Espíritu Santupa munaynincho kawanantsikpä ninqan
8
Tsaymi Jesucristucho kaqkunaqa condenashqatsu kayanqa. [Jutsata rurar kawayänanpa trokinqa Espíritu Santu tantiyatsinqannömi kawaykäyan.] 2 Jutsapa munaynincho kanqantsikpitami Espíritu Santu jipimashqantsik. Jutsapa munaynincho wanushqanö karpis Jesucristo salvamashqami alli kawayta tarintsik.3 Jutsapa munaynincho kashqami Tayta Diospa leyninkuna salvamashqantsiktsu. Tsaynö kaptinmi Tsurin Jesucristuta Tayta Dios kachamurqan noqantsiknö runa kananpä. Paymi sacrificiupä apayanqan uywanö noqantsik raykuq wanurqan. Tsaynöpami jutsapa munayninpita Tayta Dios salvamashqantsik. 4 Salvamarnintsikmi leyninkunata cumpliqtanöna Tayta Dios chaskimantsik. Tsaymi jutsata rurar kawanantsikpa trokinqa Espíritu Santu tantiyatsimanqantsiknöna kawaykantsik.
5 Jutsapa munaynincho kawaqkunaqa shonqun yarpanqanta rurayänanpämi yarpachakuyan. Espíritu Santupa munaynincho kawaqkunami itsanqa Espíritu Santu tantiyatsinqannö kawayänanpä yarpachakuyan.
6 Jutsapa munaynincho kawaqkunaqa Tayta Diospa ñöpanman imaypis manami chäyanqatsu. Espíritu Santupa munaynincho kawaqkunami itsanqa Tayta Diospa ñöpancho imayyaqpis kushishqa kawayanqa.
7 Jutsapa munaynincho kawaqkunaqa Tayta Diospa contran karmi leyninkuna ninqannö kawayta munayantsu ni kamäpakuyantsu. 8 Yapaymi nï: Tsay runakunaqa manami Tayta Dios munanqannö kawayta kamäpakuyantsu.
9 Noqantsikqa manami jutsapa munayninchönatsu kawaykantsik. Tayta Diospa Espïritun noqantsikcho kaptinmi paypa munayninchöna kawaykantsik. Jesucristupa Espïrituna noqantsikcho mana kaptinqa manami Jesucristupatsu kantsik.
10 Jesucristo noqantsikcho kaptinmi perdonashqana kaykantsik. Tsaymi jutsata ruranqantsikpita wanunantsikpä kaptinpis Espíritu Santu kawayta qaramantsik. 11 Tayta Diospa Espïritun noqantsikcho kaptinmi† wanunqanpita Jesucristuta kawatsimunqannö noqantsiktapis Tayta Dios kawatsimäshun. Tsaynö kawatsimäshun noqantsikcho kaykaq Espíritu Santupa munayninwanmi.
12 Wawqikuna panikuna, tsaynö kaykaptinqa jutsa rurayta yarparpis ama rurashuntsu. 13 Jutsa rurayllacho kawashqaqa infiernumanmi Tayta Dios qaykamäshun. Espíritu Santu tantiyatsimanqantsiknö jutsa ruraypä wanushqanö karmi itsanqa imayyaqpis mana ushakaq kawayta tarishun.
14 Tayta Diospa Espïritun tantiyatsinqannö kawaqkunaqa llapanpis Tayta Diospa wamrankunami kayan. 15 Wamran kanantsikpämi Espíritu Santu qorimashqantsik. Espíritu Santuta chaskishqana karmi patronninta wätay mantsa mantsa mañakunqannöqa Tayta Diosta mañakuntsiktsu, sinöqa mana mantsariypa mañakurmi “¡Abba, Taytallä!” nintsik.†
16 Kikin Espíritu Santumi Diospa wamran kanqantsikta tantiyatsimantsik. 17 Tayta Diospa wamran karmi pay awninqan herenciata Jesucristo chaskinqannö noqantsikpis chaskishun. Imanö ñakarpis Jesucristuman yärakurmi paywan gloriacho kawashun.
Llapanpis mushuqman tikrananpä ninqan
18 Kay patsacho ñakanqantsikkunaqa ushakaqllami kaykan. Gloriacho kushikunantsikpä kaqmi itsanqa imayyaqpis mana ushakaq kanqa. Tsaytaqa llapan shonqüwanmi criyï. 19 Tsaynö kaptinmi Tayta Dios wamrankunata ñöpanman qorinanpä llapan kamanqankuna shuyaykäyan.
