27
Mastapis Job nirqanmi:2 “Arreglamayta mana munamaptinpis y pasaypa ñakatsimashqa kaptinpis llapanpä munayyuq Tayta Diospa jutinchömi nï:
5 Tsaymi kawanqäyaqqa jutsaynaq kanqäta imaypis nishä.
Jutsata ruranqäpita ñakanqäta niyämaptikipis manami jutsata ruranqäpitatsu ñakaykä.
6 Jutsata mana rurashqa karmi imapitapis penqakütsu.
Tsaymi jutsaynaq kanqäta imaypis parlaykäshä.
7 “¡Chikimaqnïkunaqa llapanpis ushakäyätsun!
¡Paykunaqa jutsa ruraq runanö wanuyätsun!
8 Mana alli ruraq runakunaqa Tayta Dios wanutsiptinmi imanöpapis salvakuyanqatsu.
9 Pasaypa ñakar mañakuyaptinpis manami yanapanqatsu.
10 Tsay runakunaqa Tayta Dios munanqannö kawayänanpä imaypis manami yarpachakuyantsu.
Llapanpä munayyuq Tayta Diostaqa manami imaypis mañakuyantsu.
11 “Kananmi tantiyatsishayki Tayta Dios munayyuq kanqanta.
Llapanpä munayyuq kanqantaqa manami upällakushätsu.
12 Munayyuq kanqantaqa kikikikunapis rikayashqaykimi.
Tsayta musyaykarpis ¿imanirtä manakaqkunata parlaykäyanki?
13 “Llapanpä munayyuq Tayta Diosmi mana alli runakunata y mana kuyapäkuq runakunata imaypis castigan.
14 Mana alli runakunapa tsurinkuna atskaq karpis wakin guërrachömi ushakäyanqa y wakinna mallaqaypita wanuyanqa.
15 Kawaykar quëdaqkunapis mantsariypä qeshyawanmi wanuyanqa.
Mana alli ruraq kayaptinmi viüdankunapis waqayanqatsu.
16 “Mana alli ruraq runakuna imayka allpatanö qellayta qoriyaptinpis y atska latsapata qoriyaptinpis 17 alli runakunami tsay latsapankunata jatikuyanqa.
Qoriyanqan qellaytapis jutsaynaq runakunami gastayanqa.
18 Mana alli runakunapa wayinkunaqaa pishqupa qeshunnö ushakaqllami kaykan.
Tsaynöpis chakracho täpana tsukllanöllami kaykan.
19 “Tsay mana alli ruraq runakunapa riquëzankunaqa illaqpitami ushakanqa.
20 Mangäda illaqpita tsarinqannömi paykunataqa ima castïgupis illaqpita tsarinqa.
Shukukuy wayra paqaspa shamuptin imapis illaqpita ushakanqannömi paykunapis illaqpita ushakäyanqa.
21 Rupay yarqamunan kaqpita shukukuy wayra shamurmi wayincho kaykaqta illaqpita apakunqa.
22 Mayman pakakuyaptinpis mana kuyapaypami ushakätsinqa.
23 Wichyarrämi tsay wayra apakunqa”.