Carnërutawan chïvuta revelacioncho Daniel rikanqan
8
Belsasar kimsa wata rey kaykaptinmi noqa Daniel revelacionta yapay rikarqä. 2 Tsay revelacionchömi kaykarqä Elam provinciacho kaykaq Susa markacho y Ulai mayu kuchuncho. 3 Rikachakuykanqächömi rikarqä mayu kuchuncho ishkay largu waqrayuq carnëru kaykaqta. Jukaq waqra qepatarä wiñamushqa kaykarpis mas jatunmi karqan. 4 Tsaychömi rikarqä rupay jeqanan kaqläpa, norti kaqläpa y sur kaqläpa tsay carnëru atacaykaqta. Manami ima uywapis ichipayta kamäpakurqantsu. Tsaynöpis munayninpita manami pipis salvakurqantsu. Tsay carnëru munanqanta rurarmi llapanpitapis mas munayyuq rikakurqan.5 Tsaykunapä yarpachakuykaptïmi rupay jeqanan kaqläpita urkuncho jatunkaray waqrayuq juk chïvu yurirkamurqan. Tsay chïvumi patsatapis mana jaruyllapa maytsaypapis aywarqan. 6 Mayu kuchuncho ishkay waqrayuq carnëruman chaykurmi llapan kallpanwan rabyanashqa takaykurqan. 7 Rikaykaptï takaskiptinmi carnërupa ishkan waqran pakiskirqan. Chïvu saqtaskir pasaypa jarur ushaptinmi ima ruraytapis carnëru kamäpakurqantsu. Tsaynö atacaptin manami pipis washayta kamäpakurqantsu.
8 Tsay chïvuqa warayllanta warayllantami mas kallpasapa rikakurqan. Pasaypa munayyuq kaykaptinmi jatunkaray waqran pakiskirqan. Tsay pakiq waqrapa trokinmi chusku jatusaq waqrankuna wiñamurqan. Tsay waqrankunami chuskunläpa toqiraykarqan.
9 Jukaq waqrapitami taksha waqra wiñar mas jatunkaray tikrarqan. Tsay waqrami wiñarqan sur kaqläpa, rupay yarqamunan kaqläpa y kuyayllapä nacionnintsik kaqläpa.a 10 Tsaynöllami wiñarqan ciëlucho kaykaq angelkunayaq. Tsaymi wakin angelkunata y qoyllurkunata jitaskamur jarur usharqan.† 11 Angelpa mandaqninpita mas munayyuq kanqanta yarparmi sacrificiuta templucho qoyay qoyay rupatsiyänanta mana munar templutapis impüruyätsirqan.b 12 Tsaynö kaptinmi qoyay qoyay rupatsiyänanpä kaq sacrificiuta rupatsiyarqannatsu y Diosman yärakuqkuna tsaycho adorayarqannatsu. Tsay waqraqa Tayta Dios ninqantapis llapantami manakaqman churarqan. Waqra munanqannömi llapanpis karqan.
13 Tsaypitanami wiyarqä ángel mayinta juk ángel tapuykaqta: “¡Imayyaqrä qoyay qoyay rupatsiyänanpä kaq sacrificiuta rupatsiyanqatsu! ¡Imayyaqrä Tayta Diosta mana cäsukur templuta manakaqman churayanqa! ¡Imayyaqrä Tayta Diosman yärakuqkunata ñakatsiyanqa!”
14 Tapuptinmi jukaq ángel nirqan: “Tsaynö kanqa ishkay waranqa kimsa pachak (2,300) tardiyaq y tutayaqmi. Nirkurmi templu purificashqa kanqa”.
Revelacioncho Daniel rikanqan imapä kanqanpis
15 Noqa Daniel revelacionta rikanqäpita yarpachakur kaykaptïmi illaqpita ñöpächo runa niraq yuriskamurqan. 16 Nirkurmi wiyarqä Ulai mayupita tsay runa niraq nimuqta: “Ángel Gabriel, tantiyatsiy rikanqan imapä kanqantapis”.†
17 Ángel Gabriel ñöpäman shamuptinmi pasaypa mantsarir lätaraypa ishkirqä. Tsaymi nimarqan: “Runapa tsurin, shumaq tantiyay. Llapan rikanqaykiqa ushanan tiempu chämuptinrämi päsanqa”.
18 Tsaynö parlapaykämaptinmi lätaraykanqächo desmayaskirqä. Shäritsimarmi 19 nimarqan: “Kananmi tantiyatsishayki Tayta Dios ajanarnin castiganan tiempu ima päsananpä kanqantapis. Tsayqa ushanan tiempuchömi kanqa.
20 “Ishkay waqrayuq carnëruta rikanqaykiqa Mediapa y Persiapa mandaqnin reykunami kaykäyan. 21 Rikanqayki chïvuqa Grecia nacionpa mandaqnin reymi kaykan. Chïvupa urkuncho rikanqayki jatunkaray waqraqa Grecia nacionpa punta kaq mandaqnin reymi kaykan. 22 Tsay waqra pakiptin chusku waqrakuna wiñayämunqanta rikanqaykiqa tsay nación chusku nacionman rakikänanpämi kaykan. Tsaynö kaptinpis tsay rakikashqa nacionkunapa munayninqa manami ñöpata kayanqannötsu kanqa.
23 “Tsay chusku nacionkuna munayniynaq tikraptin y runakunapa jutsankuna atska kaptinnami mana kuyapäkuq astütu runa rey kananpä yaykunqa.c 24 Tsay reyqa pasaypa munayyuqmi rikakunqa. Itsanqa manami kikinpa munayninwantsu tsaynö kanqa, sinöqa jukpa munayninwanmi. Munanqanta rurarmi imaykatapis pasaypa ushakätsinqa. Tsaynöllami munayyuqkunata y Tayta Diosman yärakuq santu runakunatapis ushakätsinqa.
25 “Pasaypa astütu karmi pitapis engañanqa. Runa tukurmi atska runakunatapis illaqpita wanutsinqa. Tsaynöpis mandaqkunapa mandaqnin Tayta Diospa contranmi shärinqa. Tsaynö kaykanqanchömi castïguwan wanunqa. Tsay castïguqa manami runapitatsu kanqa.
26 “Tutapa y tardipa sacrificiuta mana rupatsiyänanpä kanqanta revelashunqaykiqa rasunpaypami päsanqa. Itsanqa ama pitapis tsayta willaytsu. Atska wata päsaskiptinrämi tsaykunaqa cumplinqa”.
27 Tsaynö nimaptinmi noqa Daniel pasaypa mantsarir kallpaynaq rikakur atska junaq qeshyarqä. Tsaypita alliyaskirnami rey nimanqanta yapay rurarqä. Itsanqa tsay rikanqä imapä kanqantapis mana tantiyarmi pasaypa llakikurqä.