3 Musyantsikmi ushanan tiempucho Tayta Diosta mana cäsukuq runakuna yurimunanpä kanqanta. Tsay runakunaqa asipäyäshurnikimi^† 4 niyanqa: “¿Imanirtä Jesucristo ‘kutimushämi’ niskir kutimunrätsu? Paywan puriqkunapis shuyaykäyanqallanchömi wanuyashqa. Kay patsapis qallanqanpita patsa kanqannöllami kaykan”.^†

5 Tsaynö nir manami tantiyayantsu kay patsatapis ciëlutapis Tayta Dios “tsaykuna kayätsun” nir kamanqanta. Kamaptinmi yaku rurinpita tsaki patsa yarqamurqan.^† 6 Tsaypitanami kay patsata diluviuwan ushakätsirqan.^† 7 Tsaynöllami juiciu finalcho Tayta Dios niptin kay patsa, rupay, killa y llapan qoyllurkunapis ninawan ushakäyanqa. Tsay junaqmi jutsa ruraq runakunapis ushakäyanqa.

8 Kuyay wawqikuna panikuna, shumaq tantiyakushun: Tayta Diospäqa juk junaq juk waranqa (1,000) watanömi y juk waranqa watapis juk junaqnöllami kaykan.^† 9 Tsaynö kaykaptinqa wakin runakuna yarpäyanqannö ama yarpäshuntsu Señornintsik Jesucristo mana kutimunanpä kanqanta. Payqa manami munantsu pipis jutsallancho wanunanta. Tsaymi shuyaraykan runakuna jutsankunapita arrepentikuyänanta.^†

10 Señor Jesucristupa kutimuyninqa [paqaspa] illaqpita suwa shamunqannömi kanqa.^† Pay shamuptinmi rupaypis, killapis y llapan qoyllurkunapis mantsariypä bunrurur ninawan rupaykar ushakäyanqa. Tsaynöllami kay patsapis y kay patsacho kaqkunapis rupaykar chipyaq ushakäyanqa.

11 Imaykapis ushakänanpä kaykaptinqa jutsata mana ruraypa Tayta Dios munanqannö santu kawayay. 12 Tsaynö kawar shuyaykaptikimi Tayta Dios juzganan junaq rasllana chämunqa. Tsay junaqmi rupayta, killata y qoyllurkunatapis nina rupar ushanqa. Tsaynöllami llapan imaykapis tsulluykar ushakäyanqa. 13 Noqantsikmi itsanqa Tayta Dios awninqannölla mushuq ciëluta y mushuq patsata shuyaykantsik. Tsaychöqa Tayta Dios munanqannömi llapanpis alli kanqa.^†

14 Kuyay wawqikuna panikuna, tsaykunata shuyaykarqa jutsa ruraykunata kacharir pïmaywanpis alli kawayay. Tsaynöpami Jesucristo kutimur jutsaynaqta tariyäshunki. 15 Yarpäyay Señor Jesucristo imanir manarä kutimunqanta. Payqa shuyaraykan runakuna salvakuyänantami. Tsaytaqa kuyay wawqintsik Pablupis Tayta Dios tantiyatsiptinmi qellqashqa. 16 Llapan cartankunachömi tsayta qellqarqan. Tsay cartankunacho aja tantiyaypä kaptinmi yachaq tukuqkuna y Tayta Diosman janan shonqulla yärakuqkuna llutanta yachatsiyan. Tsaynöllami llutanta yachatsiyan Tayta Diospa palabrancho wakin yachatsikuykunatapis. Tsay runakunaqa infiernuchömi ñakayanqa.

17 Kuyay wawqikuna panikuna, kay ninqäkunata musyaykarqa paqtä chaskipäyankiman llutan yachatsikuqkunapa yachatsikuyninta. Tayta Diosman alli yärakuykäyanqaykicho paqtä qepaman kutikuyankiman. 18 Tsaypa trokinqa qoyay qoyay tantiyakuyay kuyapäkuq y salvakuq Señornintsik Jesucristo munanqannö kawayänaykipä. ¡Payqa kananpis y imayyaqpis alabashqa kaykullätsun! Amén.