Noqa Simón Pedrumi, Jesucristupa sirviqnin y apostolnin kar, qamkunaman kay cartata cartakaykämü. Qamkunatapis Jesucristo kuyayäshurnikimi noqakunatanö salvayäshushqayki. Payqa Diosnintsikmi y salvamaqnintsikmi. 2 Qamkunapämi mañakü Tayta Diosta y Señornintsik Jesucristuta reqiynikipa kuyapäyäshunaykipä y qoyay qoyay alli kawayta qoykuyäshunaykipä.

3 Payta reqishqami munanqannö kawanantsikpä Tayta Dios munayninwan imaykanöpa yanapamantsik. Kuyapäkuq y alli ruraq karmi tsaynö kawanantsikpä qayamashqantsik. 4 Tsaynöllami imaypis yanapamänantsikpä awnimashqantsik. Tsaynö yanapamäshun jutsaynaq kanqannö noqantsikpis jutsa rurayta kacharir jutsaynaqna kanantsikpämi.

5 Tsaynö kaykaptinqa Tayta Diosman imaypis yärakuyay. Payman yärakur allita rurayay. Allita rurar palabranta yachakuyay. 6 Palabranta yachakur mana alli yarpayta vinciyay. Mana alli yarpayta vincir wanuyanqaykiyaq cäsukuyay. Cäsukur Tayta Dios munanqannö imaypis kawayay. 7 Tayta Dios munanqannö kawar juk castanölla alli rikanakuyay. Alli rikanakur pïmaywanpis kuyanakur kawayay.

8 Qoyay qoyay tsaynö kawayaptikiqa Señornintsik Jesucristuta reqiyanqayki manami manakaqllapätsu kanqa. 9 Tsaynö mana kawarqa qapra runa rikayta mana kamäpakunqannömi Tayta Dios perdonayäshunqaykitapis qonqaykuyashqayki.

10 Wawqikuna panikuna, Tayta Dios qayayäshunqaykita y akrayäshunqaykita shumaq tantiyayänaykipä imaykanöpapis pay munanqannö kawayay. Tsaynöpami jutsa rurayman imaypis ishkiyankitsu. 11 Tsaymi mandakuyninman chäyaptiki salvamaqnintsik Señor Jesucristo kushishqa chaskiyäshunki.

12 Tsaymi unayna musyashqa kayaptikipis y Diospa willakuyninta shumaq yachakushqa kayaptikipis tsaykunata imaypis yarpätsiyäshayki. 13 Kawanqäyaqqa tsaykunatami imaypis yarpätsiyäshayki. 14 Wanunäpäna kanqäta Señor Jesucristo musyatsimashqa kaptinmi 15 qamkunata yarpätsï wanuptïpis yätsinqäkunata imaypis yarpäyänaykipä.

16 Señornintsik Jesucristo munayyuq kanqanta y kutimunanpä kanqanta manami yarpaylläpitatsu yachaykätsï, tsaypa trokinqa chipipiykaqta kikï rikashqa karmi yachaykätsï. 17 Chipipiykaqman tikraptinmi gloriapita Tayta Dios nimurqan: “Paymi kuyay Tsurï. Paypitami kushishqa kaykä”. 18 Tsaynö nimunqanta kikïmi wiyashqä sagrädu jirkacho Jesucristuwan kaykar.^†

19 Tsaymi masrä tantiyantsik profëtakuna willakuyanqankuna rasunpaypa kanqanta. Tsaynö kaykaptinqa profëtakuna qellqayanqankunata shumaq cäsukuyay. Tsaykunaqa tsakaycho aktsi atsikyanqannömi. Tsaynö cäsukuyay patsa waraptin waraq lucëru shonquykikunacho atsikyanqanyaq.^a

20 Shumaq tantiyakuyay. Ama yarpäyaytsu Tayta Diospa palabranta runakuna yarpayllanpita qellqayanqanta. 21 Tayta Diospa profëtankuna manami imaypis kikinkunapa yarpayllanpitatsu qellqayarqan, sinöqa Espíritu Santu tantiyatsiptinmi Tayta Diospa yarpayninta qellqayarqan.^†