Amorreo runakunata ushakätsiyanqan
10
Jerusalén markapa mandaqnin rey Adonisedecmi mayarqan Jericó markata y mandaqnin reyta ushakätsinqannölla Hai markata y mandaqnin reytapis Josué ushakätsinqanta. Tsaynöllami mayarqan Gabaón runakunawan alli kawayänanpä Israel runakuna pactu rurayanqanta. 2 Gabaón markaqa Hai markapitapis mas jatun karmi rey tanqan markanö karqan. Tsaycho taq runakunapis pelyay yachaqmi kayarqan. Tsaymi Israel runakuna atacaptin Gabaón runakuna yanapayänanpä kanqanta yarpar Adonisedec y Jerusaléncho taq runakunapis pasaypa mantsariyarqan.3 Tsaymi Jerusalén markapa mandaqnin rey Adonisedecqa willakuqkunata kacharqan Hebrónpa mandaqnin rey Hohamman, Jarmutpa mandaqnin rey Pireamman, Laquispa mandaqnin rey Jafíaman y Eglónpa mandaqnin rey Debirman. Chaykurmi kachanqan runakuna niyarqan: 4 “Gabaón runakunami Israel runakunawan y mandaqnin Josuéwan alli kawayänanpä pactuta rurayashqa. Tsaynö kaykaptinqa Gabaón runakunata atacanantsikpä shamur yanapaykayällämay”.
5 Tsaynö niptinmi Jerusalén markapa, Hebrón markapa, Jarmut markapa, Laquis markapa y Eglón markapa pitsqan mandaqninkuna soldädunkunawan qorikar aywayarqan Gabaón markata atacayänanpä. Tsay reykunaqa amorreo runakunapa mandaqnin reykunami kayarqan.
6 Tsayta musyaskirmi Gabaón markacho taq runakunapis willakuqta Gilgalman kachayarqan Josuéta rugakur niyänanpä: “Jallqakunacho taq amorreo runakunapa mandaqnin reykunami ushakätsiyämänanpä soldädunkunawan qorikäyämushqa. Wätaynikikuna kaykäyaptïqa juklla shamur mana ushakätsiyämänanpä yanapaykayällämay”.
7 Tsaynö niyaptinmi Josuéqa Gilgalpita llapan mas chölun kaq soldädunkunawan juklla aywarqan. 8 Aywaykäyaptinnami Josuéta Tayta Dios nirqan: “Gabaón markata atacaq runakunata ama mantsaytsu. Vinciyänaykipä yanapaptï manami mayqanpis ichipäyäshunkitsu”.
9 Tsaymi Gilgalpita Israel runakunawan warat aywaykur illaqpita amorreo runakunata atacayarqan. 10 Tsaynö atacayaptinmi amorreo runakunapa shonqunkunaman pasaypa mantsariyta Tayta Dios churarqan. Tsaynöpami Israel runakuna tsaytsika runakunata Gabaóncho wanutsiyarqan. Wakin kaqtanami qeshpiykäyaqta qatipaykur Bet-horónman aywaq nänicho wanutsiyarqan. Bet-horónpitanami wakintapis wanutsiyarqan Azecayaq y Macedayaq. 11 Amorreo runakuna Bet-horónpita uraypa Azecayaq qeshpiykäyaptinmi rumi tsikasaq runtu tamyata Tayta Dios tamyatsimurqan. Tsay tamyawanmi Israel runakuna espädawan wanutsiyanqanpitapis mas atska runakuna wanuyarqan.
12 Amorreo runakunata ushakätsiyänanpä Tayta Dios yanapanqan junaqmi llapan Israel runakunapa ñöpancho Tayta Diosta mañakur Josué nirqan: “Gabaón marka janancho rupayta takyätsiy. Tsaynölla Ajalón pampa janancho killata takyätsiy”.
13 Josué tsaynö mañakuptinmi rupaypis killapis kuyuyarqantsu contran runakunata Israel runakuna wanutsir ushayanqanyaq. Jaser libruchöpisa tsaynö päsanqanmi qellqaraykan. Pullan ciëluchömi cäsi juk junaq qoyat rupay takyararqan. 14 Tsay junaq rupayta takyätsinqannöqa manami pï runa mañakuptinpis Tayta Dios takyätsishqatsu. Tsay junaqmi Israel runakunata Tayta Dios yanaparqan contrankunata ushakätsiyänanpä.
15 Tsaypitanami Josuéwan Israel runakuna kutiyarqan Gilgalcho campamentunkunaman.
Pitsqan reykunata Josué wanutsinqan
16 Amorreo runakunapa pitsqa mandaqnin reykunami qeshpir Macedacho kaykaq machayman pakakuyarqan. 17 Machaycho pakaraykäyanqanta willayaptinmi 18 Josué nirqan: “Jatusaq rumikunawan machay punkuta tsapaykur täpayänanpä runakunata churayay. 19 Mana täpaq kaqkunaqa contrantsik runakunata qatipaykur wanutsiyay. Tayta Diosnintsik makintsikman churaykämuptinqa markankunaman mana kutiyänanpä llapanta wanutsir ushayay”.
