Tayta Dios munanqannö kawanqanta Job ninqan
31
“Shonqullächömi yarpachakurqä pï jipashtapis mana rikapänäpä ni mana munapänäpä.2 Mana alli kawashqaqa alli kawayta qaramänantsikpa trokinmi desgraciallata Tayta Dios kachamunqa.
3 Jutsata rurashqaqa premiuta qomänantsikpa trokinmi castigamäshun.
4 Tayta Diosqa imata ruranqätapis rikaykämanmi.
Payqa musyaykanmi imanö kawanqätapis.
5 “Llutantaqa manami rurashqätsu.
Pitapis manami llullapashqätsu.
6 Balanzanwan pësaqnömi Tayta Dios juzgamätsun.
Tsaynöpami musyanqa jutsaynaq kanqäta.
7 Llutantaqa imatapis manami rurashqätsu.
Pipa imantapis manami munapashqätsu ni suwakushqätsu.
8 Tsaykunata rurashqa kaptïqa murunqäkunatapis juk runakunana mikuyätsun.
Plantapakunqäkunatapis jawapita llukiriyätsun.
9 “Warmikunata munapashqa kaptïqa o runayuq warmiwan kakushqa kaptïqa 10 warmïpis jukpa warmin katsun.
Jäpa runakunapis warmïwan kakuyätsun.
11 Tsaynö kashqa karqa pasaypa penqakuypächi käman.
Tsaynö kaptïqa castigayämanmanchi.
12 Umä achachashqa karqa wanuymanpis chämanchi.
Llapan imaykäkunapis ushakanmanchi.
13 “Warmipis ollqupis wätaynïkuna reclamayämaptin imaypis cäsushqämi.
14 Mana cäsushqa karqa Tayta Dios juzgamaptin ¿imatarä ruräman?
Imanö kanqätapis tapumaptin ¿imatarä nïman?
15 Noqa yurinäpä kamakätsinqannöllami wätaynïkuna yuriyänanpäpis Tayta Dios kamakätsishqa.
Noqata kamamanqannöllami paykunatapis kamashqa.
16 “Muchuqkuna mañakayämaptinqa imaypis qaraq kämi.
Viüdakuna mikuyänanpäpis kamaripaq kämi.
17 Kikillä mikunäpa trokinqa waktsakunatapis qaraq kämi.
18 Chölu kanqäpita patsami muchuqkunapa taytannö karqä.
Wamra kanqäpita patsami viüdakunata yanaparqä.
19 Latsapaynaq kar alätsikuptinpis o pitukuyänanpä imankuna mana kaptinpis kamaripaq kämi.
20 Üshäkunapa millwanta awatsir jatitsiptïmi pasaypa kushikur päkillä niyämaq.
21 “Munayyuq karpis waktsakunata autoridäkunawan manami castigatsirqätsu.
22 Tsaynö castigatsishqa kaptïqa rikräkuna pakir yarqukätsun.
23 Noqaqa imaypis Tayta Diospa castïgunta mantsarqämi.
Pay castigamaptinqa manami imanöpapis salvakümantsu.
24 “Qorimanqa imaypis manami yärakurqätsu.
Ni imaykayuq kanqämanpis manami yärakurqätsu.†
25 Mayjina imaykayuq karpis manami runa tukurqätsu.
26 “Rupay shumaq jeqamuptinpis ni killa junaqnörä atsikyaptinpis manami tsaykunata adorarqätsu.
27 Tsaykunataqa manami pakayllapapis adorashqätsu ni adoranäpä manami makintapis mutsarqätsu.†
28 Tsaynö ruraptïqa Tayta Dios castigamanmanchi karqan.
Munayyuq Tayta Diostapis ñëgämanchi karqan.
29 “Chikimaqnïkunata desgracia päsaptinpis manami kushiparqätsu ni makita taqllaparqätsu.†
30 Paykunataqa manami imaypis maldicionarqätsu.
Wanuyänanpäpis manami mañakurqätsu.
31 “Wayïcho kaqkunaqa llapanpis pacha juntami mikuyaq.
32 Jäpa runa chämuptinpis manami cällicho jaqiykurqätsu.
Tsaypa trokinqa wayïmanmi patsatsirqä.
33 “Wakin runakuna jutsa rurayanqanta ñëgayaptinpis noqaqa manami ñëgarqätsu.
Mana allita ruranqätapis manami upällakurqätsu.
34 Jutsata ruranqäpita runakuna y castäkuna rimayämänan kaptinpis upällakunäpa trokinmi perdonta mañakurqä.
35 “¡Ima allirä kanman washäkunqäta Tayta Dios wiyamaptin!
Jutsaynaq kanqätaqa juk papelman qellqaykurpis firmämanmi.
Llapanpä munayyuq Tayta Diospis jutsaynaq kanqäta qellqatsun.
36 Tsay qellqanqantami umrukurkur y umäman corönatanörä jatikuskir mana penqakuypa purïman.
37 Mana penqakuypa Tayta Diospa ñöpanman aywarmi llapan ruranqäta cuentata qöman.
38 “Chakräkuna noqapita manami qallayantsu ni castigamänanpä Tayta Diosman manami qayakuntsu.
Chakrächo camillunkunapis Tayta Diosta manami waqapantsu.†
39 Pipa mikuynintapis debaldillaqa manami mikushqätsu.
Arupakuq runakunata mana pägaypaqa imaypis manami arutsirqätsu.
40 Tsaynö rurashqa kaptïqa trïgu jeqamunanpa trokin kashakunallana chakrächo jeqamutsun.
Cebäda jeqamunanpa trokin mana alli jachakunallana jeqamutsun”.
Tsaynö nirmi Job parlayta usharqan.