Ñöpata imanö kawanqantapis Job parlanqan
29
Tsaymi Job yapay nirqan:2 “¡Imanöllarä kutiyküman ñöpa kanqäman!
Tsay witsanqa Tayta Dios allimi rikamarqan.
3 Aktsinwan aktsipämaqnömi yanapamarqan.
Ima rurayta mana kamäpakuptïpis tantiyatsimarqanmi.
4 Wayïcho taqkunatawan shumaq rikamaptinmi alli kawarqä.
5 Llapanpä munayyuq Tayta Dios yanapamaptinmi tsurïkunapis ñöpächo kayarqan.
6 Tsay witsanqa lichipis yakunörämi atska karqan.
Aceitipis jina jinami karqan.
7 “Noqaqa marka yaykuna punkuchömi imaypis mayor runakunawan juntu jamakuq kä.
8 Tsay witsanqa juntaraykäyanqanman yaykuptï chölukunapis respitayämarmi witikuyaq.
Awkinkunapis respitamarmi ichikuyaq.
9 Mayor runakunapis parlaykäyanqanchömi upällakuyaq.
10 Mandaqkunapis parlaykäyanqanchömi jinan höra upällakuyaq.
Manami mayqanpis parlayaqnatsu.
11 “Reqimaq runakunapis favornïmi parlayaq.
Pïmaypis alli kanqätami parlayaq.
12 Tsay witsanqa waktsakunata y muchuqkunatami yanapaq kä.
13 Muchuycho kawaqkunapis yanapanqäpitami agradëcikayämaq.
Viüdakunapis yanapaptïmi kushikuyaq.
14 “Noqaqa pïmaywanpis allimi kawarqä.
Pitapis manami engañarqätsu.
15 Qaprakunatapis allimi pusharqä.
Weqrukunatapis allimi yanaparqä.
16 Waktsakunapapis taytannömi karqä.
Jäpa runakunapapis jananmi shäriq kä.
17 Pitapis mana alli runakuna ñakatsiyänanta manami munarqätsu.
Pitapis ñakatsiptinqa leonpa shiminpita imayka qechuqnömi washaq kä.
18 “Noqaqa yarparqä wanukuptï llapan tsurïkuna pampayämänanpä kanqantami.
Tsaynöpis yarparqä atska wata kawanäpä kanqantami.
19 Noqaqa yaku kuchuncho plantaraykaq jachanömi karqä.†
Jachapa raprankuna shullyashqa warämunqannömi noqapis kushishqa warämurqä.
20 Noqataqa pïmaypis respitayämarqanmi.
Imaypis kallpayuq kaykänäpä kanqantami yarparqä.
21 “Parlaptïqa llapanpis kushishqami wiyayämaq.
Yätsiptïpis wiyayämaqmi.
22 Parlanqäta shumaq tantiyarmi pipis manakaqman churamaqtsu.
23 Muruy witsan tamyata shuyaqnömi yachatsinäpä shuyäyämaq.
24 Shumaq rikaptïmi paykunapis kushikuyaq.
Kushishqa kaykaqta rikamarqa shonqunkunapis atsikyarkuqmi.
25 Runakunawan qorikaykurmi mandaqninnöpis alli kawayänanpä yätsirqä.
Soldädukunapa ñöpancho rey kanqannömi noqapis karqä.
Waqayaptinpis shoqarqämi”.