20 Tsaymi amorreo runakunata Josuéwan Israel runakuna vincir atskata wanutsiyarqan. Juk ishkayllanami qeshpir corralashqa markankunaman amparakuyarqan. 21 Tsayyaqmi Josué shuyararqan Macedacho kaykaq campamentucho. Wanutsiyta ushaskirmi Israel runakunaqa Josué kaykanqan kaqman llapanpis yamaylla kutiyarqan. Tsaypitaqa manami pipis Israel runakunapa contran parlarqantsu.
22 Nirkurnami Josué nirqan: “Machay punkuta kichaskir pitsqan reykunata apayämuy”.
23 Tsaynö niptinmi machaypita jipiyämurqan Jerusalén markapa, Hebrón markapa, Jarmut markapa, Laquis markapa y Eglón markapa mandaqnin reykunata. 24 Chaykatsiyaptinnami Israel runakunata qayaykatsir mandaq soldädukunata Josué nirqan: “Kay reykunata kunkanpita jaruyay”.
Tsaymi ninqannö rurayarqan. 25 Nirkurnami Josué nirqan: “Tayta Dios kanan junaq ushakätsinqannöllami llapan contrantsikkunata ushakätsinqa. Tsaynö kaykaptinqa kallpata tsarir pitapis ama mantsayaytsu”.
26 Nirkurnami Josuéqa tsay reykunata wanuskatsir tardiyaq qerucho warkurätsirqan. 27 Rupay jeqaykaptinnami qerukunacho toqriraykaqta jipiskatsir pakakuyanqan machayman jitaratsirqan. Nirkurmi jatunkaray rumikunawan machayman yaykunata tsapaskatsirqan. Tsayqa kananyaqpis jinallarämi kaykan.
Wakin markakunata Israel runakuna ushakätsiyanqan
28 Maceda markacho taq runakunata y mandaqnin reytapis tsay junaqllami Josuéqa soldädunkunawan aywar espädawan wanutsir ushayarqan. Jericócho taq runakunata y mandaqnin reyta wanutsiyanqannömi tsaycho taq runakunatapis llapanta wanutsir ushayarqan.
29 Tsaypita Libna markaman aywarmi Israel runakunawan Josué atacayarqan. 30 Tsaychöpis vinciyänanpä Tayta Dios yanapaptinmi tsaycho taq runakunata y mandaqnin reyta ushakätsiyarqan. Jericócho taq runakunata y mandaqnin reyta wanutsiyanqannömi tsaycho taqkunatapis llapanta wanutsir ushayarqan.
31 Libnapitanami Laquis markaman Israel runakunawan Josué aywarqan. Nirkurmi cercancho campamentunkunata ruraykur atacaq yaykuyarqan. 32 Atacayanqanpita juk junaqtami Laquis markacho taq runakunata y mandaqnin reytapis Israel runakunapa makinkunaman Tayta Dios churarqan. Tsaymi tsaycho kaqtaqa Libnacho rurayanqannölla llapan runakunatapis uywakunatapis Israel runakuna wanutsiyarqan. 33 Atacayanqanta musyaskirmi Gezer markapa mandaqnin rey Joram soldädunkunawan Laquischo taqkunata yanapayänanpä aywayarqan. Jinatami Josuépa soldädunkuna llapanta vincir wanutsiyarqan.
34 Laquis markapitanami Josuéqa Israel runakunawan Eglón markaman aywayarqan. Cercancho campamentunkunata ruraykurmi paykunatapis atacayarqan. 35 Laquischo runakunata y uywakunata wanutsir ushayanqannöllami tsaychöpis tsay junaq llapanta espädawan wanutsir ushayarqan.
36 Eglón markapitanami Israel runakunawan Josué aywar Hebrón† markata atacayarqan. 37 Tsay markachöpis Eglón markacho ushayanqannöllami espädawan llapanta wanutsir ushayarqan. Tsaymi reyta, markacho taq runakunata y caseriunkunacho taq runakunatapis wanutsiyaptin pipis kawaykarqa quëdarqantsu.
38 Tsaypita aywarmi Debir† markata Israel runakunawan Josué atacayarqan. 39 Tsaychöpis Hebróncho y Libnacho wanutsir ushayanqannöllami Debir markapa mandaqnin reyta, tsaycho taq runakunata y caseriunkunacho taq runakunatapis llapanta espädawan wanutsir ushayarqan.
40 Yärakuyanqan Tayta Dios ninqannöllami Israel runakunawan Josué wanutsir ushayarqan jallqakunacho taq runakunatawan mandaqnin reykunata, Neguevcho taq runakunatawan mandaqnin reykunata, Sefelacho taq runakunatawan mandaqnin reykunata y Jordán mayu pampakunaman aywaq bajädacho taq runakunatawan mandaqnin reykunatapis.† Tsaymi paykuna täyanqan llapanpis Israel runakunapäna karqan. 41 Tsay runakunatami wanutsir ushayarqan Cades-barneapita hasta Gazayaq y Gosénpita hasta Gabaónyaq. 42 Israel runakuna yärakuyanqan Tayta Dios yanapaptinmi campamentuman mana kutiyllapa llapan tsay runakunata ushakätsiyarqan. 43 Nirkurnami Gilgalcho kaykaq campamentuman Israel runakunawan Josué kutikuyarqan.