3
Tsaynö kaykaptinqa Israel runa kanqan y señalashqa kanqan ¿allipätsurä? 2 Allipämi. Tsaynö alli kaykan Israel runakunata Tayta Dios willakuyninta puntata musyatsishqa kaptinmi.†3 Musyaykarpis manami llapantsu Tayta Dios ninqanta cumpliyarqan. ¿Paykuna mana cumpliyaptintsurä Tayta Diospis awninqankunata cumplinqatsu? 4 Payqa cumplinmi. Runakuna llulla kayaptinpis Tayta Diosqa llapan awninqankunatami cumplin. Tayta Diospa palabranchöpis kaynömi qellqaraykan: “Ninqaykita cumplirmi rasun kaqcho juzgaykämanki. Juzgamaptiki imanö tsapäkuytapis manami kamäpakütsu”.a †
5 Tsaynö kaptinpis wakin runakuna mana tantiyarmi niyan: “Jutsa ruranqäpita Tayta Dios perdonamar allitami ruraykan. Castigamarmi itsanqa mana allita ruraykan”.
6 Runakuna tsaynö niyaptinpis manami tsaynötsu. Runakunata juzgananpä kanqanta musyaykarqa ¿imanirtä tantiyayankitsu castigarpis allita ruranqanta?
7 Tsaynöllami wakin runakunapis llutanta yarpar niyan: “Tayta Diosta awninqäta mana cumpliptïpis perdonamaptinmi runakuna tantiyayan kuyapäkuq kanqanta. Tsaynö kaykaptinqa ¿imanirtä jutsäpita Tayta Dios juzgamanqa?”
8 Tsay runakuna yarpäyanqannö kaykaptinqa jutsata rurashun Tayta Dios kuyapäkuq kanqanta tantiyayänanpä. Tsay yarpayqa manami allitsu. Tsaynö yachatsir purinqäta wakin runakuna niyaptinpis manami tsaynötsu yachaykätsï. Tsaynö niq runakunataqa Tayta Dios juzgarmi mana kuyapaypa castiganqa.
Llapan runakuna jutsayuq kayanqan
9 ¿Wakin runakunapita mas jutsaynaqtsurä Israel runakuna kaykäyan? Manami. Kay cartacho ninqänöpis Israel runapis mana Israel runapis jutsayuqmi kayan. 10 Tayta Diospa palabranchöpis kaynömi qellqaraykan:
“Manami ni jukllayllapis jutsaynaq kantsu.
11 Pipis manami tantiyantsu.
Pipis manami Tayta Diosta ashintsu.
12 Llapanmi jutsata rurayan.
Llapanpis llutantami rurayan.
Pipis manami alli ruraq kantsu.†
Ni jukllayllapis manami kantsu.
13 Shiminkunapis kicharaykaq sepultüranömi.
Llullakuytaqa imaykanöpami yachayan.†
Parlayanqankunapis culebrapa venënunnömi.†
14 Runa mayinkunata maldicionarmi ashlliyan.†
15 Runa mayinta wanutsiyänanpäpis rasmi aywayan.
16 Maypa aywarpis llutankunata rurarmi runa mayinkunata llakikatsiyan.
17 Alli kaway imanö kanqantapis manami musyayantsu.†
18 Tayta Diospita mantsapakuyänanpä manami ichikllatapis yarpäyantsu”.†
19 Tayta Diospa palabrancho tsaynö niptinmi musyantsik leyninkunata musyaq runakunapis jutsayuq kayanqanta. Tsaymi runakunata Tayta Dios juzgaptin pipis tsapakuyta kamäpakunqatsu. 20 Tayta Diospa leyninkunata cumplinqanwanqa manami pipis jutsankunapita perdonashqatsu kanqa. Tayta Diospa leyninkunaqa manami salvamänantsikpätsu kaykan, tsaypa trokinqa jutsayuq kanqantsikta tantiyatsimänantsikpämi.†
Jesucristuman yärakushqa Tayta Dios salvamanqantsik
21 Kananmi itsanqa Tayta Dios musyatsimashqantsik leyninkunata cumpliyta mana kamäpakushqapis imanöpa salvamänantsikpä kanqanta. Tsaytami Moisés y profëtakuna qellqayanqankunachöpis musyatsimantsik. 22 Jesucristuman yärakushqami Tayta Dios perdonamarnintsik pï kashqapis salvamantsik.†
23 Llapan runakuna jutsayuq karmi Tayta Diospa ñöpanman chayta kamäpakuyantsu. 24 Tsaynö kaykashqapis Jesucristo rantimashqami Tayta Dios kuyapäkuq kar perdonamantsik. 25 Tsaynö perdonamantsik Jesucristo noqantsik raykuq sacrificiu kar yawarninta jichaptin payman yärakushqami. Tsaynöpami Tayta Dios musyatsimantsik alli juzgaq juez kanqantab. Unaypitana runakuna jutsayuq kayaptinpis Tayta Dios manami castigarqantsu. 26 Tsaynö castigarqantsu runakunapa trokin Jesucristuta cruzcho castigananpä karmi. Tsaynöpami tantiyatsimantsik alli juzgaq juez kanqanta y Jesucristuman yärakuqkunata perdonanqanta.
27 Tsaynö kaykaptinqa ama alabakur nishuntsu: “Allikunata ruraptïmi Tayta Dios salvamashqa”.
Manami allikunata ruranqantsikpitatsu Tayta Dios salvamashqantsik, tsaypa trokinqa payman yärakunqantsikpitami. 28 Tsaymi nï: Manami leyninkunata cumplinqantsikpitatsu Tayta Dios salvamashqantsik, tsaypa trokinqa Jesucristuman yärakunqantsikpitami.
29 ¿Tayta Diosqa Israel runakunallapatsurä Diosnin? ¿Manatsurä mana Israel runakunapapis Diosnin? Payqa mana Israel runapapis Diosninmi. 30 Tayta Diosqa jukllayllami.† Tsaymi Israel runatapis mana Israel runatapis Jesucristuman yärakuyaptin salvan.
31 Jesucristuman yärakur salvashqa kaykarqa ¿manakaqmantsurä Diospa leyninkunata churaykantsik? Manami. Tsaypa trokinqa Jesucristuman yärakushqami tsay leykunata cumpliqtanö Tayta Dios chaskimantsik.