33
“Job, kanan imata ninqätapis shumaq wiyamay.Imata yätsinqätapis shumaq tantiyakuy.
2 Shumaq tantiyakuskirmi parlamushä.
3 Llapan shonqüwanmi rasun kaqllata tantiyatsishayki.
Llapan yarpanqäkunatami nishayki.
4 Llapanpä munayyuq Tayta Dios kamamar jamayta qaramashqa kaykaptinqa tantiyatsinqäta shumaq wiyamay.
5 Noqaqa listumi kaykä qamwan parlanäpä.
Puëdirqa ninqäta contestamanki.
6 “Qampis y noqapis Tayta Diospäqa tsaynöllami kantsik.
Ishkantsikpis allpallapitami kantsik.
7 Tsaynö kaykaptinqa mantsakar ama yarpachakuytsu.
Ninqäkunaqa manami qallayänaykipätsu.
8 “Noqaqa wiyashqämi llapan parlanqaykita.
Tsaychömi nishqayki:
9 ‘Noqaqa jutsaynaq runami kä.
Imatapis llutantaqa manami rurashqätsu’.
10 “Tsaynöpis nishqayki:
‘Llutanta mana ruraykaptïmi Tayta Dios castigaykäman.
Noqataqa rikaykäman contran runatanömi.
11 Chakïtapis cadënawan watashqatanömi tsararaykäman.
Imanö kawanqätapis rikaraykämanmi’.
12 “Manami yarpanqaykinötsu Tayta Dios kaykan.
Llapan runakunapitapis Tayta Dios mas yachaq kaykaptinqa 13 imanir castigashunqaykita mana tantiyatsishuptikipis ama qallayaytsu.
14 Tayta Diosqa mana tantiyashqapis imaykanöpami yarpanqanta tantiyatsimantsik.
17 Tsaynö yätsimantsik jutsa ruraykunata kacharinantsikpä,
yachaq tukuq mana kanantsikpä
18 y wanuypita salvakunantsikpämi.
19 “Aybësisqa imaykaläya qeshyakunawan castigamarnintsikmi tullu nanaywanpis ujurätsimantsik.
20 Tsaynö qeshyarmi mikuypa gustuntapis tarintsiktsu.
Mayjina alli mikuypis gustuynaqmi kaykan.
21 Qeshyar ujurarqa pasaypami tsakintsik.
Tsaymi custillantsikkunapis yupanakuykan.
22 Tsaynö karmi pampaykuyllapäna kaykantsik.
Wanuyllatanami shuyaraykantsik.
23 “Tsaynö qeshyashqa juk waranqa (1,000) angelkunapita juk angelllapis kuyapämarnintsik janantsik shäriptin ima allirä kanman.
24 Wanuypita salvamänantsikpä tsay ángel päguta apar Tayta Diosta rugakuptinqa 25 Tayta Dios alliyätsimäshunmi.
Alliyätsimashqaqa chölu kanqantsikmannömi kutirkushun.
Cuerpuntsikpis wamra kanqantsikmannömi kutirkunqa.
26 Tsaynöllami mañakunqantsikkunatapis Tayta Dios awnimäshun.
Ñöpata yanapamanqantsiknömi yapay yanapamäshun.
Tsaymi Tayta Diospa qaqllanta rikaqnö pasaypa kushikushun.
27 “Tsaynö alliyätsimashqaqa runakunapa ñöpanchömi nishun:
‘Llutanta rurarmi jutsata rurashqä.
Tsaynö kaykaptïpis manami jutsata ruranqäman tuputsu Tayta Dios castigamashqa.
28 Wanuypita salvamaptinmi atsikyaq patsata rikar kushikü’.
29 “Tsaynömi Tayta Diosqa kutin kutin qeshyanqantsikpita alliyätsimantsik.
30 Wanuypita tsaynö salvamashqami kawayta tarintsik.
31 “Job, ninqäta shumaq wiyamay.
32 Imatapis nimänaykipä kaptinqa kanan nimay.
Nimanqayki alli kaptinqa chaskikushämi.
33 Imapis nimänaykipä mana kaptinqa upällakuy.
Yachaq kanaykipämi yachatsishayki”.