Job ninqan
26
Tsaynö niptinmi Job nirqan:2 “Ñakaykaptï tsaynö nimarqa ¿yanapaykämankitsurä?
Kallpä mana kaykaptinpis ¿shakyaykätsimankitsurä?
3 Qam yätsimanqaykiwan allichi kawashä.
Mana yachaq kaptïchi tsaynö shumaq tantiyatsimanki ¿aw?
4 ¡Pitä tsaynö parlanaykipä yachayta qoshushqayki!
¡Pitä tsayjinanpa alli yarpayta qoshushqayki!
5 “Wanushqakunapa almanqa lamarpita mas rurincho karmi pasaypa mantsakuyan.
6 Tsaycho kayaptinpis paykunataqa Tayta Dios rikaykanmi.
Maycho kayanqantapis musyaykanmi.
7 Imapis manarä kaptinmi ciëluta y kay patsatapis Tayta Dios kamashqa.
8 Paymi yakutapis pukutaycho tsararan.
Yaku alläpa lasarpis pukutaytaqa manami rachitsintsu.
9 Killapa atsikyaynintapis pukutaywan tsaparmi tsakätsin.
10 Tsaynöllami rupaytapis ordenashqa lamarpa juk kuchunpa yarqamur atsikyänanpä y jukaq kuchunpa jeqar tsakänanpä.
11 “Tayta Dios ajanaptinqa ciëluta tukmaraqkunapis mantsarirmi tsuktsukyäyan.
12 Munayyuq karmi lamartapis pulchaqyaykaqta wiyätsin.
Munayyuq karmi mantsaypä Rahab kurutapis vincishqa.†
13 Pükaskiptinmi ciëlupis atsikyarkurqan.
Mantsaypä jatusaq culebraa qeshpiykaqtapis paymi tsariskir wanutsishqa.
14 “Tsaykunaqa kaykan Tayta Dios juk ishkay ruranqan kaqkunallarämi.
Pay ruranqankunataqa ichikllatami musyantsik.
Pasaypa munayyuq kanqantaqa ¿pirä shumaq tantiyanman?”