Tayta Diosman Abraham yärakunqan
4
Unay castantsik Abrahamta Tayta Dios imanö perdonanqantapis yarpäshun. 2 Allikunata ruranqanpita Tayta Dios perdonaptinqa Abraham alabakunmanmi karqan. Manami allikunata ruranqanpitatsu payta perdonarqan, sinöqa pay ninqanta criyinqanpitami. 3 Tayta Diospa palabranpis kaynömi nin: “Ninqanta criyiptinmi jutsaynaqtana Abrahamta Tayta Dios chaskirqan”.†4 Musyanqantsiknöpis arupakuq runa arunqanpita päguta chaskinmi. Mana aruykar imatapis chaskirqa qaraytukuykanllami. 5 Tsaynöllami jutsantsikkunata Tayta Dios debaldilla perdonamantsik. Manami allikunata ruranqantsikpitatsu perdonamantsik, sinöqa payman yärakunqantsikpitami.
6 Tayta Dios debaldilla perdonanqan runa kushishqa kanqanpitami rey Davidpis qellqarqan: 7 “Kushishqami kawan Tayta Dios perdonanqan runa. Paypa jutsankunataqa Tayta Dios manami yarparannatsu. 8 Kushishqami kawan jutsaynaqtana Tayta Dios rikanqan runa”.†
Manarä señalakuptin Abrahamta Tayta Dios perdonanqan
9 ¿Señalakushqa Israel runakunallatsurä perdonashqa kaykäyan? ¿Manatsurä señalakunni mana Israel runakunapis perdonashqa kaykäyan? Abrahamta Tayta Dios perdonaptin imanö kanqanta yarpäshun. Ninqänöpis yärakuptinmi Abrahamta Tayta Dios jutsaynaqtana chaskirqan. 10 ¿Señalakuptinrätsurä Abrahamta perdonarqan? Manami. Paytaqa manarä señalakuptinmi perdonarqan.
11 Perdonaskirrämi Abrahamta señalakunanpä Tayta Dios nirqan.† Tsaynö señalakurqan Tayta Diosman yärakunqanpita perdonanqanta mana qonqänanpämi. Tsaymi señalakunni kaqkunapis Abrahamnö yärakur paypa castan kaykäyan. Tsaynöpami Tayta Dios paykunatapis perdonan.
12 Tsaynöllami señalakushqa kaqkunapis Abrahamnö yärakur Abrahampa castan kaykäyan. Abrahampa castan kaykäyan manami señalakushqa kayanqanpitatsu, tsaypa trokinqa Abrahamnö manarä señalakur yärakuyanqanpitami.
Abrahamnö yärakushqa salvamänantsikpä ninqan
13 Manami leykunata cumpliyanqanpitatsu Abrahamta y paypita aywaraqkunatapis kay patsata entregananpä† Tayta Dios awnirqan, tsaypa trokinqa Tayta Diosman yärakuyanqanpitami. 14 Leykunata cumpliqkunalla Tayta Dios awninqanta chaskiyänanpä kaykaptinqa wallällami kanman karqan Tayta Diosman yärakuyanqanpis. Tayta Dios awninqanpis manami välinmantsu karqan.†
15 Leyninkunata mana cumpliqkunataqa Tayta Diosmi castigan. Tsaynö kaptinpis tsay leykunata musyaykarpis manami cumplintsiktsu. 16 Tsaymi leyninkunata cumplinqantsikpitatsu Tayta Dios awnimanqantsik salvacionta chaskintsik, sinöqa payman yärakunqantsikpitami. Tsaynöpami Israel runa mana Israel runa karpis Abrahamnö yärakushqaqa Tayta Dios kuyapämarnintsik salvamantsik. Abraham yärakunqannö Tayta Diosman yärakurqa Abrahampa castanmi kaykantsik.†
17 Abrahampäqa Tayta Diospa palabranchöpis kaynömi qellqaraykan: “Atska nación runakunapa taytan kanaykipämi qamta churashqä”.†
Tayta Dios tsaynö nirqan payman Abraham yärakushqa kaptinmi. Tayta Diosmi wanushqakunata kawatsimun y imapis mana kanqanpita imatapis kaman.
Tayta Dios awninqanta Abraham criyinqan
18 Abrahamta awnirmi Tayta Dios nirqan: “Atska nación runakunapa taytan kaptikimi qampita aywaraqkuna yupaytapis mana atipaypä kayanqa”.
Tsay awninqanta Tayta Dios imanö cumplinanpä kanqanta mana tantiyarpis Abrahamqa criyirqanmi.† 19 Tsay awninqan witsanqa juk pachak (100) watayuqnami Abraham karqan. Wamrayuq kananpäpis awkinnami karqan. Warmin Sarapis killa qeshyanta manami rikarqannatsu. Tsaynö kaptinpis Abrahamqa Tayta Diosmanmi yärakurqan. 20 Manami janan shonqullatsu yärakurqan, tsaypa trokinqa agradëcikurmi awninqanman llapan shonqunwan yärakurqan. 21 Payqa criyirqan awninqanta Tayta Dios cumplinanpä munayyuq kanqantami. 22 Tsaynö yärakunqanpitami Tayta Dios jutsaynaqtana chaskirqan.
23 Qellqaraykanqancho ninqannö manami Abrahamllatatsu Tayta Dios perdonarqan, 24 sinöqa noqantsiktapis perdonamantsikmi. Tsaynö perdonamantsik Señornintsik Jesucristuta kawatsimuq Tayta Diosman yärakushqami. 25 Jutsata ruranqantsikpita noqantsik raykuq wanunanpämi Jesucristuta Tayta Dios kachamurqan.† Perdonamänantsikpämi Tayta Dios kawaritsimurqan.