Jutsata mana ruranantsikpä yätsinqan
6
Tsaynö kaykaptinqa Tayta Dios mas kuyapämänantsikpä ¿jutsata rurartsurä kawashwan? 2 ¡Manami! Noqantsikqa jutsa ruraypä wanushqanönami kaykantsik. Tsaynö kaykarqa ¿imanöparä jutsata rurar kawashwan?3 ¿Manaku musyayanki Jesucristo cruzcho wanunqannö noqantsikpis bautizakur jutsa ruraypä wanushqanöna kanqantsikta? 4 Bautizakunqantsik hörami Jesucristuwan pampakuqnö kashqantsik. Nirkurmi Jesucristuta Tayta Dios munayninwan kawatsimunqannö noqantsiktapis mushuq kawayta qomashqantsik.† 5 Jesucristo wanunqannö noqantsikpis jutsa ruraypä wanushqa kaykarqa pay kawarimunqannömi kawarimushun.
6 Shumaq tantiyakushun. Unay kawaynintsikqa Jesucristuwan cruzcho wanushqanami kaykan. Tsaymi kananqa jutsapa munayninchönatsu kantsik.† 7 Wanushqakuna jutsata mana rurayanqannömi noqantsikpis jutsata mana ruraypa kawanantsik. 8 Tsaymi kananqa Jesucristuwan wanushqana kar musyantsik paypa makinchöna kawanantsikpä kanqanta.
9 Tsaynöpis musyantsik Jesucristo kawarimushqana kar imaypis manana wanunanpä kanqanta. Payqa wanuyta vincishqanami. 10 Juk kutilla wanurmi jutsa ruraypita jipimänantsikpä wanurqan. Kananqa Tayta Diospa ñöpanchönami kaykan. 11 Tsaynölla qamkunapis jutsa ruraypä wanushqanöna kayay. Kananqa [Señornintsik] Jesucristucho karnin Tayta Dios munanqannö kawayay.
12 Tsaynö kaykaptinqa jutsapa munaynincho amana kawayaynatsu. Shonquyki jutsaman ishkitsishuynikita munaptinpis jutsata ama rurayaytsu. 13 Llutan ruraykunaman ama jatikäyaytsu. Wanuyanqaykipita kawarimushqanö kaykarqa Tayta Diospa munayninchöna kawayay. Llapan cuerpuykipis Tayta Diosllapäna katsun. 14 Manami Tayta Diospa leyninkunata cumpliyanqaykiman yärakurtsu salvakuyanki, tsaypa trokinqa kuyapäkuq kayninman yärakurmi. Tsaynö karqa manami jutsapa munayninchönatsu kayanki.
Tayta Dios patronnintsik kanqanta tantiyatsinqan
15 Kuyapäkuq Tayta Diosman yärakur salvacionta chaskiykarqa ¿jutsa rurayllachötsurä kawashwan? ¡Manami! 16 Jutsata rurallar kawashqaqa jutsa ruraymi patronnintsik. Wätayninta llapan munanqanta patrón ruratsinqannömi jutsa ruraypis patronnintsik kar munanqanta ruratsimantsik. Tsaynö kawarqa castigashqami kashun. Tayta Dios patronnintsik kaptinmi itsanqa salvakuntsik.
17 Ñöpataqa jutsa ruraymi qamkunapapis patronnikikuna karqan. Kananqa Jesucristupa willakuyninta llapan shonquykiwan chaskishqa karmi Jesucristupa munayninchöna kaykäyanki. Tsaymi Tayta Diosta agradëcikü. 18 Jutsapa munayninpita librina karmi Tayta Dios munanqanta rurarna kawaykäyanki.
19 Patronman tinkutsiypa tsaynö parlaykä shumaq tantiyayänaykipämi. Ñöpataqa jutsapa munaynincho karmi melanaypä kaqkunata rurar kawayarqayki. Kananqa tsaynö ama kawayaynatsu, tsaypa trokinqa jutsa rurayta kacharir Tayta Dios munanqannöna kawayay.
20 Jutsapa munaynincho karqa Tayta Diosta mana cäsukurmi kawayarqayki. 21 Tayta Diosta mana cäsukur ¿ima allitatä jipiyashqayki? Tantiyakuyaptikiqa tsay llutan rurayanqaykikuna llapanpis penqakuypämi kaykan. Tsaynö kawayanqaykipitami wanuyanki.
22 Kananqa jutsa ruraypita librina karmi Tayta Diospa munayninchöna kawaykäyanki. Tsaymi pay munanqannö kawayänaykipä yanapaykäyäshunki. Tsaynö kawarmi paypa ñöpancho imayyaqpis kawayanki. 23 Jutsa rurayqa wanuymanmi apamantsik. Señornintsik Jesucristo noqantsik raykuq wanushqa kaptinmi Tayta Dios debaldilla salvamantsik ñöpancho imayyaqpis kawanantsikpä.†