37
“Tayta Dios munayyuq kanqanta tantiyakuptïmi shonqüpis pasaypa utukyan.2 ¡Tayta Dios parlamunqanta wiyayay!
Pay parlamunqanqa illaqukuynörämi wiyakämun.
3 Paymi ciëluta illaqukuywan atsikyätsin.
Tsay atsikyaywanmi kay entëru patsapis rikakan.
4 Ciëlupitami pasaypa mantsariypä bunrurümun.
Tsaynö bunrurümuptinmi illaqukuypis ichintsu.
5 Tayta Dios tsaynö bunrurütsimuptinmi imata ruraykanqantapis mana tantiyar pasaypa mantsakantsik.
6 “Paymi rashtatapis kay patsaman rashtatsimun y tamyatapis pasaypa tamyatsimun.
7 Tsaynö tamyatsimuptinmi llantukuyänanpä wayinkunaman qeshpiyan.
Tsaynöpami munayyuq Tayta Dios kanqanta tantiyayan.
8 Jirka uywakunapis machaykunamanmi llantukuyänanpä aywayan.
9 Surläpitami shukukuy wayrata wayratsimun.
Nortiläpitanami alayta chätsimun.
10 Pükaptinmi tsururupis rurakan.
Tsaynöllami lamar yakupis ritin.
11 “Tayta Diosmi kamakätsin yakuta pukutay joqarinanpä.
Tsaynöllami pukutaypita maqakuytapis pashtatsimun.
12 Pukutaykunataqa munanqanpami maypapis puritsin.
Entëru munduchömi pay mandanqanta rurayan.
13 Kay patsaman tamyatsimurmi bendicionninta churamun.
Pasaypa tamyatsimurqa castiganmi.
14 “Job, mantsakaypä kaqkunata Tayta Dios ruranqanta shumaq tantiyakuy.
15 ¿Qam musyankiku imanöpa llapan tsaykunata ruranqanta?
¿Musyankiku illaqukuyta imanöpa atsikyätsimunqanta?
16 ¿Musyankiku pukutayta imanöpa almiraypä puritsinqanta?
Tsaykunata rikarmi tantiyantsik Tayta Dios yachaq kanqanta.
17 “¿Musyankiku sur kaqläpita wayratsimuptin imanir alläpa achätsikunqaykita?
18 ¿Tayta Diosta yanapankimantsurä ciëlupita pasaypa achätsimunanpä?
19 “Noqakunaqa tsakaychönö karmi musyayätsu Tayta Dios juzgayämaptin imata niyänäpäpis.
Yachaq karqa mä tantiyatsiyämay.
20 Noqaqa paywan parlayta mantsarïmi.
Paywan parlarqa wanukümanchi.
21 “Pukutay tsaparaptinqa rupaypis manami rikakantsu.
Pukutayta wayra pükariptinmi itsanqa ciëlupis chipikyaskin.
22 Norti kaqläpami rancha pukutaynö atsikyay rikakämun.
Tsayqa kaykan Tayta Dios munayninwan shamunqanmi.
23 Payqa pasaypa munayyuq karmi imaypis allillata ruran.
Pitapis llutallaqa manami ñakatsintsu.
Ruranqanta manami tantiyayta kamäpakuntsiktsu.
24 Llapanpä munayyuq kanqanta tantiyarmi runakuna mantsariyan.
Yachaq tukuq runakunataqa manami imapäpis cuentantsu”.