Gabaón runakuna Josuéta llullapäyanqan
9
Heteo runakunapa, amorreo runakunapa, cananeo runakunapa, ferezeo runakunapa, heveo runakunapa y jebuseo runakunapa mandaqnin reykunami wakin markakunata Israel runakuna ushakätsiyanqanta wiyayarqan. Tsay reykunami täyarqan jallqakuna kanqan partipa, Sefelapa y Mediterráneo Lamar kuchunpa hasta Líbanuyaq. Llapan tsay partikunaqa Jordán mayu tsimpan rupay jeqanan kaqläpami karqan. 2 Tsay reykunami willanakuyarqan Josuéta y Israel runakunata atacayänanpä.3 Gabaóncho taq runakunaqa Jericó markata y Hai markata Josué ushakätsinqanta wiyarmi 4 llullapäyänanpä yarpachakuyarqan. Tsaymi Josué kaqman runakunata kachayarqan. Paykunami makwa costalninkunata y qarapita rurashqa makwa y remendashqa vïnu wiñakuyänankunata ashnunkunaman chaqnakurkur aywayarqan. 5 Tsaynöllami makwa llanqinkunata y remendashqa latsapakunatapis jatikuyarqan. Nirkurnami nänipa aywar mikuyänanpäpis mupallishqa chukru tantata apayarqan. 6 Gilgal campamentuman chaykurninmi Josuéta y Israel runakunata niyarqan: “Qamkunawan alli kawanantsikpämi pasaypa karupita pactu ruraq shäyämushqä”.
7 Tsaynö niyaptinmi Israel runakuna heveo runakunata niyarqan: “Qamkunaqa capazchi cercallachöpis täyanki. Cercacho täyaptikiqa pactuta ama rurashuntsu”.†
8 Niptinpis Josuétami niyarqan: “Noqakunaqa munanqaykitami rurayäshä”.
Josuénami tapurqan: “¿Maypitatä kayanki? ¿Mayqan casta runakunatä kaykäyanki?”
9 Paykunanami niyarqan: “Tayta Diosnikikuna Egipto runakunata imanö castiganqantapis musyaskirmi karupita shäyämushqä. 10 Tsaynöpis musyayashqämi Jordán mayu wak tsimpancho taq amorreo runakunapa ishkay mandaqnin reykunata imanö ushakätsinqanta.† (Paykunaqa kayarqan Hesbón markapa mandaqnin rey Sehón y Basán partipa mandaqnin rey Ogmi. Ogqa Astarotchömi tarqan.) 11 Tsaynöpami autoridänïkunawan marka mayïkuna kachayämar niyämashqa: ‘Mirkapata kamarikuskir Israel runakuna kaqman aywar niyanki: “Noqakuna sirvishuqnikikunami kaykäyä. Kanan pactuta rurashun alli kawanantsikpä” ’ nir. 12 Niyämanqannöllami shäyämushqä. Markäpita yarqamur mirkapäkunapä kay tantakunata achaykaqllatami qepikayämurqä. Kananqa mupallishqa y chukrushqanami kaykan. 13 Kay qarakunamanpis mushuqmanmi vïnuta wiñayämurqä. Kananqa rachir ushashqanami kaykan. Tsaynö karuta shäyämuptïmi latsapäkunapis ushakashqa y llanqïkunapis makwayashqa”.
14 Tsaynö niyaptinmi apayanqanta rikaykur Israel runakuna criyir mikuyarqan. Rasunpaypa karupita kayanqanta musyayänanpä Tayta Diosta manami tapukuyarqantsu. 15 Tsaynöpami paykunata Josué awnirqan mana wanutsinanpä. Nirkurmi Israel mayor runakuna Tayta Diospa jutincho awniyarqan tsay pactuta cumpliyänanpä.
16 Tsaypita kimsa junaqtanami Israel runakuna musyayarqan Gabaón runakuna cercallacho täyanqanta. 17 Tsayta musyaskirmi ashiq aywarnin kimsa junaq aywaycho tariyarqan Gabaón runakunapa markankunata. Paykunapa markankunami karqan Gabaón, Cafira, Beerot y Quiriat-jearim. 18 Tsaycho tarirpis yärakuyanqan Tayta Diospa jutincho autoridäkuna awnishqa kayaptinmi wanutsiyarqantsu.
Gabaón runakunawan pactuta rurayanqanpitami Israel runakuna autoridäninkunapa contran parlayarqan. 19 Tsaymi autoridäkuna niyarqan: “Noqakuna Tayta Diospa jutincho jurarmi mana wanutsinantsikpä awniyashqä. Tsaymi kananqa ima ruraytapis puëdintsiktsu. 20 Tsaynö kaykaptinqa ama wanutsishuntsu. Jurayanqäta mana cumpliyaptïqa Tayta Diospis pasaypami rabyakunqa”.
21 Tsaynömi mana wanutsiyänanpä niyarqan. Tsaymi Gabaón runakunata churayarqan Israel runakunapä yantata apapuyänanpä y yakuta ashtapäyänanpä. Tsaynöpami Gabaón runakunawan pactu rurayanqanta autoridäkuna cumpliyarqan.
22 Gabaón runakunata qoriykurnami Josué nirqan: “Kay cercallacho taykarqa ¿imanirtä ‘karupitami shäyämushqä’ nir llullapäyämashqayki? 23 Tsaynö llullapäyämanqaykipitami Tayta Dios churayäshunki imaypis wätay kayänaykipä. Kananpitaqa Tayta Diosnïpa wayinmanmi yantata apayämunki y yakuta ashtayämunki”.
24 Tsaynö niptinmi Josuéta niyarqan: “Sirviqnin Moiséstashi Tayta Diosnikikuna ninä kay nacioncho taq llapan runakunata wanutsiyämänaykipä. Tsaymi wanuyta mantsarir llullapäyashqä, taytay. 25 Kananqa makikikunachömi kaykäyä. Niyämanqaykitami imatapis rurayäshä”.
26 Tsaynöpami Gabaón runakunata Josué salvarqan Israel runakuna mana wanutsiyänanpä. 27 Tsay junaqmi Gabaón runakunata churarqan Israel runakunapä imaypis yantata apapäyänanpä y yakuta ashtapäyänanpä. Tsaynöllami churarqan Tayta Diospa altarninpäpis yantatawan yakuta apapäyänanpä. Kananyaqpis tsaynöllami ruraykäyan.