34
Mastapis Eliú nirqanmi:2 “Yachaqkunapis tantiyakuqkunapis ninqäta shumaq wiyayämay.
3 Qalluntsikwan mikuypa gustunta mayanqantsiknömi rinrintsikwan allita o mana allita nikanqantapis wiyantsik.
Tsaynöpami tantiyantsik rasun kaqta o manakaqkunata parlanqantapis.†
4 Tsaynö kaykaptinqa shumaq yarpachakushun Job ninqankuna alli o mana alli kanqantapis.
5 “Jobqa kaynömi nishqa: ‘Noqaqa jutsaynaq runami kä.
Tsaynö kaykaptïpis Tayta Diosqa manami kuyapämantsu’.
6 Tsaynöpis kaynömi nishqa: ‘Jutsaynaq kaykar jutsayuq kanqäta nirqa llullakümanmi.
Jutsata mana rurashqa kaykaptïmi Tayta Dios castigaykäman.
Tsay castigamanqanqa flëchawan tuksishqanömi nanaykäman’.†
7 “¡Jobnöqa manami pipis llutanta parlantsu!
Payqa mana mantsariypami Tayta Diostapis manakaqman churan.
8 Payqa mana alli runakunawan y jutsa ruraq runakunawanmi qorikan.
9 Tsaynöllami nimantsik: ‘¿Imapätä Tayta Dios munanqannöpis kawashun?’
10 “Yachaq runakuna, shumaq wiyayämay.
Llapanpä munayyuq Tayta Diosqa manami imaypis mana allikunata rurantsu.
11 Jutsata ruranqanman tupumi pitapis castigan.
Tsaynöpis allita ruraq kaqmanqa bendiciontami churan.†
12 Payqa manami imaypis llutanta rurantsu.
Manakaqkunata pitapis manami jitapantsu.
13 “Llapanpä munayyuq karmi kay patsata munaynincho tsararan.
Paynö munayyuq manami pipis kantsu.
14 Almantsikta jipir jamayniynaqta jaqimashqaqa 15 llapantsikmi illaqpita wanur allpaman tikrashun.†
16 “Yachaq karqa ninqäta shumaq wiyamay.
17 Runa mana allita ruranqanpita mana juzgarqa kay patsatapis Tayta Dios manami munaynincho tsararanmantsu.
Alli mandaq kaykaptinqa ¿imanirtä yarpanki munayyuq Tayta Dios jananpayllapa pitapis juzganqanta?
18 Tayta Diosqa mana jananpaypami pitapis juzgan.
Reykuna y autoridäkuna mana allikunata rurayaptinqa paykunatapis castiganmi.
19 Tayta Diosqa manami autoridäkunallapatsu janan shärin, sinöqa muchuqkunapapis janan shärinmi.
Llapan runakunata kamashqa karmi muchuqkunatapis imaykayuqkunatanölla rikan.
20 Castigaptinqa illaqpitami pullan paqaspis runa wanun.
Tsuktsukyarmi wanuskin.
Pipis mana wanuykätsiptinmi mandaqkunapis illaqpita wanuyan.
21 “Tayta Diosqa rikaykanmi runakuna imata rurayanqantapis.
Payqa musyaykanmi imanö kawayanqantapis.
22 Mana alli runakuna mayjina tsakaykaqman pakakuyaptinpis Tayta Diosqa rikaykanmi.
23 Manarä juzgarpis maynami musyan imanö kawayanqanta.
24 Munayyuqkunata qarquskir jukta trokin churananpäpis pitapis manami tapuntsu.
25 “Munayyuqkuna imata rurayanqantapis Tayta Dios musyanmi.
Mana allita rurayanqanta musyarmi paqaspapis illaqpita ushakätsin.
26 Llapan runakuna rikayänanpämi suwatanö castigan.
27 Paykunaqa mana cäsukuq karmi Tayta Dios munanqannöqa kawayantsu.
28 Mana kuyapaypami muchuqkunatapis ñakatsiyan.
Muchuqkuna mañakuyanqanta wiyarmi Tayta Dios yanapan.
29 “Muchuqkuna mañakuyanqanta Tayta Dios mana cäsuptinqa ¿pirä reclamanman?
Pakakuptinpis ¿pirä tarinman?
Payqa llapan markakunata y runakunatami rikaykan.
30 Tsaynö rikaykan mana alli runakuna mandaq kayman mana yaykuyänanpämi.
Payqa manami munantsu kuyanqan runakunata engañayänanta.
31 “Job, Tayta Diosta perdonta mañakur jutsaykita kachariy.
Llutankunata amana ruraynatsu.
32 Tayta Diosta mañakuy jutsaykikuna ima kanqantapis musyatsishunaykipä.
Payta awniy jutsata yapay mana ruranaykipä.
33 Manakaqman churaykaptikipis ¿munanqaykinötsurä Tayta Dios llapantapis ruranqa?
Ninqäkunata chaskikuy.
Mana chaskikurqa yarpanqaykikunata mä, nimuy.
36 Manakaqkunata parlanqanpita Tayta Dios juzgatsun.
37 Jobqa jutsata ruranqan jananmanmi Tayta Diospa contran parlashqa.
Noqantsiktapis manakaqmanmi churamashqantsik.
Tayta Diostapis manakaqmanmi churashqa”.