Israel runakuna Hai markaman yaykuyanqan
8
Tsaypitanami Josuéta Tayta Dios nirqan: “Ama mantsariytsu ni qelanaytsu. Pelyayänanpä kamarikushqa runakunata qoriskir Hai markata atacayänaykipä juklla aywayay. Noqami yanapayäshayki Hai markapa mandaqnin reyta y tsaycho taq runakunata chipyaq ushakätsiyänaykipä. Tsaymi paykunapa chakrankunapis markanpis qamkunapana kanqa. 2 Jericó markacho taq runakunata y mandaqnin reyta ushakätsiyanqaykinöllami Hai markacho taq runakunata y mandaqnin reytapis ushakätsiyanki. Tsay markapitaqa uywankunata y imaykankunatapis kikikikunapä apakayämunki. Illaqpita atacayänaykipä marka waqtanpa yaykuskir pakaräyanki”.3 Tsaymi pelyaq aywayänanpä kimsa chunka waranqaa (30,000) runakunata Josué akrarqan. Paykunata Hai markaman paqaspa kacharmi 4 nirqan: “Niyanqäta shumaq wiyayämay. Marka qepanpa yaykuskir pakaräyanki. Tsaycho listu shuyaraykäyanki illaqpita markaman yaykur atacayänaykipä. 5 Noqanami wakin kaq runakunawan markaman aywaykur wajupäyäshä. Pelyaq yarqamuptinmi ñöpata qeshpinqantsiknölla qeshpiq tukuyäshä. 6 Paykunaqa yapay vincimanqantsikta yarparmi qepäkunata qatipäyämanqa. 7 Tsayyaqmi qamkunaqa pakaraykäyanqaykipita yarqamur markaman yaykuyanki. Tayta Diosnintsikmi tsay markata makikikunaman churamunqa. 8 Tayta Dios ninqannölla markaman yaykuskir wayikunata juklla rupatsiyanki. Kay ninqäkunataqa mana qonqaypa rurayanki”.
9 Tsaynö nirmi paykunata Josué kacharqan Hai markaläpa päsar rupay jeqanan kaqlächo pakakuyänanpä. Ninqannö aywarmi manarä Bet-el markaman char pakakuyarqan. Josuénami campamentullacho quëdarqan. 10 Waraynin tutanami tsaka tsakalla campamentucho quëdaq runakunata Josué qorirqan Hai runakunawan pelyaq aywayänanpä. Tsay runakunapa puntantami Israel mayor runakuna aywayarqan. 11 Marka frentinpa päsarmi norti kaqlächo jamayarqan. Markapita juk raqrallami paykunata rakirarqan.
12 Nirkurnami pitsqa waranqatanö (5,000) runakunata wakin runakuna pakaraykäyanqanman Josué kacharqan. Tsay runakunaqa rupay jeqanan kaqlächo y Haipita Bet-elman aywanachömi pakaraykäyarqan. 13 Tsaynöpami Israel runakuna ishkay grüpuman churanakushqa kayarqan. Jukaq grüpunami karqan markapita rupay jeqanan kaqlächo y jukaq grüpunami karqan norti kaqlächo. Tsay paqasmi Josuéwan aywaq runakuna pullan pampayaq aywayarqan.
14 Patsa waraskiptinnami tsimpankunacho kaykäyanqanta rikar Hai markapa mandaqnin rey llapan runakunawan juklla yarquyarqan Arabá pampaman aywaq bajädacho Israel runakunawan pelyayänanpä. Manami musyayarqantsu wakin Israel runakuna marka waqtancho pakaraykäyanqanta. 15 Tsaymi Josuéwan kaykaq runakunaqa qeshpiq tukur tsunyaq jirkaman aywaq nänipa aywayarqan. 16 Qeshpiqta rikarmi Hai runakunapa mandaqnin rey llapan runakunata nirqan Israel runakunata qatipäyänanpä. Tsaynö qatiparmi markapita karuyaq aywayarqan. 17 Tsaymi markacho quëdaqkunata washänanpä Hai markacho ni Bet-el markacho juk runallapis quëdarqantsu.
18 Tsaypitanami Josuéta Tayta Dios nirqan: “Lanzaykita Hai markalämanpa joqariy. Noqami yanapashayki ushakätsiyänaykipä”.
