35
Mastami Eliú nirqan:2 “Job, ¿imanirtä jutsaynaq kanqaykita nishqayki?
Tsaynö nirqa ¿allitatsurä nikanki?
3 Tsaynöllami Tayta Diosta nishqayki:
‘¿Imatatä jipï jutsata mana rurashqa karpis?’
4 “Kananmi qamtapis amïguykikunatapis tantiyatsiyäshayki.
5 Ciëluta rikar tantiyakuy pukutaykuna altucho kaykanqanta.
Pukutaytaqa imata rurarpis manami kuyutsinkitsu.
6 Tsaynöllami jutsata ruraptikipis Diospäqa imanantsu.
Kutin kutin jutsata rurarpis payta manami qallayätsinkitsu.
7 Mayjina alli runa karpis payta manami yanapankitsu.
Payqa runapita manami imatapis chaskintsu.
8 Mana allita rurarqa kikillaykimi condenakuykanki.
Allita rurarpis manami Diostatsu yanapanki, sinöqa runa mayillaykitami.†
9 “Imaykayuqkuna ñakatsiyaptinmi muchuqkuna waqayan.
Munayyuqkunapa munayninpita jipiyänanpämi pitapis rugakuyan.
10 Tsaynö rugakuykarpis kamakuq Tayta Diospäqa manami yarpäyantsu.
Tsaynöpis manami mañakuyantsu paqaskunapa cantayänanpä kushikuyta shonqunman churaykaptinpis,
11 uywakunapita mas yachaq kayänanpä yachayta qaraykaptinpis
y pishqukunapita mas yachaq kayänanpä tantiyaykätsiptinpis.
12 “Yanapananpä mañakuyaptinpis runa tukuyaptinmi Tayta Dios yanapantsu.
13 Tsaynöpis mana conviëniqta mañakuptinqa manami cäsuntsu.
14 Qamtapis manami cäsushunkitsu yanapashunaykipä kanqanta mana yärakuptikiqa.
Payqa musyaykanmi ñakaykanqaykita.
Tsaynö kaykaptinqa pacienciakuy.
15 “Qamqa nikanki runakuna jutsata rurayaptinpis Tayta Dios mana ajananqanta ni mana castiganqantami.
Tsaynöpis nikanki llutanta rurayaptinpis mana cäsupanqantami.†
16 Tsaynö parlarqa manakaqkunatami nikanki.
Mana tantiyakurmi witsaypa uraypa parlaykanki”.