Leonkuna wichqaraykanqanman Danielta jitarpuyanqan
6
(2) Nacionnin alli mandashqa kananta munarmi rey Darío churarqan juk pachak ishkay chunka (120) mandashiqninkunata. 2 (3) Mandashiqninkunata controlayänanpänami kimsa ministrukunata churarqan. Tsay kimsanpitami Daniel karqan juk ministru. Tsay ministrukunami yanapaqnin runakunata imatapis rey ninqanta ruratsiyaq.3 (4) Wakin ministrukunapitapis Daniel mas tantiyakuq kaptinmi rey yarparqan llapan nacionta mandar yanapananpä. 4 (5) Tsayta musyaykurmi wakin ministrukuna y mandashiqkuna Danielpa contran shäriyarqan. Tsaymi ima achäquillatapis ashiyarqan imallatapis jitapäyänanpä. Tsaynö kaptinpis Danielqa cäsukuq karmi imatapis llutanta rurarqantsu ni qelanarqantsu. Tsaymi imatapis jitapayta kamäpakuyarqantsu. 5 (6) Tsayta tantiyaskirmi niyarqan: “Manami imatapis tarishuntsu payta jitapänantsikpä. Tsaynö kaptinpis Diosninta adoranqanwanmi ishkitsishun”.
6 (7) Tsaynö nirmi ministrukuna y mandashiqkuna comisionta churayarqan reywan parlaq aywayänanpä. Chaykurmi niyarqan: “Tayta rey Darío, ¡qamlla imayyaqpis rey kaykullay! 7 (8) Llapä autoridäkuna qorikaskirmi willanakuyashqä juk leyta ruratsinaykipä. Pipis qamta adorashunaykipa trokin juk diosta o juk runata adoraptinqa leonkuna wichqaräyanqanman qaykushqa katsun. Tsay ley katsun kananpita kimsa chunka (30) junaqyaq. 8 (9) Tsay leyta qellqaskir willakatsiy llapanpis cäsukuyänanpä. Mandanqayki Media y Persia nacionkunapa leynincho nikanqannö tsay ruranqayki leyta manami pipis anulanqatsu ni trukatsinqatsu”.
9 (10) Niyanqannöllami leyta qellqaskatsir rey Darío firmarqan. 10 (11) Tsay ley qellqaraykanqanta musyaskirmi Danielqa pununqan cuartunman yaykuskir Jerusalén kaqlä ventänata kicharqan. Tsaychömi qoyay qoyay mañakunqannö cada junaq kimsa kuti qonqurikuykur Tayta Diosta mañakur alabarqan.
11 (12) Tsay acusaq runakuna chaykurmi Danielta tariyarqan Tayta Diosta mañakuykaqta. 12 (13) Tsaynö tariykurmi reyman aywar niyarqan: “Tayta rey, musyanqaykinöpis qamta adorashunaykipa trokin ima diostapis o pï runatapis pipis adoraptinqa leonkuna wichqaräyanqanman qaykushqa kayänanpämi nishqayki. Kimsa chunka (30) junaq tsaynö kananpämi leyta maytsaymanpis apatsishqayki”.
Tsaymi rey nirqan: “Awmi, tsaynö cumpliyänanpämi ordenashqä. Mediapa y Persiapa leyninkunacho ninqannömi tsay ruratsinqä leyta pipis anulanqatsu ni trukatsinqatsu”.
13 (14) Tsaynö niptinmi niyarqan: “Judá nacionpita prësu apayämunqan Danielqa manami cäsushunkitsu ni firmanqayki leytapis respitantsu. Payqa tsaynöllami qoyay qoyay kimsa kuti Diosninta mañakuykan”.
14 (15) Tsaynö niyaptinmi rey pasaypa mantsarir imaykanöpapis Danielta salvayta munar qoyat yarpachakurqan. 15 (16) Tsaymi yapay kutiykur reyta tsay runakuna niyarqan: “Musyanqaykinöpis Mediapa y Persiapa leynincho ninqannö tsay ruratsinqayki leyta manami pipis anulanqatsu ni trukatsinqatsu”.
16 (17) Tsaynami leonkuna wichqaraykanqanman jitarpuyänanpä rey ordenarqan. Nirkurnami Danielta nirqan: “¡Yärakunqayki Diosniki salvaykulläshuy!”
17 (18) Jitarpurmi jatun rumiwan punkuta sigurayarqan. Danielta sentenciar cumpliyanqanta musyayänanpämi reypis y autoridäkunapis sellayarqan. 18 (19) Nirkurnami palaciunman rey aywakur mikuytapis munarqantsu ni müsicatapis wiyayta munarqantsu. Tsaynöllami punuytapis warat tarirqantsu.
19 (20) Tsaka tsakallami reyqa leonkuna wichqaräyanqanman ras aywarqan. 20 (21) Chaykurnami pasaypa llakishqa qayar nirqan: “Imayyaqpis kawaq Tayta Diosta sirviq Daniel, imaypis sirvinqayki Dios ¿leonkunapita salvashushqaykiku?”
21 (22) Qayaptinmi Daniel nimurqan: “¡Qamlla imayyaqpis rey kaykullay! 22 (23) Jutsaynaq kanqäta musyarmi angelninta Tayta Diosnï kachamushqa leonkunapa shiminkunata tsapaptin mana mikuyämänanpä. Tayta rey, qampa contrayki manami imatapis rurashqätsu”.
23 (24) Tsaymi pasaypa kushikur leonkuna wichqaraykäyanqanpita jinan höra Danielta jipitsimurqan. Jipitsimurmi rikayarqan leonkuna ashpiyllapis mana ashpiyanqanta. Tsaynö sänu karqan Tayta Diosman yärakuyninpami.
24 (25) Tsaymi Danielpa contran shäriq runakunata, warminkunata y tsurinkunatapis leonkuna wichqaräyanqanman jitarpuyänanpä rey prësu apatsimurqan. Manaräpis patsaman chäyaptinmi leonkunaqa achkupakur tullunkunatapis chipyaq kaptuykällar ushayarqan.
25 (26) Tsaypitanami rey Darío juk leyta qellqaskir apatsirqan may markacho y may nacioncho taqkunaman y ima idiömata parlaqkunamanpis. Tsay leychömi nirqan:
“Qamkunacho alli kaway kaykullätsun. 26 (27) Noqami kanan ordenä mandanqä llapan nacionkunacho Daniel adoranqan Diospita mantsapakur adorayänaykipä.
Paymi imayyaqpis kawaq Tayta Dios kaykan.
Mandaq kanqanqa manami imaypis ushakantsu.
Tsaynöllami munayyuq kayninpis mana ushakaq kaykan.
27 (28) Paymi cuidamantsik y ima mana allipitapis tsapämantsik.
Paymi ciëlucho mantsakaypä kaqkunatapis rikakätsimun.
Kay patsachöpis milagrukunatami ruran.
Paymi leonkunapitapis Danielta tsapashqa”.
28 (29) Tsaymi Persia nacionpa mandaqnin rey Darío mandanqan witsan y rey Ciro mandanqan witsan Daniel respitashqa karqan.