20 Shuyaräyanqanyaqmi pay kamanqankuna maldicionashqa kaykäyan. Manami kikinpitatsu maldicionashqa kayan, sinöqa Tayta Dios maldicionanqanpitami.† Kanan maldicionashqa kaptinpis 21 wamrankunata mushuqman Tayta Dios tikratsinqannöllami llapan kamanqankunatapis mana ushakänanpä mushuqman tikratsinqa.
22 Tsayyaqmi Tayta Dios llapan kamanqankunapis warmi qeshyakuyta ñakanqannö ñakar llakikuykäyan. 23 Manami kamanqankunallatsu llakikuykäyan, tsaypa trokinqa Tayta Dios juklla qorimänantsikta munarmi noqantsikpis llakikuykantsik. Espíritu Santuta primiciatanö chaskishqa karmib shuyaykantsik cuerpuntsiktapis mushuqmanna tikratsinanpä.†
24 Mushuqman tikranantsikpämi Tayta Dios salvamashqantsik. Itsanqa tsay höra manami chämunrätsu. Mushuqman tikrashqana kaykarqa ¿imatanatä shuyaräshun? 25 Mushuqman manarä tikrarmi itsanqa imanö ñakarpis shuyaraykantsik.
26 Tayta Diosta mañakurpis shumaqllaqa pay munanqannö mañakuyta manami kamäpakuntsiktsu. Tsaymi Espíritu Santu Tayta Diosta waqapaypa favornintsik mañakun. 27 Rugakurmi Tayta Dios munanqannölla imaypis mañakun. Espíritu Santu noqantsikpä mañakunqankunatami Tayta Dios musyan. Payqa shonquntsik imata yarpanqankunatapis musyanmi.
Tayta Dios kuyamanqantsikta pipis mana michänanpä ninqan
28 Musyantsikmi ima päsaptinpis Tayta Diosta kuyaqkunapä llapanpis alli kananpä kanqanta. Paykunataqa Tayta Dios qayarqan kikin munanqannö kananpämi. 29 Unaypita patsa reqirmi destinarqan Tsurin Jesucristunö kayänanpä. Tsaynöpami Jesucristuqa llapan yärakuqkunapa mayor wawqin. 30 Destinanqan kaqkunatami Tayta Dios qayarqan. Qayanqan kaqkunatami perdonarqan. Perdonanqan kaqkunatanami gloriaman pushanqa.
31 Tsaynö kaykaptinqa ¿imatanatä munashun? Tayta Dios favornintsik kaykaptinqa ¿pinatä contrantsik kanqa? 32 Noqantsik raykuq wanunanpä kuyay Tsurintapis kachaykämurqa ¿manatsurä llapan awnimanqantsiktapis paywan Tayta Dios cumplinqa?
33 Kikin Tayta Dios akraykämashqaqa y jutsantsikkunatapis perdonaykämashqaqa ¿pirä ñöpancho shimpimäshun? 34 Jesucristo wanunqanpita kawaskamur Tayta Diospa derëchancho jamar favornintsik parlaykaptinqa ¿pirä castigashqa kanantsikpä ninqa?
35 Jesucristo kuyamanqantsikpita ¿pirä rakimäshun? Payqa kuyamantsikmi ñakashqapis, llakikushqapis, runakuna chikimashqapis, mallaqashqapis, latsapaynaq kashqapis, peligrucho kashqapis y runakuna wanutsimashqapis.
36 Tayta Diospa palabranchöpis kaynömi qellqaraykan:
“Munanqaykinö kawayaptïmi chikiyämar imaypis wanutsiyäman.
Pishtayänanpä üshanömi kaykäyä”.†
37 Tsaykuna päsamashqapis Tayta Dios kuyamashqami kushishqa imaypis yärakuntsik.
38 Tayta Diosmi kuyamantsik kawashqapis, wanushqapis, ima päsamashqapis y ima päsamänantsikpä kaptinpis. Tsaymi angelkunapis, ni supaykunapis, ni ima munayyuq kaqkunapis, 39 ni ciëlucho kaqkunapis, ni patsa rurincho kaqkunapis, ni Tayta Dios ima kamanqankunapis paypa kuyakuyninpita rakimäshuntsu. Tsaynö kuyamanqantsiktami tantiyatsimashqantsik noqantsik raykuq wanunanpä Señornintsik Jesucristuta kachamur.