Tsaynö niptinmi Josuéqa lanzanta joqarirqan. 19 Tsaymi Israel runakunaqa pakaraykäyanqanpita yarqaskamur cörrilla markaman yaykuskir llapan wayikunatapis rupatsir ushayarqan.
20-21 Israel runakunata qatipaykäyanqancho Hai runakuna tikraykuyänanpäqa pasaypa yanayparämi markapita qoshni shäriykarqan. Josuéwan kaykaq Israel runakunanami tsaynö rupaykanqanta rikaykur tsunyaq jirkapa qeshpiykäyanqanpita kutiykur Hai runakunata atacar qallaykuyarqan. Tsaymi Hai runakunaqa maypa qeshpiytapis kamäpakuyarqantsu. 22 Nirkurnami marka rupatsiq Israel runakuna yarqayämurqan Hai runakunawan pelyayänanpä. Tsaynö ishkanläpita atacarmi Hai runakunata llapanta wanutsiyarqan. 23 Hai markapa mandaqnin reyllatami kawaykaqta tsarirkur Josuéman apayarqan.
24 Qatipaqnin runakunata wanutsir ushaskirnami Israel runakuna Hai markaman kutiykur llapan tsaycho kaqkunata wanutsiyarqan. 25 Tsay junaqmi Hai runakunata warmitapis ollqutapis chunka ishkay waranqata (12,000) wanutsiyarqan. 26 Josuéqa tsaycho taq runakunata llapanta ushakätsiyanqanyaqmi lanzanta Hai markamanpa toqirarqan. 27 Uywakunata y markacho tariyanqan kuyayllapä kaqkunataqa manami ushakätsiyarqantsu. Tsaypa trokinqa Josuéta Tayta Dios ninqannöllami kikinkunapäna apakuyarqan. 28 Hai markata Josué rupatsinqanpitami kananyaqpis raqäkunalla kaykan.
29 Hai markapa mandaqnin reytaqa Josué wanuskatsirmi tardiyaq qeruman warkatsirqan. Rupay jeqaykaptinnami jipiskatsimur marka yaykunaman apatsirqan. Nirkurnami aya jananman rumikunata qotuyänanpä nirqan. Tsay rumikunata qotuyanqanqa kananyaqmi kaykan.
Ebal jirkacho leykunata Josué liyinqan
30 Tsaypitanami Ebal jirkacho Israel runakuna yärakuyanqan Tayta Diospä altarta Josué pirqarqan. 31 Tsay altartaqa Tayta Diospa sirviqnin Moisés Israel runakunata ninqannömi llaqllanni rumikunawan pirqarqan. Moisés qellqanqan leykunachöpis kaynömi qellqaraykan: “Altarta pirqarqa llaqllashqa rumiwanqa ama pirqayankitsu”.†
Tsaychömi Israel runakunaqa rupatsina sacrificiupä y alli päsakuy sacrificiupä uywakunata altarcho rupatsiyarqan. 32 Tsaynöllami Israel runakuna rikaykäyaptin pirqanqan altar rumikunaman Moisés yachatsinqan leykunata Josué qellqarqan.†
33 Tsaypitami Israel runakuna, paykunawan kaykaq jäpa runakuna, mayor runakuna y juezkunapis ishkay partiman qorikäyarqan Tayta Diospa bendicionninta chaskiyänanpä. Tayta Diospa sirviqnin Moisés ninqannömi† pullan runakuna qorikäyarqan Gerizim jirka chakinman y pullannami qorikäyarqan Ebal jirka chakinman. Tsay jirkakuna chawpincho kaykaq pampaman Tayta Diospa Pactu Babulninta apaykurmi Leví trïbu sacerdötikuna ichiräyarqan.
34 Nirkurnami Moisés qellqanqan leykunata Josué jinchi liyimurqan. Tsaynöllami liyimurqan bendicionkuna y maldicionkuna qellqaranqankunatapis.† 35 Moisés qellqanqan leykunatami Israel runakuna wiyayänanpä llapanta Josué liyimurqan. Tsay junaqmi tsaycho kaykäyarqan runakuna, warmikuna, wamrakuna y paykunawan kaykaq jäpa runakunapis.