Diospa leyninkunapa munayninpita yarqunqantsik
7
Wawqikuna panikuna, Diospa leyninkunata yachaykarqa musyayankimi kawaqkunalla leykunata cumpliyänanpä kanqanta. 2 Tsaynöllami majayuq warmipis runan kawanqanyaqlla runanpa munaynincho kaykan. Runan wanuskiptinqa librinami quëdanqa. 3 Runan kawaykaptin juk runawan kakurqa runantami qanrataykan. Runan wanuskiptinmi itsanqa tsay leypita librina kar juk runawanpis täkunman.4 Wawqikuna panikuna, Jesucristo cruzcho wanushqa kaptinmi noqantsikpis Diospa leyninkunapä imayka wanushqanö kaykantsik. Tsaymi tsay leykunapa munaynincho kanqantsikpa trokinqa Jesucristupa munayninchöna kaykantsik. Paytami wanunqanpita Tayta Dios kawaritsimurqan pay munanqannö kawanantsikpä.
5 Ñöpataqa jutsa ruraypa munaynincho kawashqami Tayta Diospa leyninkuna yarpätsimarqantsik jutsata mas ruranapä. Tsaynö jutsata rurarmi imayka wanushqanö karqantsik. 6 Kananqa tsay leykunapa munaynincho kanqantsikpita yarqurmi tsay leykunapä wanushqanöna kaykantsik. Tsaynö karqa manami tsay leykunata cumplirtsu Tayta Diosta sirviykantsik, sinöqa Espíritu Santu yanapamashqami.
Munaynincho jutsa ruray tsararämanqantsik
7 Tsaynö kaptinpis ama yarpäshuntsu Diospa leyninkuna mana alli kanqanta. Diospa leyninkunaqa allimi kaykan. Tsay leykunata mana yacharqa jutsa ima kanqantapis manami musyämantsu karqan.
Tsay leykunachömi nin: “Ama runa mayikipa imaykankunatapis munapankitsu”.†
Tsaynö mana niptinqa jukpa imantapis munapanqä jutsa kanqanta manami musyämantsu karqan. 8 Tsaynö kaptinpis tsay leyta jutsa ruray manijaptinmi masrä imaykatapis munaparqä. Diospa leyninkunata mana musyaptïqa jutsa ruray wanushqa kar manami yarpätsimanmantsu karqan.
9 Ñöpataqa tsay leykunata manarä musyarmi kushishqa kawarqä. Diospa leyninkunata musyaptïnami itsanqa jutsa ruray munayyuq tikraptin imayka wanushqanöna karqä. 10 Tsaymi Tayta Diospa leyninkunata musyarpis alli kawayman chänäpa trokin wanuyman charqä. 11 Tsaynöpami jutsa ruray engañamar wanutsimänanpä Diospa leyninkunata manijarqan.
12 Tsaynö kaptinpis Tayta Diospa leyninkuna y mandamientunkuna rasunpaypa allimi y sagrädumi. 13 Imayka wanushqanö kanäpä manami Diospa leyninkunatsu jutsayuq kaykan, sinöqa jutsa ruraymi. Jutsa ruraymi Diospa leyninkunata manijar wanuyman apamarqan. Tsaynöpami jutsa ruray pasaypa mana alli kanqanta tantiyä.
14 Musyantsikmi Tayta Diospa leyninkuna alli kanqanta. Tsaynö kaptinpis noqaqa runalla karmi jutsa ruraypa munaynincho kaykä. 15 Tsaynö karmi imanir jutsata ruranqätapis tantiyätsu. Allita rurayta munarpis mana munanqä kaqtami rurä.† 16 Mana munanqä kaqta rurarmi tsay leykuna alli kanqanta tantiyä.
17 Jutsa rurayta mana munaptïpis shonqücho jutsa ruraymi mana allikunata ruratsiman. 18 Noqaqa allikunata rurayta munarpis manami kamäpakütsu. Tsaymi musyä shonqücho imapis allillaqa mana kanqanta. 19 Tsaynö karmi Tayta Dios munanqanta rurayta munaykarpis mana allikunata rurä. 20 Jutsa rurayta mana munaptïpis shonqücho kaykaq jutsa ruraymi jutsata ruratsiman.
21 Tsaynöllami imaypis päsaman. Allita rurayta munarpis mana allitami rurä. 22 Shonqücho Tayta Diospa leyninkunata cäsukuyta munaptïpis 23 jutsa ruraymi alli yarpaynïwan maqanakuykan. Vincimar prësutanö tsararämarmi jutsaman ishkitsiman. 24-25 Noqaqa Tayta Diospa leyninkunata cäsukuyta munarpis jutsa ruraypa munaynillanchörämi kaykä. ¡Allaw noqallä! Alläpa llakipaypämi kaykä. Wanushqanö kanqäpita ¿pirä salvamanqa? ¡Päkillä, Tayta Dios! ¡Señor Jesucristumi salvaman!