Job ñakar llakikunqan
30
“Kananqa kaynö kaykaqta rikamarmi chölukunapis asipäyäman.Paykunapa taytankunataqa manami churämantsu üsha täpaq allqu qaraqllapäpis.
2 Paykunaqa aruypäpis pasaypa qelami kayan.
Paykunaman yärakurqa ñakaqchi käman karqan.
3 “Tsay asipäkuqkunaqa mikuyänanpä imanpis mana kaptinmi tsunyaq jirkakunapa aywayan imatapis mikuyänanpä ashiq.
4 Muntikunaman aywarmi iwjiq jachakunata qoriyan mikuyänanpä.
Hasta retämapa michinkunatamia mikuyan.
5 “Paykunataqa marka mayinkunapis qarquyarqanmi.
Qarqurninmi suwa runakunatanö qayapäyarqan.
6 Tsaymi paykunaqa machaykunallacho, raqrakunallacho y qaqa uchkukunallacho täyan.
7 Shiraka rurinkunaman pakakuykurmi waqayan.
Munti rurinkunallachömi qorikäyanpis.
8 Paykunaqa mana alli runakunami kaykäyan.
Imapäpis manami väliyantsu.
Tsaymi markanpitapis qarquyashqa.
9 “Tsaynö kaykarmi kananqa asipäyäman.
Asikuyänan raykuqmi jutïtapis joqarkuyan.
10 Pasaypa melanäyämarmi noqapita witikuyan.
Tsaynöpis qaqllämanmi toqapäyäman.
11 “Tayta Dios castigamaptinmi washäkunäpä kallpäpis kannatsu.
Runakunapis manami respitayämannatsu.
12 Atskaq qorikaykurmi ushakätsimayta munar atacayäman.
Tsarimayta munarmi trampatapis churapäyäman.
13 Imata rurayta munaptïpis tsapatami churapäyäman.
Manami pïnïpis kantsu janä shärinanpä.
14 “Corralta juchuskatsir yaykuqnömi noqaman qayaykacharrä shayämun.
15 Tsaymi pasaypa mantsakashqa kaykä.
Tsaynö rurayäman mana respitayämarmi.
Llapan imaykäkunapis pukutaynömi illakakäkushqa.
16 “Wanuypis janächönami.
Pasaypa llakikuyllanami tsariman.
17 Tullüyaqrämi nanaypis chaykun.
Mana atipaypämi tsakaykunapapis nanäman.
18 Kikin Tayta Diosmi kunkäpita aptaraykäman.
Jamayta kacharkunalläpäpis manami dëjamantsu.
19 Mituman jitashqanömi kaykä.
Uchpanö y allpanömi kaykä.
20 “Tayta Dios, tsaynö karpis yanapamänaykipä qamtami mañakaykämü.
Qamta mañakuptïpis manami yanapamankitsu.
Rugakuptïpis manami kuyapämankitsu.
21 Yanapamänaykipa trokinmi pasaypa chikikarkamashqayki.
Pasaypa ajanashqami qatikachaykämanki.
22 Tsaymi desgraciata kachamushqayki shukukuy wayranöpis ushakätsimänanpä.
23 Musyämi wanuyman apaykämanqaykita.
Llapan runakuna wanunqannöllami noqapis wanushä.
24 “Noqaqa muchuqkunatapis yanapashqämi.
Pasaypa llakikuyaptinpis shakyätsishqämi.
25 Ñakaqkunata rikarmi kuyapar waqaq kä.
Muchuqkunatapis kuyaparqämi.
26 Tsaynö karmi imaypis mana ñakanäpä kanqanta yarparqä.
Tsaynö yarpaptïpis desgraciallami päsamashqa.
Aktsita shuyarpis paqaschönömi kaykä.
27 “Shonqüpis pasaypami ushakaykan.
Pasaypa ñakayllachömi kaykäpis.
28 Imayka llantuycho kaykaqnömi pasaypa llakishqalla qoyä.
Tsaymi runakuna qorikäyanqancho mañakü pillapis yanapaykamänanpä.
29 Duëñun oqrashqa allqunömi kaykä.
Tsaynöpis munticho tukunömi kaykä.
30 Qaräkunapis yanayarmi kachkakar shushuykan.
Entëru cuerpüpis pasaypami achachaykan.
31 Arpäpis flautäpis llakikuyllapämi waqayan”.