Tayta Dios salvamanqantsikpita kushikunqantsik
5
Señornintsik Jesucristuman yärakur perdonashqa karmi Tayta Dioswan allina kawaykantsik. 2 Jesucristuman yärakushqami Tayta Dios kuyapämarnintsik perdonamantsik. Tsaymi gloriaman pushamänantsikpä kanqanta musyar kushikuntsik.3 Tsaynöllami kushikuntsik imanö ñakarpis payman yärakunantsikpä Tayta Dios tantiyatsimanqantsikta musyar. 4 Yärakunantsikpä tantiyatsimashqami Tayta Dios munanqannö kawayta yachakuntsik. Pay munanqannö kawarmi gloriaman qorikamänantsikpä kanqanta musyantsik. 5 Qorikamänantsikpä kaqtaqa manami manakaqllapätsu shuyaykantsik. Tayta Diosmi tsayta musyatsimantsik qomanqantsik Espíritu Santuwan. Espíritu Santumi shonquntsikcho musyatsimantsik Tayta Dios rasunpaypa kuyamanqantsikta.
6 Salvakuyta mana kamäpakushqami Tayta Dios destinanqan junaq noqantsik raykuq Jesucristo wanurqan. 7 Alli runapa trokin pipis wanuyta mana munaptin itsatä pillapis paypa trokin wanunman. 8 Jesucristumi itsanqa jutsayuq kaykashqapis noqantsik raykuq wanurqan. Tsaynöpami Tayta Dios kuyamanqantsikta musyatsimantsik.
9 Jesucristo yawarninta jichanqanpita Tayta Dios perdonaykämarnintsikqa ¿manatsurä castïgunpita salvamäshun? 10 Tayta Diospa contran kaykashqa Tsurin wanunqanpita perdonaykämarnintsikqa ¿manatsurä kawarimunqanpita salvamäshun? 11 Manami tsaypis tsayllatsu, sinöqa Señornintsik Jesucristo wanunqanpita perdonashqana karmi Tayta Diosta kushishqa alabantsik.
Adánpita wanuy shamuptinpis Jesucristupita salvación shamunqan
12 Jutsata y wanuytapis juk runalla kay patsaman apamunqanpitami† llapan runakunapis jutsata rurar wanuyan.
13 Diospa leyninkuna manarä kaptinpis runakunaqa jutsata rurayarqanmi. Jutsata rurarpis jutsayuq kayanqanta manami musyayarqantsu. 14 Itsanqa Adán kawanqanpita patsami runakuna wanuyan. Tsaynömi wanuyan Adánnö jutsata mana rurarpis.a
Manami Adánnötsu Jesucristuqa kaykan. 15 Jutsata Adán ruranqanpitami atska runakuna wanuyan. Jesucristo wanunqanpitami atska runakuna salvakuyan. Tsaynö salvakuyan Tayta Dios y Jesucristupis kuyapäkuq kaptinmi.
16 Jutsata rurashqa karmi Adánqa tinkuntsu Tayta Dios kachamunqan Jesucristuman. Jutsata Adán ruranqanpitami llapan runa castigashqa kayänanpä kaykäyan. Jesucristo noqantsik raykuq wanunqanpitami Tayta Dios perdonamantsik.
17 Jutsata Adán ruranqanpita llapan runakuna wanuyaptinpis Jesucristuman yärakuqkunaqa mana ushakaq kawaytami tariyanqa. Tsaynö tariyanqa Tayta Dios kuyapäkuq kar debaldilla perdonaptinmi.
18 Adán mana cäsukuq kanqanpitami llapan runakuna castigashqa kayänanpä kayarqan. Jesucristo cäsukuq kanqanpitami itsanqa llapan runakuna perdonashqa kar salvacionta tariyanqa.
19 Tsaymi juk runalla Tayta Diosta mana cäsukunqanpita llapan runakuna jutsata rurayan. Tsaynöllami juk runalla Tayta Diosta cäsukunqanpita atskaq runakunata jutsaynaqtana Tayta Dios chaskinqa.
20 Tayta Diosqa leyninkunata musyatsimashqantsik jutsayuq kanqantsikta tantiyakunantsikpämi. Jutsayuq kashqapis Tayta Dios kuyapäkuq karmi llapan jutsantsikta perdonaykämantsik. 21 Runakuna jutsankunapita wanuyaptinpis Tayta Dios kuyamarnintsikmi Señornintsik Jesucristo wanunqanpita perdonamantsik ñöpancho imayyaqpis kawanantsikpä.