40
Tsaynöllami Jobta Tayta Dios nirqan:2 “Noqawan rimanakuyqa ¿yachaq kaytsurä?
Noqawan rimanakuyta munarqa mä nimay”.†
3 Tsaymi Tayta Diosta Job nirqan:
4 “Imapäpis mana yachaq karmi imatapis parlayta kamäpakütsu.
Tsaymi upällakur makïwan shimïta tsapakü.
5 Parlashqa karpis mastaqa mananami parlakushänatsu.
Yapayqa manami parlashänatsu”.
6 Shukukuy wayra rurinpitami Jobta Tayta Dios nimurqan:
7 “Rasunpaypa ollqu karqa tapuptï nimänaykipä shumaq kamarikuy.†
8 ¿Imanirtä ‘mana allitami ruran’ nimanki?†
¿Jutsaynaq kanqaykita yarparku tsaynö acusamanki?
9 ¿Noqanö kallpasapaku kanki?
¿Maqakuynöräku parlanqaykipis wiyakan?
10 Rasunpaypa tsaynö karqa mä munaynikicho kaqkunata noqanö manday.
Noqanö alabashqa kanaykipä mä corönaykita jatikuy.
11 Ajanashqa karqa mä imatapis ruray.
Runa tukuqkunata mä castigay.
12 Paykunata mä penqakuyman churay.
Mana alli runakunatapis mä ushakätsiy.
13 Tsay runakunata ushakaskatsir mä pampay.
Puëdirqa mä llapanta tsakayman wichqay.
14 Tsaynö ruraptikiqa munayyuq kanqaykipitami kikï felicitashayki.
15 “Kananqa rikay behemotta.a
Qamta kamanqänöllami paytapis kamashqä.
Tsay uywaqa törunömi qewata mikun.
16 Matankancho y rikrankunacho kallpan imanö kanqantapis tantiyay.
17 Chupanpis cedru qerunömi kuyun.
Ankunkunapis reyätanörämi.
18 Tullunkunapis broncinörämi.
Chankankunapis fiërrunörämi.
19 “Tsay uywataqa llapan uywapitapis mas kallpasapatami kamarqä.
Kamashqa karmi ushakätsinäpäpis munayyuq kä.
20 Behemot mikunanpämi jirkakunachöpis qewa wiñamun.
Tsaychömi jirka uywakunapis pañar cörrikachäyan.
21 Llimllasapa qeru chakinchömi punun.
Ututukuna kanqan mituchömi pakaran.
22 Jachakunami llimllanwan llanturan.
Mayu kuchuncho saucikunami jiruruypa llanturäyan.
23 Mayu bunyaypa bunyar aywaptinpis manami mantsantsu.
Senqanyaq yaku tsapaptinpis manami imapis qokuntsu.
24 Rikchaykaqta ¿pirä tsarinman?
¿Pirä senqanta uchkuskir argöllata churapanman?