2 “Tsay junaqmi pamparanqan kaqpita atska runakuna kawariyämunqa. Wakinnami kawariyämunqa imayyaqpis kawayänanpä y wakinnami kawariyämunqa imayyaqpis ñakayänanpä. Ñakayänanpä kawarimuqkunami jutsata rurayanqanpita pasaypa penqakuycho kayanqa.^† 3 Yachaq runakunaqa chipipiykaq ciëlunömi atsikyäyanqa. Runakunata alli kawayänanpä yachatsiqkunaqa qoyllurkunanörämi imayyaqpis chipipïyanqa.

4 “Daniel, willanqäkunata tiempun chämunqanyaq amarä pitapis willakuyrätsu. Qellqaraykaq rölluta cërawan shumaq siguray.^† Runakunaqa maytsaypapis aywar yachakurninmi mas yachaq kayanqa”.

5 Tsaypitanami noqa Daniel rikarqä ishkay runakunata. Jukaq runami ichiraykarqan mayu kay tsimpancho y jukaqnami ichiraykarqan wak tsimpancho. 6 Yaku janancho ichiraykaq lïnu latsapashqa runatami jukaq runa tapur nirqan: “Ninqaykinö mantsariypä kaqkuna kananpä ¿ayka tiemputä pishiykan?”

7 Tsaynö niptinmi lïnu latsapashqa runa mayu janancho kaykanqanpita ishkan makinta joqarkur imayyaqpis kawaq Tayta Diospa jutincho jurarnin nirqan: “Llapan tsaykuna cumplinanpä kimsa wata pullanmi pishiykan. Tsay witsanmi Diosman yärakuqkuna munayniynaqna rikakuyanqa”.

8 Tsaynö ninqankunata manami shumaqllaqa tantiyarqätsu. Tsaymi tapurqä: “Taytay, tsaypita ¿imatä mas päsanqa?”

9 Tsaymi nimarqan: “Daniel, llapanpis tsaykuna sellaraptinmi pipis musyanqatsu hasta tiempu chämunqanyaq. Qamqa imaypis allita rurar kaway. 10 Atska runakunami tantiyakuyanqa imanö ñakarpis Tayta Diosman yärakur jutsata mana rurar kawayänanpä. Jutsa ruraqkunaqa jinallami jutsata rurar kawayanqa. Paykuna mana tantiyakuyaptinpis Dios munanqannö kawaq runakunami itsanqa tantiyakuyanqa.

11 “Qoyay qoyay sacrificiuta rupatsiyänanta mana munanqanpitami Dios mana munanqan kaqta templuman churanqanyaq juk waranqa ishkay pachak isqun chunka (1,290) junaq kanqa.^† 12 Mana ajayaypa shuyaraqkunaqa kushishqami kawayanqa juk waranqa kimsa pachak kimsa chunka pitsqa (1,335) junaqyaq.

13 “Qamqa wanunqaykiyaq Tayta Dios munanqannö kaway. Ushanan junaqcho kawarkamurmi herenciaykita chaskinki”.