41
(40.25) “Mantsaypä Leviatán waräkuyta† ¿anzuëluwan tsarinkimantsurä?¿Qallunta waskawan watankimantsurä?
2 (40.26) ¿Waskawan senqanpita tsarinkimantsurä?
¿Anzuëluwan quijädanta uchkunkimantsurä?
3 (40.27) “Rugakushurniki Leviatán ¿qamman qonqurikamunmantsurä?
¿Alli shimillanpatsurä kuyapänaykita munar mañakushunkiman?
4 (40.28) ¿Wätaynö imayyaqpis sirvishunaykipä qamwan pactuta ruranmantsurä?
5 (40.29) ¿Pushapawan pukllanqaykinötsurä Leviatanwan pukllankiman?
¿Wamraykikuna pukllayänanpä watapankimantsurä?
6 (40.30) “Leviatanta ¿pillaqa mercäducho rantikunmantsurä?
¿Rantikunaykipä pedäzu pedäzu roqunkimantsurä?
7 (40.31) ¿Flëcharpis qaranta päsatsinkimantsurä?
Lanzawanpis ¿umanta tuksinkimantsurä?
8 (40.32) “Musyaykunaykipä maski yatayllapis yataykuy.
Yataykunqaykitachi musyankimanqa.
Tsaypitaqa manami imaypis wajupankimannatsu.
9 (1) “Leviatanta tsariyta munarpis manami kamäpakunkitsu.
Payta rikaykurqa pïmaypis mantsariyllawanmi unyaskiyan.
10 (2) Manami pipis wajupayta valurantsu.
“Leviatanllatapis ichipayta mana kamäpakuykarqa ¿pirä noqata ichipämanman?
11 (3) Mandamänanpä ¿pirä munayyuq kanman?
Llapanpis noqallapa kaykaptinqa pipis manami imatapis kamaripämanmantsu.
12 (4) “Leviatanpa chakinkuna imanö kanqanta y kallpasapa kanqantaqa imaypis parlaykäshämi.
13 (5) ¿Pirä pishtar qaranta jipinman?
Alläpa chukru kaptin manami pipis roquyta kamäpakuntsu.
14 (6) Kirunpis pasaypa mantsaypä kaykaptinqa ¿pirä senqanpitapis amirkunman?
15 (7) Waqtanpis ruminömi pasaypa chukru kaykan.
16 (8) Atska escüdu laqanakushqanö kaptinmi wayrapis päsantsu.
17 (9) Tsaynö kaptinmi imapis kichayta kamäpakuntsu.
18 (10) “Wishqakuptinqa illaqukuynörämi senqanpa yarqamun.
Ñawinkunapis rupay yarqamuqnörämi atsikyan.
19 (11) Shiminpitami ninapis chispapis yarqamun.
20 (12) Manka timpuptin wapuy yarqunqannömi senqanpitapis wapuy yarqun.
21 (13) Ninatapis jamayninqa tsaritsinmi.
Shiminpitapis lunyaykaq ninami yarqun.
22 (14) “Kunkan kallpasapa kaptinmi llapanpis pasaypa mantsariyan.
23 (15) Cuerpuncho mas llampu kaq aytsanpis fiërrunö chukru kaptinmi imapis yaykuntsu.
24 (16) Shonqunpis mulinu ruminö chukrumi.
25 (17) “Leviatán kuyur qallaptinqa munayyuq runakunapis pasaypa mantsarirmi qeshpir aywakuyan.
26 (18) Espädawan tuksirpis manami nanätsiyantsu.
Lanzapis y flëchapis tsay waräkuytaqa manami imananpistsu.
27 (19) Fiërruwan takayaptinpis tsay waräkuypäqa oqshanöllami kaykan.
Bronciwan wiruyaptinpis ismushqa qerunöllami jananman chan.
28 (20) Flëchayaptinpis manami qeshpintsu.
Warakayanqanpis päjanöllami chan.
29 (21) Jatun mäsuwan takayaptinpis manami nanätsikuntsu.
Lanzawan tuksiyaptinpis manami cäsuntsu.
30 (22) “Pachancho escäman tëja pakipinörä kapti kapti kaptinmi mitupa aywanqanpis sekya rurashqanörä rikakun.
31 (23) “Lamarpa aywarpis yakuta pulchaqyätsirmi mankacho yaku puwar pushuqaqtanörä pushuqätsin.
32 (24) Aywaptin qepanpaqa yakupis pasaypa yuraqrämi quëdan.
Lamarpis yuraq bayëta mashtashqanörämi rikakan.
33 (25) “Leviatanmanqa manami ima uywapis kay patsacho tinkuntsu.
Leviatanqa manami imatapis mantsantsu.
34 (26) Mas munayyuq uywakunatapis manakaqmanmi churan.
Llapan chucaru uywakunapitapis mas kallpayuqmi kaykan”.