Nereuta, Nereupa paninta, Olimpasta y paykunawan qorikaq wawqikunata panikunatapis.

16 Jukniki juknikipis qaqllaykikunacho mutsanakur winchinakuyällay. Purinqä kinrancho wawqikuna panikunami qamkunata winchikayämushunki.

17 Wawqikuna panikuna, pipis chikinakuyänaykipä o Jesucristupa willakuyninta mana cäsukuyänaykipä willapäyäshuptiki ama chaskipäyaytsu. Tsay willakuqkunaqa llutantami yachatsiyäshunki. Paykunapitaqa witikuyanki. 18 Paykunaqa manami Jesucristo alabashqa kananta munartsu yachatsiyan, sinöqa kikinkuna alabashqa kayta munallarmi. Paykunaqa alli shimillanpami mana tantiyakuq wawqikunata panikunata llutanta criyitsiyan.

19 Tayta Diosta cäsukuyanqaykitaqa maytsaychömi yärakuq mayintsikkuna musyayan. Tsaynö kayanqaykita musyarmi noqapis kushikü. Noqa munä jutsata mana ruraypa allita rurar imaypis kawayänaykitami.^† 20 Alli kawayänaykipä yanapashuqniki Tayta Dios yanapaykuyäshuy Satanásta penqakuyman churayänaykipä. Señornintsik Jesucristo kuyapäyäshurniki imaypis yanapaykuyälläshuy.

21 Yanapamaq wawqintsik Timoteupis^† winchikayämushunkimi. Tsaynöllami Israel mayïkuna Lucio, Jasón y Sosípaterpis winchikayämushunki.

22 (Noqa Terciupis Señornintsikpa jutinchömi winchikayämü. Apóstol Pablo dictamanqannöllami kay cartata qellqamü.)

23 Tsaynöllami Gayupis^† winchikayämushunki. Paymi wayinta kamaripämashqa patsakunäpä y yärakuq mayintsikkunawan tsaycho qorikäyänäpä. Tsaynöllami kay markapa tesorërun Erastupis^† y wawqintsik Cuartupis winchikayämushunki. 24 [Señornintsik Jesucristo kuyapäyäshurniki imaypis yanapaykuyälläshuy. Amén.]

25 ¡Tayta Diosta alabaykuyällay! Paymi Jesucristupa willakuyninta willakunqänölla yanapaykäyäshunki payman yärakur munanqannö kawayänaykipä. Tsay willakuytaqa runakuna ñöpata manami musyayarqantsu. 26 Kananmi itsanqa profëtakuna qellqayanqannölla y imayyaqpis kawaq Tayta Dios ninqannölla willakuyninta maytsay nacionkunachöpis willakuyan. Tsaynö willakuyan pïmaypis Jesucristuman yärakur Tayta Dios munanqannö kawayänanpämi.

27 ¡Jesucristupa jutincho Tayta Diosta imaypis alabaykulläshun! ¡Payllami Diosqa! ¡Manami pipis paynö yachaq kantsu! Amén.