36
Jobta mastapis Elihú nirqanmi:2 “Tayta Diospa favornin parlanäpä yarpaynïcho kaykanrämi.
Tsaynö kaykaptinqa yarpanqäta ninäpä pacienciayki kaykullätsun.
3 Kamakuq Tayta Diosqa imaypis allikunatami ruran.
Tsaynö kanqantami kanan tantiyatsishayki.
4 Musyanqaykinöpis rasunpaypa yachaq runami kä.
Mana llullakuypami rasun kaqllata nishayki.
5 “Tayta Diosqa munayyuq karmi llapanta musyan.
Payqa pitapis manami manakaqman churantsu.
6 Mana alli runakunataqa manaräpis höranchömi ushakätsin.
Ñakaqkunapami itsanqa janan shärin.
7 “Alli runakunataqa Tayta Diosmi ima desgraciapitapis tsapan.
Reykunata mandar yanapayänanpämi churan.
Tsaynöpis alli kawayänanpämi yanapan.
8 “Tsaynö karpis aybësisqa cadënawan wataraqnömi ñakayan.
9 Tsaynö kaptinmi Tayta Dios tantiyatsin jutsata rurayanqanpita y runa tukuyanqanpita ñakayanqanta.
10 Tsaynöpis tsay ñakaywanmi tantiyatsin jutsa rurayta kachariyänanpä.
11 Jutsankunata kacharir Tayta Dios munanqannö kawarqa kushishqami wanuyanqanyaq kawayanqa.
12 Mana wiyakurmi itsanqa manaräpis unayta wanuyanqa.
13 “Diosta mana cäsukuqkunaqa ajanashqami kawayan.
Tayta Dios castigaptinpis manami perdonta mañakuyantsu.
14 Jutsa rurayllacho penqakuypä kawarmi chölullarä kaykar wanuyan.
15 Tsaynö kaptinpis jutsa ruraykunata kachariyänanpämi ñakaykunawan Tayta Dios tantiyatsin.
16 “Job, qamtapis Tayta Diosmi wanuypita salvashunki.
Añaw kawanaykipämi yanapashunki.
Alli mikuyta mikur kawanaykipämi kamaripäshunki.
17 “Tsaynö karpis kananqa castigaykäshunkimi.
Paypa makinpitaqa manami qeshpinkitsu.
18 Ñakarpis ama yarpaytsu pägaptiki Tayta Dios salvashunaykipä kanqanta.
19 Ñakanqaykipita salvashunaykipäqa imaykayuq kanqaykipis manami välintsu.
Mayjina alli chölu karpis manami qeshpinkitsu.
20 Tsaynöpis ñakaypita qeshpiyta munar wanuyta ama ashiytsu.
21 Tsaypa trokinqa jutsa ruraykunata kachariy.
Jutsata ruranqaykita tantiyakur kacharinaykipämi Tayta Dios ñakaykätsishunki.
22 “Tayta Diosqa llapanpä munayyuqmi kaykan.
Paymanqa manami pï yachatsikuqpis tinkuntsu.
23 Paytaqa manami ni pipis mandanmantsu.
Imata ruraptinpis manami ni pipis reclamanmantsu.
24 Tsaypa trokinqa llapan kamanqanta rikarmi pïmaypis payta alabayan.
Tsaynölla qampis mana qonqaypa payta alabay.
25 “Tayta Dios kamanqankunataqa llapantsikmi rikaykantsik.
Tsaynö kaptinpis karullapita rikaqnö karmi llapantaqa tantiyantsiktsu.
26 Tayta Dios munayyuq kanqantapis manami shumaqllaqa tantiyantsiktsu.
Ayka watayuq kanqantapis manami musyantsiktsu.
27 “Tayta Diosqa munayyuq karmi tamyatapis tamyatsimun.
28 Pukutaypita tamyatsimurmi kay patsata ushmatsin.
29 Manami pipis musyantsu imanöpa pukutayta yuritsimunqantapis.
Tsaynöpis manami pipis mayantsu maqakuyta imanö bunrurütsimunqanta.
30 Entëru lamar jananpami Tayta Dios illaqukuyta chipipïtsimun.
Lamar rurinyaqmi atsikyaynintapis chätsin.
31 “Tsaynö munayyuq karmi Tayta Diosqa llapan nacionkunaman bendicionninta churamun.
Tsaynöpami mikuypis atska kaykan.
32 Munayyuq karmi illaqukuytapis makinwan jitamun.
Jitamurmi maymanpis munanqanman chätsin.
33 Tsaynö maqakatsimurmi musyatsimantsik ajanaykanqanta.
Tsaynöpami musyatsimantsik jutsa ruraqkunata castigananpä kanqanta.