2 “Kanan willashayki imapis päsananpä kaqkunata. Persia nacionchömi kanqa kimsa reykuna. Paykunapa qepanmanpis mas juk reyrämi kanqa. Tsay reymi kimsa kaq reykunapitapis mas imaykayuq kanqa.^a Imaykayuq y munayyuq karmi llapan mandanqan nacionkunawan Grecia nacionpa contran shäriyanqa.

3 “Tsaypitanami mas munayyuq rey kanqa.^b Paymi maytsay nacionkunata vinciskir munaynincho tsararanqa. 4 Tsaynöpami atska nacionkunata jukllaylla kananpä qorinqa. Nirkurnami chusku nacionman rakikanqa. Juk kanqa norti kaqläpa, juk kanqa sur kaqläpa, juk kanqa rupay yarqamunan kaqläpa y juk kanqa rupay jeqanan kaqläpa.

“Tsay reypa trokin manami paypita aywaraqkunatsu mandaq kayanqa, sinöqa jäpa runakunami. Paykunaqa manami punta kaq rey munayyuq kanqannönatsu kayanqa. 5 Tsaynö kaykaptinpis Egipto nacionpa mandaqnin rey^c munayyuq rikakuptin soldädunkunapa capitanninmi mas munayyuq rikakunqa.^d Tsaynö karmi atska markakunatapis munaynincho tsararanqa.

6 “Tsaypita atska watakuna päsaskiptinnami Egipto nacionpa mandaqnin reyqa Siria nacionpa mandaqnin reywan alli kawayänanpä jipash tsurinta paywan majatsakätsinqa. Tsaynö majatsakätsiptinmi tsay warmita illaqpita wanutsinqa wamrantinta, runantinta y cuidaq soldäduntinta.^e 7 Tsaynö wanutsiptinmi tsay wanuq warmipa turin soldädunkunawan aywanqa Siria nacionpa mandaqnin reywan guërrata rurananpä. Murallashqa markaman yaykurmi vinciykur munaynincho katsinqa. 8 Tsaypita Egiptuman kutikurmi ïdulukunata y qellaypitawan qoripita rurashqa alhäjakunata apakunqa. Tsaypitaqa Siria nacionpa mandaqnin reywan atska wata manami wajupänakuyanqatsu.

9 “Tsaypitanami Siria nacionpa mandaqnin rey aywar Egipto nacionpa mandaqnin reyta soldädunkunawan atacayanqa. Vinciyta mana kamäpakuykurmi markanman kutikunqa.

10 “Tsaypitanami tsurinkuna kamarikuyanqa Egiptuman kutir yapay atacayänanpä. Atska soldädukunata qoriykurmi empëñu aywayanqa imaykatapis apaq cargashqa mayunö. Reypa murallashqa markanman chaykurmi atacayanqa. 11 Tsaymi pasaypa rabyanarnin Egipto nacionpa mandaqnin rey guërrata rurananpä soldädunkunawan yarqamunqa. Jinatami vincinqa atska soldäduyuq kaptinpis. 12 Llapanta vinciskirmi tsay reyqa pasaypa allish tukur contrankunata waranqanpa waranqanpa wanutsinqa. Tsaynö kaptinpis tsay reypa munayninqa wallka tiempullami kanqa.

13 “Watakuna päsaskiptinnami Siria nacionpa mandaqnin rey yapay qorinqa atska soldädukunata. Tsay soldädukunaqa mas atska y mas alli kamarikushqami kayanqa. Paykunawanmi kutinqa Egipto nacionpa mandaqnin reyta atacayänanpä.

14 “Tsay witsanmi Egipto nacionpa mandaqnin reypa contran atskaq shäriyanqa. Tsaynöllami achäquita ashipäkuq Israel mayikikunapis paypa contran shäriyanqa. Tsaynö shärirpis mana vinciyaptinmi revelacioncho Tayta Dios tantiyatsinqan cumplinqa.

