39
“¿Musyankiku munti cabrakuna imay wachayanqanta?¿Rikashqaykiku lluytsukuna wachaqta?
2 ¿Musyankiku qollpanqanpita ayka killata wachanqantapis?
3 Qoshpaykanqancho wachaskiptinqa nanayninpis päsaskinmi.
4 Wawankunapis llushuy llushuyrä wiñarkurmi mamanta jaqiskir maypapis aywakuyan.
5 “¿Pitä chucaru ashnuta libri purikunanpä destinashqa?
¿Pitä tsaynö kananpä kamakätsishqa?
6 Noqami kamakätsishqä tsunyaq jirkacho tänanpä.
Qewa mana kanqancho kawananpämi churashqä.
7 Tsay uywakuna markacho mana yachakäyaptinmi pipis chaqnakuntsu.
8 Pipis mana tanqanchömi alli qewata ashir jirkakunapa puriyan.
9 “¿Büfalutaa yügunkimantsurä?
¿Corralcho pununanpä wichqankimantsurä?
10 ¿Büfaluwan yapyankimantsurä?
¿Chakraykicho yapyananpä pushapankimantsurä?
11 ¿Kallpasapa kaptintsurä büfaluman yärakunkiman?
¿Arutsiyta kamäpakunkimantsurä?
12 Tsay büfaluwan ¿tsaki mikuynikikunata ëraman ashtankimantsurä?
13 “Maski tantiyakuy älankunata avestruz kushishqa tapsikunqanta.
Avestruzpa plümanpitapis mas kuyayllapämi cigüeñapa plümankuna.
14 Avestruzqa allpallacho wachaskir mana oqllaypami kachaykun.
Tsayllachömi achaywan qoñurir pashtakun.
15 Manami yarpachakuntsu runa jarunanpä ni uywakuna jaruyänanpä kanqantapis.
16 Chipshankunatapis manami cäsuntsu.
Kikin wachashqa kaykarpis manami kuyantsu.
17 Tsaynö kaykan mana tantiyakuqta y yarpayniynaqta kamashqa kaptïmi.
18 Tsaynö karpis cörriyta qallaykurqa cawallu muntashqa aywaqtapis pasaypami llallin.
19 “¿Qamku cawallutapis kallpata qonki?
¿Qamku matankancho aqtsantapis wiñatsishqayki?
20 ¿Qamku chukllushtanörä saltaykachätsinki?
Buryanqanpis pasaypa mantsaypämi.
21 Kallpanman yärakurmi patsatapis ashpinrä.
Mana mantsariypami guërramanpis aywan.
22 Manami imatapis mantsantsu.
Espädata rikarpis manami qeshpintsu.
23 Janancho flëchakuna shaqraraptinpis manami utukyantsu.
Espäda y lanza chipipiykaqta rikarpis manami mantsantsu.
24 Tsaynöpis pasaypa ajanashqa karmi allpatapis ashpinrä.
Cornëta waqamuptinqa jinan hörami guërraman yaykun.
25 Pelyayänanpä qayakuptinqa masrämi wishushüyan.
Guërracho capitankuna qayaykachäyanqanta y bülla kanqanta karupita wiyarmi pasaypa löcuyan.
26 “Sur kaqläman anka pajananpä ¿qamku yarpayta qoshqayki?
27 Manami qam mandaptikitsu ankapis pajan ni qaqacho qeshuntapis ruran.
28 Payqa altunnin qaqakunachömi täkun.
29 Tsaypita patsami imatapis tsarinanpä rikachakur mayjina karumanpis rikan.
30 Pushapankunapis tsaychömi yawarta upuyan.
Wanushqa uywa kanqanchömi tsaykunaqa kaykäyan”.