Suëñuynincho mantsaypä chusku uywakunata Daniel rikanqan
7
Babilonia nacioncho rey Belsasar juk wata mandaykaptinmi suëñuynincho revelacionta Daniel rikarqan. Rikanqankunata qellqaskirmi 2 Daniel nirqan: “Suëñuynïchömi rikarqä kay patsapa chuskun kuchunpita pasaypa wayramuptin mantsariypä lamar pulchaqyaykaqta. 3 Tsay lamarpitami mantsariypä juk niraq juk niraq chusku jatusaq uywakuna yarqayämurqan.†4 “Punta kaq uywami león niraq karqan. Älankunami ankapa älannö karqan. Rikaraykaptïmi älankunata llukiskiyarqan. Nirkurnami tsay uywata ichïtsiyarqan ishkan chakillanwan runanö ichiränanpä. Tsaynöpis runanö yarpachakunanpämi yarpayta qorqan.
5 “Ishkay kaq uywami ösu niraq karqan. Jukaqlä waqtanmi joqarikashqa karqan. Shiminchömi amuraykarqan kimsa custillakunata. Tsay ösutami nirqan: ‘¡Shäriy melananqaykiyaq aytsata mikuy!’
6 “Tsaypitanami rikarqä leopardu niraq uywa† waqtancho chusku älayuqta y chusku umayuqta. Tsay uywami mandananpä autoridä kayta chaskirqan.
7 “Nirkurmi rikarqä chusku kaq uywata. Punta kaq rikanqä uywakunapita mas juk niraqmi karqan. Tsay uywa pasaypa mantsaypä kallpasapami karqan. Curmïllunkunapis fiërrupita jatusaq kaptinmi pitapis tarinqan kaqtaqa mikur usharqan y katunqan kaqtanami jarutakur usharqan. Tsay uywaqa chunka waqrayuqmi karqan.†
8 “Tsay waqrankunata rikaraykaptïmi juk taksha waqra jeqamurqan. Tsay waqra wiñaptinmi kimsa kaq waqrankuna kiptukäyarqan. Tsay waqrami karqan runapa ñawinnö ñawiyuq y shimin tarinqantami pitapis ashlliq.
Juzgananpä trönuman Tayta Dios jamanqan
9 “Tsaycho rikaraykaptïmi trönukunata kamariyarqan.
Juk trönumanmi imaypis kawaq Awkin jamarqan.
Latsapanpis rashtanö pasaypa yuraqmi karqan.†
Aqtsanpis yuraq millwanö pasaypa yuraqmi karqan.†
Jamakunan trönun y trönunpa ruëdanpis lunyaykaq ninanömi karqan.
10 Paypa ñöpanpitami lunyaypa lunyar nina yarquykarqan.
Waranqa waranqapami payta sirviyarqan.
Munanqanta rurayänanpä yupaytapis mana atipaypämi ñöpancho kaykäyarqan.†
Juzgayta qallaykunanpämi librukunata kicharqan.†
11 “Tsay taksha waqra pitapis mantsariypä qayapanqanta wiyarmi mantsakashqa rikaraykarqä. Tsaynö rikaraykaptïmi waqrayuq uywata wanutsiyarqan. Nirkurnami chipyaq chamqaskir lunyaykaq ninaman qaykuyarqan. 12 Tsaynöllami wakin uywakunapa munaynintapis qechuyarqan. Qechurpis tiempun cumplinqanyaqmi kawaykaqta kachaykuyarqan.