15 “Siria nacionpa mandaqnin reymi soldädunkunawan aywar murallashqa marka waqtanman allpata qotuyanqa tsaypa yaykuykur atacayänanpä. Atacaptinmi Egipto nacionpa soldädunkuna mayjina alli chölu karpis imanaytapis kamäpakuyanqatsu. 16 Tsay atacaq soldädukunami tsay markata chipyaq ushakätsiyanqa. Nirkurnami kuyayllapä Israel naciontapis munayninman churayanqa.

17 “Tsaypitanami Siria nacionpa mandaqnin reyqa Egipto nacionta imanöpapis vinciyta munar tsay nacionpa mandaqnin reywan warmi tsurinta majatsakätsinqa. Tsaynö majatsakätsinqa warmi tsurin rikapakuskir willaptin traicionpita atacayta yarparmi. Tsaynö majatsakätsiptinpis manami yarpanqannötsu kanqa.

18 “Tsaymi Siria nacionpa mandaqnin rey jukläman aywar^f lamar kuchuncho kaykaq atska markakunata vincinqa. Jinatami juk nacionpita shamuq capitán^g vincinqa. Tsaymi tsay reyqa pasaypa penqakushqa rikakunqa. 19 Tsaypitanami reyqa kutikunqa murallashqa markanman. Tsaychömi desgracia päsaptin wanur ushakanqa.

20 “Tsay reypa trokinnami juk rey yaykunqa. Paymi mandanqan nación mas munayyuq kananta munar impuestuta cobramunanpä runata kachanqa. Guërra mana kaykaptinmi manaräpis unayta wanunqa.

21 “Tsay reypa trokinmi mana alli runa llullakuypa rey kananpä yaykunqa.^h Tsaynö yaykunqa rey juk yaykunan kaykaptinmi. 22 Nirkunami cargashqa mayu imaykatapis apaqnö contran shäriq runakunata llapanta wanutsir ushanqa. Tsaynöllami wanutsinqa Tayta Diosta sirviq mandaq sacerdötitapis.ⁱ 23 Tsay reyqa imaykata awnirmi y engañarmi munayyuq kanqa. Tsaynö kanqa wallkaqlla runakuna favornin kaykaptinmi.

24 “Tsay runami imaykayuq runakuna täyanqan markakunaman soldädunkunawan illaqpita yaykuyanqa imaykankunatapis apakuyänanpä. Manami tsay nacioncho mayqan mandaqpis paynö rurayta kamäpakushqatsu. Tsaynöllami guërracho vincir apakunqankunata yanapaqninkunata rakipanqa. Pasaypami yarpachakunqa murallashqa markakunata imanöpapis atacananpä. Tsaynö kaptinpis juk tiempullami tsaynö kanqa.

25 “Tsay reyqa kallpanman yärakuykurmi Egipto nacionpa mandaqnin reyta atska soldädunkunawan atacayanqa. Tsaynö atacaptinmi Egipto nacionpa mandaqnin reyqa atska soldädukunata qoriykur ichipäyanqa. Tsaynö ichiparpis yärakunqan runakuna traicionaptinmi vinciyta kamäpakuyanqatsu. 26 Mikur upur qorikäyanqan amïgunkunapis ushakänantami munayanqa. Tsay pelyachömi atska soldädunkuna wanuyanqa.

27 “Tsaypitanami tsay ishkan reykuna jamaykur willanakurpis shonqunkunachöqa mana allita yarpaykäyanqa. Tsaynö kaptinpis ushakäyänanta Tayta Dios manarä munaptinmi tsay reykuna munayanqannöqa kanqatsu.

28 “Siria nacionpa mandaqnin reymi guërrapita qorinqan riquëzakunata apakurkur markanman kutinqa. Markanman kutiykanqanchömi Tayta Diosta adoraqkunata atacanqa. Tsaynö yarpanqankunata ruraskirmi markanman chanqa.

29 “Desgracia päsananpä höra chämuptinmi tsay reyqa Egipto nacionta yapay atacanqa. Ñöpata vincishqa karpis yapayqa manami vincinqanatsu. 30 Tsaynö vincinqatsu Quitimpita^j soldädukuna büquinkunawan shamurnin atacaptinmi.

