Yachaypä parlanqan
28
Qellay mïnaqa reqishqa partillachömi.Tsaynöllami qori tsullutsikunapis reqishqa partillacho.
2 Allpacho kaykaqtami fiërrutapis jipintsik.
Rumicho kaykaqtami cobritapis jipintsik.
3 Runaqa mïnata uchkurmi aktsikurkur mayyaqpis yaykun.
Tsaypitami tukuy niraq mineralkunata akrarkur jipimun.
4 Tsay mïnakunataqa jäkuq jirkakunachömi kichan.
Pipis mana yaykunqanmanmi waskakunawan watakurkur yaykun.
5 Patsa janancho mikuy wayuptinpis patsa rurinchöqa nina shanshaykaqnömi kaykan.
6 Tsaychömi zafiro rumitapis tariyan.
Oqtiyanqan allpachömi qoripis kaykan.
7 Tsay partitaqa manami ankapis ni condorpis rikantsu.
8 Tsaymanqa manami jirka uywakunapis chäyantsu.
Tsaychöqa manami leonkunapis puriyantsu.
9 Runakunaqa qaqakunatami oqtiyan.
Tsaynöllami jirkakunatapis ruri ruriyaq uchkuyan.
10 Qaqakunachömi uchkuta rurayan.
Tsaychömi imayka niraq tesörukunata tariyan.
11 Uchkuykällarmi mayupa ñawintapis tariyan.
Uchkunqanpitami pipis mana rikanqanta jipiyämun.
12 Patsa rurincho tsaykunata tarirpis ¿maychörä yachaytawan tantiyayta tariyanman?
13 Runaqa manami musyantsu tantiyakuq kay llapanpitapis mas alli kanqanta.
Tantiyakuq kaytaqa manami llutallatsu tarintsik.
14 Wanwanyaykaq uchkukunapis ninmi: “Tantiyayqa manami kaychötsu”.
Tsaynöllami lamarpis nin: “Manami kaychöpis kantsu”.
15 Tantiyaytaqa qoriwanpis ni qellaywanpis manami rantintsiktsu.
16 Ni Ofirpita apamunqan mas alli kaq qoriwanpis manami rantiyta puëdintsiktsu.
Ni allinnin kaq ónice rumiwanpis ni allinnin kaq zafiro rumiwanpis manami rantiyta puëdintsiktsu.
17 Tantiyaymanqa ni qoripis ni diamantipis manami tinkuntsu.
Manami allinnin kaq alhäjawanpis trukayta puëdintsiktsu.
18 Yachayqa coral rumipitapis y kuyayllapä perlaskunapitapis masmi välin.
Tsaymanqa mas kuyayllapä rumikunapis manami tinkuntsu.
19 Tantiyaymanqa Etiopíapita apamunqan topaciupis manami tinkuntsu.
Manami allinnin kaq qoriwanpis rantiyta puëdintsiktsu.
20 ¿Maychörä tarishwan tantiyayta?
Tsaynöpis ¿maychörä kaykan yachay?
21 Runakuna mana rikananchömi pakaraykan.
Pajaqkunapis mana rikananchömi pakaraykan.
22 Infiernupis y wanuypis niyanmi:
“Yachaypäqa parlaqllatami wiyashqä”.
23 Tantiyay maycho kanqantapis Tayta Diosllami musyan.
Payllami musyan maycho tarinantsikpä kanqantapis.
24 Payqa kay patsata kuchu kuchumi rikaykan.
Kay patsacho ima kanqantapis llapantami musyaykan.
25 Tayta Diosmi wayratapis kallpata qoshqa.
Paymi yaku mayyaqlla chänanpäpis kamakätsishqa.
26 Paymi nishqa tamya tiempu imay kananpäpis.
Tsaynöllami nishqa maqakuykuna y illaqukuykuna kananpäpis.
27 Tsay witsanmi tantiyakuytapis rikarqan.
Imanö kanqantapis musyaskirmi alli kanqanta nirqan.†
28 Nirkurmi runakunata Tayta Dios nirqan:
“Yachaq runaqa noqapitami mantsapakun.
Tantiyakuq karqa llutan ruraykunatami kacharin”.†