Pukutay chawpincho shamuq runa munayyuq rikakunqan
13 “Tsay paqasmi revelacioncho rikarqä ciëlupita pukutay janancho runapa tsurinnö shamuykaqta. Paytami imaypis kawaq Awkinpa ñöpanman pushayarqan.† 14 Tsay Awkinmi payta churarqan llapanta mandananpä, llapanpä munayyuq kananpä y llapanpita respitashqa kananpä. Tsaymi may markapita, maytsay nacionpita karpis y ima idiömata parlarpis payta sirviyarqan. Paypa mandakuyninqa imayyaqpis mana ushakaqmi kanqa. Munayyuq kanqantaqa manami pipis qechunqatsu ni pipis ushakätsinqatsu.†
15 “Noqa Danielmi tsaykunata rikar pasaypa mantsarirqä. Rikanqäpita yarpachakurmi pasaypa llakikurqä. 16 Tsaymi tsay ichiraykaqkunapa puntanman witiykur jukninta mañakurqä tsaykunapita tantiyatsimänanpä. Tsaymi tantiyatsimar nimarqan: 17 ‘Tsay chuskun jatusaq uywakunaqa chusku nacionkunami kaykäyan. Tsay nacionkunami munayyuq rikakur wakin nacionkunatapis munaynincho katsiyanqa. 18 Tsaypitanami munayyuq Tayta Diosman yärakuqkuna mandakuyninta chaskiyanqa. Tsay mandakuyninchömi imayyaqpis mana ushakaypa paykuna kayanqa’.†
19 “Tsaypitanami chusku kaq uywa imapä kanqantapis musyayta munarqä. Tsay uywami imatapis tsarinqan kaqtaqa rachikachaskir mikurqan. Katunqan kaqtanami jarutakur usharqan. Curmïllunkunapis fiërrupitami y shillunkunapis broncipitami karqan. Wakin uywakunapitapis mas juk niraq karmi pasaypa mantsariypä karqan.
20 “Tsaynöllami musyayta munarqä tsay uywapa chunka waqrankuna imapä kanqanta y taksha waqra imapä wiñanqantapis. Tsay taksha waqra wiñaptinmi kimsa kaq waqrankuna kiptukaskiyarqan. Tsay waqraqa ñawiyuqmi karqan. Tsaynöpis shimin tarinqantami imatapis parlaq. Tsaymi tsay waqra wakin kaq waqranpitapis mas mantsariypä karqan. 21 Rikaraykaptïmi tsay waqraqa Tayta Diosman yärakuqkunata atacar vincirqan.† 22 Tsaynö vincirqan imaypis kawaq Awkin shamur kuyanqan runakunapa janan shärinqanyaqmi.† Janan shäriptinmi mandakuyninta chaskikuyarqan.
23 “Tsaypita musyayta munaptïmi tsaycho ichiraykaq tantiyatsimar nimarqan: ‘Tsay chusku kaq uywaqa juk nacionmi kaykan. Tsay nacionqa kay patsacho wakin nacionkunatapis munayninchömi tsararanqa. Wakin nacionkunapita mas juk niraq karmi jarutakur lanquypa lanqur kay patsacho kaqkunata ushakätsinqa.
24 “ ‘Tsay chunka waqrankunami tsay nacionpa chunka mandaqnin reykuna kaykäyan.† Paykuna wanuskiyaptinmi mas juk runa rey kayman yaykunqa. Payqa wakin mandaq reykunapitapis mas mana alli karmi kimsa mandaq reykunata vincinqa. 25 Tsaynöllami munayyuq Tayta Diospa contran parlanqa. Tayta Diosman yärakuqkunatapis pasaypami ñakatsinqa. Tayta Diospä ruranqan fiestakunatapis y mandamientunkunatapis trukatsiytami munanqa. Tayta Diosman yärakuqkunata kimsa wata y soqta killami munaynincho tsararanqa.†
26 “ ‘Tsaynö kaykaptinmi Tayta Dios juzgaptin tsay reyta munayyuq kanqanpita jipir pasaypa ushakätsiyanqa. 27 Tsaymi munayyuq Tayta Diosman yärakuqkuna kay patsacho llapan mandaqpitapis mas mandaq kayanqa. Tsaynöllami munayyuqpitapis mas munayyuq kayanqa y respitashqa runapitapis mas respitashqa kayanqa. Tayta Diospa mandakuynin imaypis mana ushakaq kaptinmi kay patsacho llapan nacionkuna payta sirviyanqa’.
28 “Tsaytami suëñuynïcho rikarqä. Rikanqäkunapita yarpachakurmi noqa Daniel pasaypa almatakashqa rikakurqä. Tsaynö kaptinpis tsay suëñunqäta manami pitapis willarqätsu”.