“Tsaymi ima ruraytapis mana kamäpakur pasaypa ajanar markanman kutirnin Diosta adoraqkunata yapay atacanqa. Diosta mana adoraqkunawanmi itsanqa kuyanakunqa. 31 Soldädunkunami Jerusalén templuman yaykur impüruyätsiyanqa.^k Sacrificiuta Tayta Diospä sacerdötikuna qoyay qoyay rupatsiyänantapis manami munanqatsu. Tsaypa trokinmi Tayta Dios mana munanqan kaqta templuman churanqa.^†

32 “Yanapayänanta munarmi tsay reyqa Tayta Diosta manana cäsukuqkunata imaykanöpa engañanqa. Tayta Diosman yärakuqkunami itsanqa mana mantsariypa payta ichipäyanqa. 33 Tsaymi tantiyakuq runakuna atska runakunata yachatsiyanqa Tayta Diosta imaypis sirviyänanpä. Tsaynö kaykaptinpis wakintami espädawan wanutsiyanqa, wakintami rupatsiyanqa, wakintami prësu apayanqa y wakinkunapatanami imaykankunatapis qechur apakuyanqa. 34 Tsaynö ñakaykätsiyaptinmi wakin runakunaqa tsay tantiyaq runakunata yanapayanqa. Wakinmi itsanqa janan shonqulla paykunawan qorikäyanqa.

35 “Wakin tantiyakuq runakunata ñakatsiyaptinmi tantiyakuyanqa imanö ñakarpis Tayta Diosman yärakur jutsata mana rurar kawayänanpä. Tantiyakuqkuna tsaynö ñakayanqa tiempun cumplinqanyaqmi.

36 “Tsay reyqa munanqantami ruranqa. Tsaymi chölu tukurnin llapan dioskunapita mas munayyuq kanqanta yarpar^† llapanpä munayyuq Tayta Diospa contran mantsariypä kaqkunata parlanqa.^† Tsaynö kaptinpis Tayta Dios castiganan hörayaqllami munayyuq kanqa. Päsananpä kaqkunaqa päsanqami.

37 “Tsay reyqa ima diostapis mana respitarmi cäsukunqatsu unay castankuna adorayanqan dioskunata ni warmikuna adorayanqan dioskunatapis. Tsaypa trokinqa yarpanqa llapan dioskunapitapis mas munayyuq kanqantami. 38 Tsaynö karpis unay castankuna mana adorayanqan diostami adoranqa. Tsay diosqa murallashqa markakunata cuidaq diosmi kaykan. Payta adorananpämi apanqa qorita, qellayta, kuyayllapä rumikunata y kuyayllapä adornukunata.

39 “Unay castankuna mana adorayanqan diosman yärakurmi alli murallashqa munayyuq markata atacanqa. Vincirkurmi janan shäriq runakunata churanqa atska markakunacho gobernador kayänanpä. Tsaynöllami yanapayanqanpita kushikur chakrakunatapis herenciapä rakipanqa.

40 “Höra chämuptinnami tsay reyta Egipto nacionpa mandaqnin rey atacanqa. Tsaymi imayka jakashqa mayu imaykatapis apaqnö carrëtankunawan, cawallun muntashqa soldädunkunawan y atska büquinkunawan atacar entëru nacionta vincinqa.

41 “Tsaynöpis Israel nacionman yaykurmi atska runakunata wanutsinqa. Edomcho y Moabcho taq runakunami itsanqa Amóncho taq atska runakunawan juntu makinpita qeshpiyanqa.

42 “Tsaynöllami tsay reyqa munayninman atska nacionkunata churanqa. Egipto nacionpis manami qeshpinqatsu. 43 Nirkurnami Egiptupita apanqa qorita, qellayta y llapan riquëzankunatapis. Libia nacionta y Etiopía naciontapis munayninmanmi churanqa.

44 “Tsaypitanami rupay yarqamunan kaqlächo y norti kaqlächo contran shäriyanqanta willayanqa. Tsaymi pasaypa rabyanar contran shäriqkunata pïmaytapis wanutsiyta munar soldädunkunawan aywanqa. 45 Lamarpita kuyayllapä sagrädu jirkanman aywaq nänichömi campamentunta ruranqa. Tsaycho kaykaptinmi pipis mana yanapaptin payta wanutsiyanqa”.