2 Paykuna yachatsiyanqanta chaskiparmi runakunapis warmikunapis jutsata rurar kawayanqa. Tsaynö kawayaptinmi Tayta Diospa willakuyninta pïmaypis manakaqman churayanqa. 3 Qellaypä ayrajashqa karmi alli tukullar sakyayäshunki. Paykunata infiernuman qaykunanpä unaypitanami Tayta Dios destinarqan. Paykunataqa pasaypa ñakaymi shuyaraykan.

4 Jutsa ruraq angelkunatapis Tayta Dios manami perdonarqantsu, tsaypa trokinqa infiernumanmi qaykurqan. Tsay tsakaymanmi wichqarqan juiciu finalcho juzgananpä.

5 Noé kawanqan witsanpis jutsasapa runakunata manami perdonarqantsu. Tsay runakunaqa Tayta Dios munanqannö kawayänanpä Noé willaptinpis manami cäsukuyarqantsu. Tsaymi diluviuwan Tayta Dios ushakätsirqan. Tsaynö ushakätsirpis Noéta y qanchis runakunallatami salvarqan.^†

6 Tsaynöllami Sodoma y Gomorra markakunatapis uchpayanqanyaq Tayta Dios rupatsirqan.^† Tsaynö rurarqan castigakuq kanqanta jutsasapa runakuna tantiyakuyänanpämi. 7 Tsay markakunata rupatsirpis Lottami itsanqa alli runa kaptin salvarqan. Payqa tsay markakunacho taq mana alli runakuna jutsata rurayaptin ima ruraytapis manami kamäpakurqantsu.^† 8 Paykuna kaqcho tar jutsata rurayanqanta rikar y manakaqkunata parlayanqanta wiyarmi qoyay qoyay pasaypa llakikurqan.

9 Tsaynöpami musyantsik pay munanqannö kawaq kaqtaqa ima ñakaypitapis Tayta Dios salvamänantsikpä kanqanta. Jutsa ruraqkunatami itsanqa juiciu finalcho pasaypa castiganqa.

10 Mana kuyapaypami castiganqa llutalla pïmaywanpis kakuqkunata. Tsay runakunaqa Tayta Diospitapis manami mantsapakuyantsu. Yachaq tukurmi supaykunatapis mana mantsariypa ashlliyan. 11 Ciëlucho kaykaq angelkunaqa runakunapita mas munayyuq y Tayta Diospa ñöpancho kaykarpis manami supaykunata ashlliyantsu.

12 Tsay runakunaqa mana tantiyarmi tsaynö ashlliyan. Uywakunanö yarpayniynaq karmi wanutsishqa kayänanpä yuriyashqa. Mana allita ruraykäyanqallanchömi ushakäyanqa. 13 Wakinkunata ñakatsiyanqanpitami kikinkunapis ñakayanqa. Pïmaypa ñöpancho manakaqkunata rurarpis mana penqakuypami asikachäyan. Qamkuna mikuyänaykipä qorikäyanqaykichöpis llutankunata parlarmi kushikuyan.

14 Tsay runakunaqa pï warmita rikarpis munapäyanmi. Jutsata rurarpis manami ajayäyantsu. Manarä shumaq tantiyakuqkunatami llutankunata yachatsiyan. Runa mayinta engañaytaqa imaykanöpami yachayan. Tsaynö kayanqanpitami pasaypa castigashqa kayanqa.

15 Tayta Dios munanqannö ñöpata kawashqa karpis kananqa llutankunata rurarmi puriykäyan. Beorpa tsurin Balaam qellay raykuq llutanta ruranqannömi paykunapis llutankunata ruraykäyan. 16 Qellaypä raykuq Balaam aywaykaptinmi china ashnun parlapar mana aywananpä micharqan.^†

17 Tsay runakunaqa tsakishqa pukyunö y wakpa kaypa aywaq tsaki pukutaynömi kaykäyan. Paykunapäqa kamarishqanami kaykan yanaraykaq tsakay [imayyaqpis] tsaycho wichqaräyänanpä. 18 Paykunaqa alabakurmi yachaq tukurnin imatapis parlayan. Jutsankunata tsayrä kacharishqa kaqkunatami shakyätsiyan llutankunata rurayänanpä.

19 Runakunatami promitiyan yachatsiyanqanta chaskir libri kawayänanpä kanqanta. Tsaynö promitirpis kikinkunaqa manami libritsu kayan, tsaypa trokinqa jutsapa munayninchömi kaykäyan. Ima viciupis runata vinciptinqa tsay viciupa munayninchömi kaykan.^†

20 Salvamaqnintsik Señor Jesucristuman criyikushqa kaykar jutsa rurayllacho yapay kakurqa punta kanqanpitapis peormi rikakun.^† 21 Diospa willakuyninman criyikushqa kaykar yapay jutsata rurananpä kaykaptinqa mejor ama tsay sagrädu willakuyninman criyikuyanmantsu karqan. 22 Jutsata yapay ruraqkunapäqa rasuntami niyan: “Allquqa lanzapakunqanta yapaymi mikun. Kuchipis bäñaskatsiyaptin yapaymi mitucho qoshpan”.^†