Eliú ninqan
32
Kutin kutin jutsaynaq kanqanta Job niptinmi tsay kimsan runakuna ima niytapis kamäpakuyarqannatsu.2 Tsaychömi kaykarqan Ram casta Baraquelpa tsurin Eliú. Payqa Buz partipitami karqan. Jutsaynaq kaykaptin Tayta Dios castiganqanta Job niptinmi Eliúqa pasaypa ajanarqan. 3 Tsaynöllami ajanarqan Jobpa kimsan amïgunkuna Job jutsayuq kanqanta shimpirpis mana taripuyaptin. 4 Elihúqa paykunapita mas chölullarämi karqan. Tsaymi shuyararqan kimsan amïgunkuna Jobwan parlayta ushayanqanyaq.
5 Tsaynö shuyarpis kimsan amïgunkuna Jobta ima niytapis mana kamäpakuyaptinmi Eliúqa pasaypa ajanarqan. 6 Tsaymi paykunata nirqan:
“Rikayämanqaykinöpis noqaqa chölullarämi kä.
Qamkunaqa mas awkinnami kayanki.
Tsaymi qamkunata respitar yarpanqäta parlakushqätsu.
7 Puntata qamkuna parlayänaykipämi upällakushqä.
Yarparqä mayor kar Jobta tantiyatsiyänaykipä kanqantami.
8 Tsaynö kaptinpis llapanpä munayyuq Tayta Diosmi tantiyayta qomantsik.
Tantiyakuq kanantsikpämi Espïritunwan tantiyatsimantsik.
9 Tsaynö kaykaptinqa manami awkinkunallatsu yachaq kayan.
Ni awkin kayanqallanpitatsu alli kaqta ni mana alli kaqtapis tantiyayan.
10 Tsaynö kaykaptinqa noqa ninqätapis wiyayämay.
Tantiyanqätami parlamushä.
11 “Parlayanqaykita shumaqmi wiyashqä.
Jobta yätsiyta ushayanqaykiyaqmi parlanäpä shuyarashqä.
12 Imanö parlarpis manami mayqaykipis Jobta tantiyatsiyta kamäpakuyashqaykitsu.
13 Jobta tantiyatsiyta mana kamäpakuykarqa ¿imanirtä niyanki yachaq y tantiyaq kayanqaykita?
¿Imanirtä niyanki Tayta Diosna Jobta tantiyatsinanpä kanqanta?
14 Job parlapämaptinqa manami qamkuna niyanqaykinötsu nïman karqan”.
15 Tsaynö niskirmi Jobta nirqan:
“Kay runakunaqa kimsanpis imata niyäshunaykipäpis manami kamäpakuyantsu.
Paykunataqa shimiynaqtami jaqiykushqayki.
16 Paykuna parlayta ushanqanyaqmi noqa shuyarashqä.
17 Tsaymi yarpanqäta kanan nishayki.
Yarpanqätaqa manami upällakümantsu.
18 “Yarpanqäta ninäpäqa atskami kaykan.
Tsaytaqa manami upällakümantsu.
19 Vïnu poquptin tsillinaykaq uyllu mana awantanqannömi noqapis parlanäpä kaqkunata awantakuyta puëdïtsu.
20 Yarpanqäta niptïrämi shonqüpis atsikyarkunqa.
Parlarqa imanöpapis tantiyatsishaykimi.
21 Pipapis janan mana shäriypami parlashä.
Manami pitapis alabashätsu.
22 “Noqaqa manami imaypis manakaqpita pitapis alabashqätsu.
Alabaptïqa kamamaqnintsik Tayta Dios jinan hörachi castigamanman.