2 Tsay witsanmi noqa Daniel yarpachakur kimsa semäna pasaypa llakikurqä. 3 Tsaynö llakikurmi alli mikuyta ni aytsatapis mikurqätsu ni vïnutapis upurqätsu ni perfümitapis wiñakurqätsu.

4 Punta kaq killacho^a ishkay chunka chusku (24) kaq junaqchömi Tigris mayu kuchuncho kaykarqä. 5 Ñukirkunqächömi rikarqä lïnu fïnu latsapashqa runa ñöpächo ichiraykaqta. Paypa wachukunqa fïnu qoripita rurashqami karqan. 6 Cuerpunpis berilo ruminörämi chipipirqan. Qaqllanpis illaqukuynörämi chipipirqan. Ñawinkunapis aktsinörämi atsikyarqan. Rikrankuna y chakinkuna chipipiykaq broncinömi karqan. Atska runakuna parlaykaqnömi parlanqanpis wiyakarqan.^†

7 Noqa japallämi tsay revelacionta rikarqä. Noqawan kaykaq runakunaqa manami imatapis rikayarqantsu. Paykunaqa pasaypa mantsarirmi pakakuyarqan. 8 Tsay revelacionta rikanqä höra kikillänami kaykarqä. Pasaypa mantsariywan almatakaptïmi kallpäpis karqannatsu. 9 Parlanqanta wiyarmi patsaman uksikaypa ishkirqä.

10 Tsay höra makinwan shäritsimaptinmi qonqurikuykur tsuktsukyaykar maki paltalläwan tukmakurqä. 11 Tsaymi nimarqan: “Daniel, shäriy. Tayta Diosmi kuyashurniki qamwan parlanäpä kachamashqa. Kanan ninqäta shumaq wiyamay”.

Tsaynö nimaptinmi tsuktsukyaykar ichirkurqä. 12 Tsaymi nimarqan: “Daniel, ama mantsariytsu. Revelación rikanqaykita tantiyanaykipä mañakuyta y ayunayta qallaykunqayki junaqpitami Tayta Dios wiyashushqayki. Tsaymi shamushqä tantiyatsinäpä.

13 “Ishkay chunka juk (21) junaqmi Persia nacionpa mandaqnin ángel tsaparämashqa. Angelkunapa mandaqnin Miguel yanapamänanpä shamuptinmi^† Persia nacionpa mandaqnin angelwan pelyananpä tsaycho kachaykushqä. 14 Revelacionta rikanqaykiqa kaykan Israel runakunata ushanan tiempucho päsananpä kaqkunami. Tsayta tantiyatsinäpämi shamushqä”.

15 Tsaynö parlapämaptin imatapis mana parlayllapami umpuräkurqä. 16 Tsaynö kaykaptïmi juk runa niraq illaqpita yuriskamur shimïta yataykamarqan. Tsaymi parlapaykämaq runata nirqä: “Taytay, revelacionta rikanqäpita pasaypa llakikuptïmi kallpäpis kannatsu. 17 Parlanäpäpis manami kallpä kannatsu. Tsaymi imayka wanuykaqnöna kaykä”.

18 Tsaymi tsay runa niraq yapay yataykamaptin kallpä yurirkurqan. 19 Nirkurnami nimarqan: “Tayta Dios kuyaykäshuptikiqa ama mantsariytsu. ¡Valorta tsariy!”

Tsaynö parlapaykämaptinmi kallpä yurirkurqan. Tsaymi nirqä: “Taytay, kananqa valornï kannami parlapämanqaykita wiyanäpä”.

20 Tsaymi nimarqan: “Imapä shamunqätapis ¿musyankiku? Kananqa Persia nacionpa mandaqnin angelwan pelyanäpämi kutishä. Nirkurnami Grecia nacionpa mandaqnin ángel shamunqa. 21 Tsay mandaq angelkunawan pelyaptï qamkunata cuidashuqniki ángel Miguelmi yanapaman. Paypita masqa manami pipis kantsu yanapamänanpä. Pelyaq manarä aywarmi Libru de la Verdadcho ima qellqaraykanqantapis tantiyatsishayki”.