2 Musyantsikmi pitapis jutsa ruraq kaqtaqa jutsata ruranqanman tupu Tayta Dios castigananpä kanqanta. 3 Tsaynö kaykaptinqa ¿Tayta Diospa castïgunpita qeshpiyankitsurä? 4 Tayta Dios juklla mana castigayäshuptiki ama yarpäyaytsu mana castigayäshunaykipä kanqanta. Payqa kuyapäkuq, pacienciakuq y perdonakuq karmi jutsaykikunata kachariyänaykita shuyaraykan. 5 Tsaynö kaptinpis rumi shonqu karmi jutsaykikunata kachariyankitsu. Tsaymi juzganan junaqcho Tayta Dios pasaypa ajar castigayäshunki.

6 Tsay junaqqa imanöpis kawayanqanman tupumi llapan runakunata juzganqa.^† 7 Tayta Diospa ñöpancho kawayta munar alli ruraqkunataqa imayyaqpis kawayänanpämi gloriaman pushanqa. 8 Tayta Diosta mana cäsukur jutsa ruraqkunatami itsanqa ajarnin mana kuyapaypa castiganqa.

9 Mana kuyapaypa castigaptinmi llapanpis jutsa ruraqkuna ñakar llakikuyanqa. Puntataqa Israel runakunami ñakayanqa y tsaypitanami mana Israel runakunapis. 10 Alli ruraqkunami itsanqa Tayta Diospa ñöpancho alli kawayta chaskiyanqa. Puntata Israel runakunami chaskiyanqa y tsaypitanami mana Israel runakunapis.

11 Tayta Diosqa pipapis janan mana shäriypami runakunata juzganqa.^† 12 Tsaymi leyninkunata musyaqkunatapis y mana musyaqkunatapis jutsata rurayanqanpita Tayta Dios ushakätsinqa. Leyninkunata musyaqkunataqa tsay leykuna ninqannömi juzganqa. 13 Manami leyninkunata musyayanqallanpitatsu Tayta Dios pitapis salvanqa, sinöqa leyninkunata cäsukuyanqanpitami.

14 Mana Israel runakuna Diospa leyninkunata mana musyarpis allita rurarqa tsay leykunata musyaqnömi kaykäyan. 15 Jutsankunapita llakikuyaptin y allita rurayanqanpita kushikuyaptinmi musyantsik runakunapa shonqunkunacho Diospa leyninkuna qellqaranqanta. 16 Tsaymi pakayllapa jutsa rurayanqanpita juzganan junaqcho Tayta Dios pïmaytapis juzganqa. Tsaynö juzgananpämi Jesucristuta Tayta Dios churashqa. Tsaynö kananpä kaqtami alli willakuyta willakur pitapis tantiyatsï.

17 Israel runakuna, tantiyakuyay. Qamkunami yarpäyanki Diospa leyninkunata yachayanqaykipita mana juzgayäshunaykipä kanqanta. Tsaynöpis kushikuyanki Tayta Dios akrayäshunqaykipitami. 18 Tayta Diospa leyninkunata yacharmi pay munanqannö kawayänaykipäpis musyayanki. Tsaymi alli kanqanta y mana alli kanqanta tantiyayanki. 19 Qapranö kaqkunata pushaqnö y tsakaychönö kawaqkunata aktsipaqnö kayanqaykitami yarpäyanki. 20 Mana yachaqkunata y wamrakunata alli yachatsiq kayanqaykitami yarpäyanki. Tsaynö yarpäyanki Diospa leyninkunata yachakushqa karmi.

21 Wakin runakunata tsaynö yachaykätsirqa ¿imanirtä kikikikuna cäsukuyankitsu? Mana suwakuyänanpä yachaykätsirqa ¿imanirtä kikikikuna suwakuykäyanki? 22 Majanta mana qanratänanpä yachaykätsirqa ¿imanirtä kikikikuna majaykikunata qanratäyanki? Ïdulukunata rikaytapis mana munaykarqa ¿imanirtä ïdulukunapa adornunkunata suwakuykäyanki? 23 Diospa leyninkunata yachanqaykipita alabakuykarqa ¿imanirtä tsay leykunata mana cumplir Tayta Diosta manakaqman churaykäyanki? 24 Tsaynö kawayaptiki rasuntachi Tayta Diospa palabrancho kaynö qellqaraykan: “Qamkuna llutanta rurar kawayaptikimi mana criyiq runakuna Tayta Diosta manakaqman churayan”.^†

25 Tayta Diospa leyninkunata cumpliyaptikiqa señalakuyanqaykipis allimi kaykan. Leyninkunata mana cumpliyaptikimi itsanqa señalakuyanqaykipis manakaqllapä kaykan. 26 Mana señalakushqakunapis Diospa leyninkunata cumpliyaptinqa ¿manatsurä señalakushqatanö Tayta Dios chaskinqa? 27 Tsaymi mana señalakushqa karpis Diospa leyninkunata cumpliqkuna juiciu finalcho niyäshunki: “Señalakushqa kaykarqa y Diospa leyninkunata shumaq yachaykarqa ¿imanirtä Tayta Diosta cäsukuyarqaykitsu?”

28 Manami taytan o maman Israel runa kanqallanpitatsu pipis rasunpaypa Israel runa. Tsaynöpis manami señalakushqa kanqallanpitatsu pipis rasunpaypa señalakushqa kaykan. 29 Sinöqa rasunpaypa señalakushqa kaykan shonqunta Espíritu Santu señalaptinmi.^{a †} Paykunata runakuna chikiyaptinpis Tayta Diosmi kuyan.