Jerusalénpä Tayta Diosta Daniel mañakunqan
9
Media nacionpita Asuerupa tsurin Darío Babiloniaa nacionpa mandaqnin rey juk watana kaykaptinmi 2 noqa Daniel estudiaykarqä Tayta Diospa willakuyninta profëta Jeremías qellqanqanta.† Tsayta liyirmi tantiyarqä qanchis chunka (70) watayaq Jerusalén marka raqälla kananpä kanqanta. 3 Tsaymi qachqa latsapata jatikurnin uchpaman jamaykur ayunar Tayta Diosta mañakurqä. 4 Mañakurmi nirqä:“Tayta Dios, llapanpä munayyuq y mantsariypämi kaykanki. Kuyashurniki mandamientuykikunata cumpliyaptinqa pactu ruranqaykitami imaypis cumplinki. 5 Noqakunaqa jutsata rurarmi mana allikunata rurayashqä. Mana wiyakuqmi kayashqä. Mandamientuykikunata y leynikikunata manami cäsukuyashqätsu. 6 Reykunata, autoridäkunata, unay castäkunata y llapan runakunatapis sirvishuqniki profëtakuna qampa jutikicho willakuynikita yachatsiyaptinpis manami cäsukuyashqätsu.
7 “Tayta Dios, imaypis allillatami ruranki. Noqakunami itsanqa llutanta rurar pasaypa penqakuypä kaykäyä. Llapä Israel runakunami tsaynö kaykäyä Jerusaléncho tarpis, Judá particho tarpis, Israel nacionpa cercancho tarpis o karu nacioncho tarpis. Qam ninqaykita mana cäsukuyanqäpitami maytsay nacionkunamanpis qarquyämashqayki. 8 Tayta Dios, mandamaqnï reykunapis, autoridänïkunapis, unay castäkunapis y kikïkunapis qamta mana cäsukurnikimi jutsata rurayashqä. Tsaymi pasaypa penqakuypä kaykäyä. 9 Mana cäsukuq kayaptïpis qamqa kuyapäkuq y perdonakuq Tayta Diosnïmi kaykanki.
10 “Tayta Diosllä, sirvishuqniki profëtakuna yachatsiyämanqan leynikikunatapis manami wiyakuyashqätsu. 11 Leynikikunata mana cäsukurmi llapäkunapis llutanta rurayashqä. Tsaymi sirvishuqniki Moisés qellqanqan leykunacho ninqannö noqakunaman maldición chämushqa. 12 Castigayämänaykipä ninqaykinömi noqakunata y autoridänïkunata mantsariypä castïguwan ushakätsiyämashqayki. Jerusalénta castiganqaykinöqa kay patsacho may markatapis manami castigashqaykitsu.
13 “Tayta Diosllä, kay ñakaykunaqa Moisés qellqanqan leykunacho ninqannömi noqakunaman chämushqa. Tsaynö ñakaykarpis manami perdonayämänaykipä rugakayämushqätsu. Jutsa ruraytapis manami kachariyashqätsu. Ni leynikikunatapis manami cäsukuyashqätsu. 14 Tsaymi allillata ruraq kar mantsariypä castïguta noqakunaman kachamushqayki. Tsaynö castigaykäyämaptikipis manami cäsukuyashqätsu.
15 “Tayta Diosllä, munaynikiwanmi kuyanqayki Israel runakunata Egiptupita jipimurqayki. Tsaymi kananyaqpis maytsaycho musyakaykan munayyuq kanqayki. Tsayta musyaykarmi jutsata rurayashqä.
16 “Taytay, kuyapäkuq kaykarqa sagrädu jirkannikicho kaykaq Jerusalénta tsayjinanpa ama castigaykullaytsu. Unay castäkunapis y kikïkunapis jutsata rurayanqäpitami Jerusalén markata y kuyanqayki runakunata llapan nacionkunacho taq runakuna manakaqman churayäman.
17 “Tayta Diosllä, kanan mañakamur rugakamunqäta wiyaykallämay. Jutiki raykuqllapis juchutsishqa kaykaq templuykita kuyapaykullay. 18 Tayta Dios, mañakamunqäta wiyaykallämay. Ushakashqa kaykaq Jerusalén markaykita kuyapaykullayna. Tsaynö mañakamü manami jutsaynaq kartsu, sinöqa kuyapäkuq kanqaykita musyarmi.
19 “Tayta Dios, ¡mañakamunqäta wiyaykallämay! ¡Jutsäkunapita perdonaykayällämay! ¡Taytay, yanapaykayällämay! ¡Jutiki raykuq y akranqayki marka raykuq juklla salvaykayällämay!”
Qanchis chunka semänapä tantiyatsinqan
20 Tsaynö nirmi jutsata ruranqäpita y Israel mayïkuna jutsata rurayanqanpita Tayta Diosta rugakur perdonta mañakurqä. Tsaynöllami akranqan sagrädu jirkanpä rugakurqä. 21 Tsaynö rugakuykaptïmi sacrificiuta templucho tardipa rupatsiyänan höra ángel Gabriel pajaypa ñöpäman chämurqan. Paytami punta kaq revelacionchöpis rikarqä.
22 Paymi tantiyatsimar nimarqan: “Daniel, llapan rikanqaykita shumaq tantiyatsinäpämi shamushqä. 23 Mañakuyta qallaykaptikillanami rugakunqaykita Tayta Dios awnishqa. Tsaymi pasaypa kuyashurniki willanäpä kachamashqa. Tayta Diospa willakuyninta tantiyatsiptï kanan shumaq wiyamay.
24 “Qanchis chunka (70) semänamib destinashqa kaykan Israel mayikikuna y Tayta Dios akranqan sagrädu markacho taqkuna mana cäsukuq kayta, jutsa rurayta y llutan rurayta kachariyänanpä. Tsay tiempu kaykan Tayta Dios munanqannö runa mayinwan alli kawayänanpä, profëtakuna willakuyanqannö kamakänanpä y mas sagrädu kaqtac dedicayänanpämi.
25 “Kay ninqäta shumaq tantiyakuy. Jerusalén markata yapay shäritsiyänanpä ordenanqan junaqpita Tayta Dios akranqan mandaq shamunqanyaq qanchis semänami päsanqa y tsay jananman soqta chunka ishkay (62) semänami päsanqa.d Pasaypa ñakaykuna kaptinpis Jerusalén markapa cällinkunata y murällankunatapis allitsayanqami.
26 “Soqta chunka ishkay semänakuna päsaskiptinnami Dios akranqan runata ushakätsiyanqa. Juk mandaq runa soldädunkunawan shamurnami Jerusalén markata y santu templuta chipyaq juchutsir ushakätsinqa. Mangäda tamya illaqpita shamur imaykatapis ushanqannömi kikinpis illaqpita ushakanqa. Tsay tiempu ushakanqanyaqmi Tayta Dios destinanqannö guërrapis y wanutsinakuypis kanqa.
27 “Juk semäna masmi tsay mandaq runa atska runakunawan pactuta ruranqa. Nirkurmi pullan semänachönae munanqatsu sacrificiukunata y tsaki mikuy ofrendakunata altarcho rupatsiyänanta. Nirkurmi altarpa ñöpanman Tayta Dios mana munanqan kaqta churanqa.† Tsaycho kanqa Tayta Dios destinanqan tiempu cumplinqanyaqmi”.