Job mana yachaq kanqanta Tayta Dios tantiyatsinqan
38
Tsaymi shukukuy wayrapita Jobta Tayta Dios nimurqan:2 “¿Pitä kanki llutanta ruraq kanqäta nimänaykipä?
¿Pitä kanki mana tantiyakuypa parlanaykipä?†
3 Rasunpaypa yachaq karqa tapuptï nimänaykipä shumaq kamarikuy.†
4 ¿Maychötä karqayki kay patsata kamanqä höra?
Rasunpaypa yachaq karqa ¡mä nimay!
5 ¿Musyankiku kay patsa ima tamäñu kananpä pï ninqantapis?
¿Musyankiku kay patsata cordelwan pï tupunqantapis?
6 ¿Ima jananchötä kay patsa jamaraykan?
¿Pitä kay patsa jamaränanpä alli rumita cimientunman churashqa?
7 Tsay hörami waraq qoyllurkuna llapanpis cantayarqan.
Tsaynöllami angelnïkunapis pasaypa kushikuyarqan.
8 “Lamar yaku patsapita pashtamunqan höra ¿pitä kuchunta churashqa tsaypita mana päsananpä?
9 Lamarpa latsapannö kananpä noqami pukutayta churashqä.
Tsaynöllami tsaparänanpä tsakayta churashqä.
10 Lamar mayyaqlla chänanpäpis noqami señalta churashqä.
Tsaypita mana päsananpäpis noqami punkunta llävishqä.
11 Llävirmi nirqä: ‘Kayyaqllami chämunki.
Mayjina altuta pulchaqyarpis kaypitaqa ama päsankitsu’.†
12 “¿Imayllaqa patsa waränanpä qam mandashqaykiku?
13 Patsata warätsiptïmi suwakuna y wanutsikuqkuna mantsarir pakakuyan.
14 Jirkakuna imanö kanqanpis rikakanmi.
Latsapapanörämi colorninkunapis rikakäyan.
15 Patsa waraptinqa suwakunapis manami suwakuyannatsu.
16 “¿Lamar rurinman yaykurqaykiku?
¿Rikarqaykiku lamar yaku maypita pashtamunqantapis?
17 ¿Reqinkiku wanushqakunapa alman kaykanqanman yaykuna punkuta?
18 ¿Musyankiku kay patsa ima tamäñu kanqantapis?
Rasunpaypa musyarqa mä willamay.
19 “¿Maypatä näni aywan atsikyaypa wayinman?
¿Maychötä tsakaypa wayin?
20 Atsikyaytawan tsakayta kay patsapa kuchunyaq ¿apayta kamäpakunkimantsurä?
Tsaykunata wayinman yapay ¿kutitsinkimantsurä?a
21 Tsakaypis atsikyaypis manarä kaptin yurishqa karchi tsaykunata cösa musyanki, ¿aw?
22 “¿Qam chashqaykiku rashta churaräkunan kaqman?
¿Runtu tamya churaranqanman chashqaykiku?
23 Tsaykunataqa churaraykätsï guërra kaptin conträkunata atacanäpämi.†
24 “¿Maypitatä atsikyay yarqamun?
¿Imanötä rupay yarqamunanpita shamuq wayra entëru patsaman mashtakan?
25 “¿Pitä mangäda tamya chämunanpä ciëlupita kay patsayaq sekyata rurapan?
¿Pitä maqakuykuna y illaqukuykuna shayämunanpä nänita rurapan?
26 ¿Pitä pipis mana tanqan jäkuq jirkakunaman tamyatsimun?
27 ¿Pitä patsata ushmatsin qewakuna shumaq wiñananpä?
28 “¿Pitä tamyapa taytan?
¿Pipa tsurintä shullya kaykan?
29 ¿Pitä tsururupa maman?
¿Pitä qajapata wachashqa?
30 ¿Pitä ruminö kananpä lamar yakuta tsururuyätsin?
31 “Qamqa Pléyades qoyllurkunata ¿watayta puëdinkiku?
Orión qoyllurkunatapis wataraykanqanpita ¿paskayta puëdinkiku?†
32 Qoyllurkunata hörancho ¿qamku yarqatsimunki?
¿Qamku pushanki Llama qoyllurkunata y Tsakwa qoyllurkunata?
33 “¿Musyankiku ciëlupa leyninkuna imanö kanqantapis?
¿Ninqaykinöku kay patsacho llapanpis rurakan?
34 Tamyamunanpä pukutaykunata ¿ordenayta yachankiku?
35 Mayninmanpis illaqukuy chänanpä mandaptiki ¿cäsushunkiku?
36 “Gälluta y pishqukunata ¿pitä yachayta qoshqa?
37 ¿Pitä shumaq tantiyakuq kaykan pukutayta yupananpä?
¿Pitä tamyatsimun?
38 Tamyamuptinmi allpapis mituman tikrar kurpakunapis oqur ushakan.
39 “Leonkuna mikuyänanpäpis ¿qamku uywakunata apapanki?
León mallwakuna mallaqäyaptinpis ¿qamku pachan qaranki?
40 Pakakunancho punuykaptin o shatakunacho cäzaykaptin ¿qamku mikuyta kamaripanki?
41 Cuervukunab mikuyta ashir wakpa kaypa puriyaptin ¿qamku mikuyta kamaripanki?
Pushapankuna mallaqar mañakayämaptin ¿qamku mikuyta kamaripanki?